କେନ୍ଦୁଝର, ୨୬ା୫(ଡି.ଏନ୍.ଏ.)-କେନ୍ଦୁଝର ଜିଲାର ସାହାରପଡା ଲ୍ୟାମ୍ପସରେ ଧାନ ବିକି ସହାୟକ ମୂଲ୍ୟ ପାଇ ନଥିବା ୬୦ରୁ ଊର୍ଦ୍ଧ୍ୱ ଚାଷୀ ମୁଣ୍ଡରେ ହାତ ଦେଇ ବସିଥିବାବେଳେ ପ୍ରତିବାଦରେ ମଙ୍ଗଳବାର ବ୍ଲକ ସମ୍ମୁଖରେ ଅନଶନ କରିଛନ୍ତି। ସାଂପ୍ରତିକ ସମୟରେ ଜୀବନ-ଜୀବିକାକୁ ନେଇ ମଣିଷ ବଞ୍ଚିବାର ରାହା ଖୋଜୁଥିବାବେଳେ ଲ୍ୟାମ୍ପସ କର୍ତ୍ତୃପକ୍ଷଙ୍କ ଏପରି ଦାୟିତ୍ୱହୀନତାକୁ ନେଇ ସାଧାରଣରେ ତୀବ୍ର ନିନ୍ଦା କରାଯାଇଛି।
ଅଭିଯୋଗରୁ ଜଣାଯାଇଛି କି ଯେ, ସାହାରପଡା ଲ୍ୟାମ୍ପସ ଅଧୀନରେ ଥିବା ଉଦୟପୁର, ଟଭାସରୁଆ, ମାଛଗଡ ଆଦିର ୬୮ଜଣ ଚାଷୀ ସରକାରଙ୍କ ସମସ୍ତ ନିତିନିୟମ ପାଳନ ମୁତାବକ ନିର୍ଦ୍ଧାରିତ ସମୟ ମଧ୍ୟରେ ଧାନମଣ୍ଡିରେ ଧାନ ବିକ୍ରୟ କରିଥିଲେ। ଏହା ମଧ୍ୟରେ ତିନିମାସରୁ ଅଧିକ ସମୟ ବିତିଯାଇଥିଲେ ମଧ୍ୟ ପ୍ରାପ୍ୟ ପାଇ ପାରି ନାହାନ୍ତି। ମାର୍ଚ୍ଚ ୫ତାରିଖରେ ସେମାନେ ଧାନ ଦେଇଥିବାବେଳେ ଅଦ୍ୟାବଧି ଟଙ୍କା ପାଇ ନଥିବା ସହ ପରେ ଧାନ ଦେଇ ପ୍ରଭାବଶାଳୀ ଚାଷୀ ଟଙ୍କା ପାଇଥିବା କଥା ମଧ୍ୟ ଅଭିଯୋଗ ହୋଇଛି। ଏହି ସମସ୍ୟା ସମ୍ପର୍କରେ ଲ୍ୟାମ୍ପସ ପରିଚାଳନା ନିର୍ଦ୍ଦେଶକଙ୍କୁ ବାରମ୍ବାର ସାକ୍ଷାତ କଲେ ମଧ୍ୟ କୌଣସି ଫଳ ମିଳୁ ନାହିଁ। ଜିଲା କାର୍ଯ୍ୟାଳୟରେ ସେମାନେ ଯୋଗାଯୋଗ କରିବା ପରେ ମଧ୍ୟ ଲାଭ ହୋଇ ନଥିବାରୁ ମଙ୍ଗଳବାର ସାହାରପଡା ବ୍ଲକ ସମ୍ମୁଖରେ ଅନଶନରେ ବସିଥିଲେ। ଏହାପରେ ଜିଲାପାଳଙ୍କ କାଯର୍ୟାଳୟକୁ ଆସି ଆଲୋଚନା କରିବାକୁ ପ୍ରତିଶ୍ରୁତି ପାଇବା ପରେ ଆନ୍ଦୋଳନ ପ୍ରତ୍ୟାହୃତ ହୋଇଥିଲା।
