ଭୁବନେଶ୍ୱର, ୩।୧୨:(ବ୍ୟୁରୋ): ପ୍ରଦେଶ କଂଗ୍ରେସ କମିଟି(ପିସିସି) ସଭାପତି ନିରଞ୍ଜନ ପଟ୍ଟନାୟକଙ୍କୁ ପଦବୀରୁ ହଟାଇବା ପାଇଁ ଦଳର କେତେଗୁଡ଼ିଏ ଗୋଷ୍ଠୀ ସମ୍ପୂର୍ଣ୍ଣ ସକ୍ରିୟ ହୋଇପଡ଼ିଛନ୍ତି। ନିକଟରେ ଗୋଟିଏ ଗୋଷ୍ଠୀ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ଭେଟି ନିରଞ୍ଜନଙ୍କୁ ନ ହଟାଇଲେ ଦଳ ଆଗକୁ ବଢ଼ିପାରିବ ନାହିଁ, ବୁଡ଼ିଯିବ ବୋଲି ଅଭିଯୋଗ କରି ଫେରିଥିଲେ। ଏବେ ପୁଣିଥରେ ଆଉ ଗୋଟିଏ ଗୋଷ୍ଠୀ ସୋମବାର ଦିଲ୍ଲୀ ଗସ୍ତ କରିଛନ୍ତି। ଏହି ଗୋଷ୍ଠୀରେ ପିସିସିର ପୂର୍ବତନ ଶୃଙ୍ଖଳା କମିଟି ଅଧ୍ୟକ୍ଷା ସା ମହାପାତ୍ର, ଗିରିବାଳା ବେହେରା, ଫରିଜାନା ତବସୁମ, ଶୈଳବାଳା ଜେନା, ବିଶ୍ୱକଲ୍ୟାଣୀ କର ଏବଂ ଆରତି ସ୍ବାଇଁ ଅଛନ୍ତି ବୋଲି ଜଣେ ନେତା ସୂଚନା ଦେଇଛନ୍ତି। ଏମାନେ ଦିଲ୍ଲୀ ଗସ୍ତ କରିଛନ୍ତି। ଏହି ମହିଳା କଂଗ୍ରେସର ନେତ୍ରୀମାନେ ଦିଲ୍ଲୀରେ ଦଳର ବହୁ ଆଗ ଧାଡ଼ିର ନେତାଙ୍କୁ ଭେଟିବା ସହିତ ସୋନିଆ ଏବଂ ରାହୁଲ ଗାନ୍ଧୀଙ୍କୁ ଭେଟିବେ ବୋଲି ଜଣାପଡିଛି। ଏହି ଟିମ୍ ମଧ୍ୟ ମହମ୍ମଦ ମୋକିମଙ୍କୁ ପିସିସି ସଭାପତି କରିବା ଲାଗି ଦାବି ରଖିବେ ବୋଲି ସୂଚନା ମିଳିଛି।
