ନୂଆଦିଲ୍ଲୀ, ୩୦।୫(ପି.ଟି.)- ୨୦୨୦ ଏସିଆ କପ୍ ଟି୨୦ କ୍ରିକେଟ ଟୁର୍ନାମେଣ୍ଟର ଆୟୋଜନ ଅଧିକାର ପାକିସ୍ତାନକୁ ପ୍ରଦାନ କରାଯାଇଛି। ସିଙ୍ଗାପୁରରେ ଅନୁଷ୍ଠିତ ହୋଇଥିବା ଏସିଆନ କ୍ରିକେଟ କାଉନସିଲ୍ (ଏସିସି) ବୈଠକରେ ଏହି ନିଷ୍ପତ୍ତି ନିଆଯାଇଛି। ଆସନ୍ତାବର୍ଷ ଖେଳାଯିବାକୁ ଥିବା ଏସିଆ କପ୍ର ଏହା ହେବ ୧୫ତମ ସଂସ୍କରଣ। ସେହିବର୍ଷ ଅକ୍ଟୋବର ଶେଷ ଭାଗରେ ଅଷ୍ଟ୍ରେଲିଆରେ ଟି୨୦ ବିଶ୍ୱକପ୍ ଅନୁଷ୍ଠିତ ହେବ। ତେଣୁ ଏସିଆ କପ୍ର ୧୫ତମ ସଂସ୍କରଣକୁ ଟି୨୦ ଫର୍ମାଟ୍ରେ ଆୟୋଜନ କରିବାକୁ ବୈଠକରେ ନିଷ୍ପତ୍ତି ହୋଇଛି। ଏହି ବୈଠକରେ ଭାରତ, ପାକିସ୍ତାନ, ଶ୍ରୀଲଙ୍କା, ବାଂଲାଦେଶ, ଆଫଗାନିସ୍ତାନ ପରି ଟପ୍ ଦେଶଗୁଡ଼ିକ ଅଂଶଗ୍ରହଣ କରିଥିଲେ। ପାକିସ୍ତାନ କ୍ରିକେଟ ବୋର୍ଡ ଅଧ୍ୟକ୍ଷ ଏହସାନ ମନି ଓ ମ୍ୟାନେଜିଂ ଡିରେକ୍ଟର ଓ୍ବାସିମ ଖାଁ ଏହି ବୈଠକରେ ଯୋଗଦେଇଥିଲେ।
ଆୟୋଜନ ଅଧିକାର ଦିଆଯାଇଥିବାରୁ ଏସିଆ କପ୍ ଏବେ ନିରବିଚ୍ଛିନ୍ନ ଭେନ୍ୟୁରେ ଆୟୋଜନ ହେବାର ସମ୍ଭାବନା ସୃଷ୍ଟି ହୋଇଛି। ୨୦୦୯ରେ କରାଚିରେ ଶ୍ରୀଲଙ୍କା ଖେଳାଳିଙ୍କ ବସ୍ ଉପରକୁ ଆତଙ୍କବାଦୀଙ୍କ ଆକ୍ରମଣ ପରଠାରୁ ସୁରକ୍ଷାଜନିତ କାରଣ ନେଇ କୌଣସି ବିଦେଶୀ ଦଳ ପାକିସ୍ତାନରେ ଖେଳିବାକୁ ରାଜି ହେଉନାହାନ୍ତି। ସେହିଭଳି ପାକିସ୍ତାନ ସହ ଭାରତର ଦ୍ୱିପାକ୍ଷିକ ସମ୍ପର୍କ ମଧ୍ୟ ତିକ୍ତତାର ଶୀର୍ଷରେ ପହଞ୍ଚତ୍ଛି। ତେଣୁ ନିରପେକ୍ଷ ଭେନ୍ୟୁ ଭାବେ ଏହି ଟୁର୍ନାମେଣ୍ଟକୁ ୟୁଏଇରେ ଆୟୋଜନ କରିବାକୁ ପାକିସ୍ତାନ ବୋର୍ଡ ଚିନ୍ତା କରୁଥିବା ଜଣାପଡ଼ିଛି। ପ୍ରକାଶଯୋଗ୍ୟ, ଗତ ସଂସ୍କରଣ ଏସିଆ କପ୍ ଆୟୋଜନ ଅଧିକାର ଭାରତକୁ ମିଳିଥିଲ। କିନ୍ତୁ ଦୁଇ ପଡ଼ୋଶୀ ରାଷ୍ଟ୍ର ଭାରତ ଓ ପାକିସ୍ତାନ ମଧ୍ୟରେ ତିକ୍ତ ସମ୍ପର୍କ କାରଣରୁ ଏହାକୁ ୟୁଏଇରେ ଆୟୋଜନ କରାଯାଇଥିଲା। ଫାଇନାଲରେ ବାଂଲାଦେଶକୁ ପରାସ୍ତ କରି ଭାରତ ଟାଇଟଲ ହାସଲ କରିଥିଲା।
