ବରଗଡ଼ ଅଫିସ୍,୨୭।୪: ଆନ୍ଧ୍ରପ୍ରଦେଶକୁ ଦାଦନ ଖଟିବାକୁ ଯାଇଥିବା ବରଗଡ଼, ବଲାଙ୍ଗୀର ଏବଂ ରାୟଗଡ଼ା ଜିଲାର ୪୭ଶ୍ରମିକ ଚାଲିଚାଲି ଘରକୁ ଫେରୁଛନ୍ତି । ଏ ନେଇ ସୋମବାର ଧରିତ୍ରୀରେ ଆନ୍ଧ୍ରରୁ ଗାଁ ମୁହାଁ ଶ୍ରମିକ ଶୀର୍ଷକରେ ଏକ ବିସ୍ତୃତ ରିପୋର୍ଟ ପ୍ରକାଶ ପାଇଛି । ଏହି ରିପୋର୍ଟକୁ ଆଧାର କରି ବରଗଡ଼ ଜିଲା ବିଜେପୁର ବ୍ଲକ ଯୋଖିପାଲି ଗ୍ରାମର ସାମାଜିକ କର୍ମୀ ଦିବସ କୁମାର ସାହୁ ମୁଖ୍ୟମନ୍ତ୍ରୀଙ୍କ ସମେତ ବରଗଡ଼, ବଲାଙ୍ଗୀର, ରାୟଗଡ଼ା ଏସ୍ପି, ଜିଲାପାଳ ପ୍ରମୁଖଙ୍କୁ ଟୁଇଟ୍ କରି ସରକାରଙ୍କ ଗାଇଡ୍ଲାଇନ୍ ଅନୁଯାୟୀ ସମ୍ପୃକ୍ତ ଶ୍ରମିକଙ୍କୁ ଘରକୁ ପହଞ୍ଚାଇବା ବ୍ୟବସ୍ଥା କରିବାକୁ ନିବେଦନ କରିଛନ୍ତି । ଏଠାରେ ଉଲ୍ଲେଖନୀୟ, ସମ୍ପୃକ୍ତ ଶ୍ରମିକମାନେ ଆନ୍ଧ୍ରପ୍ରଦେଶର ବିଜୟନଗରମ୍ର ଏକ କମ୍ପାନୀରେ କାମ କରୁଥିଲେ । ଲକ୍ ଡାଉନ୍ କଟକଣା ପରେ ସେମାନଙ୍କ ରୋଜଗାର ବନ୍ଦ ହୋଇ ଯାଇଥିଲା । ଏହା ସହିତ ଖାଇବା, ପିଇବା ସମସ୍ୟା ମଧ୍ୟ ଦେଖାଯାଇଥିଲା । ଫଳରେ ସେମାନେ ରେଳପଥରେ ଚାଲିଚାଲି ଘରକୁ ଫେରୁଥିବା ବାଟରେ ସୀତାନଗରମ୍ ନିକଟରେ ପୋଲିସ ହାବୁଡ଼ରେ ପଡ଼ିଥିଲେ । ପୋଲିସ ଭୟରେ ସେମାନେ ଏକ ଜଙ୍ଗଲକୁ ଚାଲି ଯାଇ ସେଠାରେ ଆଶ୍ରୟ ନେଇଥିଲେ । ପରେ ସାମାଜିକ କର୍ମୀ ସାହୁ ଖବର ପାଇ ସେ ନେଇ ସୂଚନା ଦେବା ପରେ ସୀତାପୁରମ ପୋଲିସ ସମ୍ପୃକ୍ତ ଶ୍ରମିକଙ୍କ ପାଖକୁ ଖାଦ୍ୟ ସାମଗ୍ରୀ ପହଞ୍ଚାଇଥିଲା । ତେବେ ସେଠାରୁ ଶ୍ରମିକମାନେ ପୁଣି ଚାଲିଚାଲି ଆସି ରାୟଗଡ଼ା ଜିଲା ସୀମାକୁ ପହଞ୍ଚିଥିବା ସୂଚନା ମିଳିଛି ।
