କାମାକ୍ଷାନଗର,୮।୩(ଡି.ଏନ.ଏ.) – ଢେଙ୍କାନାଳ ଜିଲା କାମାକ୍ଷାନଗର ଥାନା ଜିରିଡ଼ାମାଳି ଛକରେ ଶନିବାର ମଧ୍ୟାହ୍ନରେ ଲୋମଟାଙ୍କୁରା ଦୁର୍ଘଟଣା ଘଟିଛି। ୫୩ନଂ. ଜାତୀୟ ରାଜପଥ ସମ୍ପ୍ରସାରଣ କାର୍ଯ୍ୟରେ ନିୟୋଜିତ ଏକ ହାଇଓ୍ବା ଧକ୍କାରେ ଜଣେ ଜେଲ ଓ୍ବାର୍ଡରଙ୍କ ମୃତ୍ୟୁ ଘଟିଛି। ସେ ହେଲେ ପ୍ରକାଶ ବେହେରା (୩୦) ଏବଂ ତାଙ୍କ ଘର କନ୍ତାରିପାଟରେ। ପ୍ରକାଶ କାମାକ୍ଷାନଗର ଉପକାରାଗାରରେ ଓ୍ବାର୍ଡର ଥିଲେ। ଡ୍ୟୁଟି ସାରି ବାଇକ୍ (ନଂ. ଓଡି ୧୯ ଏମ ୮୫୦୮)ରେ ଘରକୁ ଯାଉଥିବାବେଳେ ଉକ୍ତ ହାଇଓ୍ବା (ନଂ. ଓଡି ୧୯ ଡି ୫୯୫୬) ତାଙ୍କ ଉପରେ ଚଢ଼ିଯାଇଥିଲା। ଥାନାଧିକାରୀ ଅଭିନବ ଡାଳୁଆ ସଦଳବଳ ପହଞ୍ଚତ୍ ହାଇଓ୍ବାକୁ ଜବତ କରିଛନ୍ତି। ଘଟଣାସ୍ଥଳରୁ ଡ୍ରାଇଭର ଫେରାର ହୋଇଯାଇଛନ୍ତି। ମୃତଦେହ ବ୍ୟବଚ୍ଛେଦ କରିବାକୁ ପଠାଯାଇଛି।
ଜାତୀୟ ରାଜପଥ ଦୋହରୀକରଣ କାର୍ଯ୍ୟରେ ନିୟୋଜିତ ଭାରିଯାନଗୁଡ଼ିକ ବେପରୁଆ ଭାବେ ଚଳାଚଳ କରୁଛି। ଫଳରେ ଦିନକୁ ଦିନ ଦୁର୍ଘଟଣା ହାର ବଢ଼ିବାରେ ଲାଗିଛି। ସପ୍ତାହକ ମଧ୍ୟରେ ଏହା ହେଉଛି ୩ୟ ଘଟଣା। ଗତ ୪ ତାରିଖରେ ରଙ୍ଗମାଟିଆ ନିକଟରେ ଅନୁରୂପ ଦୁର୍ଘଟଣା ଘଟିଥିଲା। ଏଥିରେ ସିଆରିମାଳିଆ ଗ୍ରାମର ସୁଧାକର ପଧାନଙ୍କ ୫ବର୍ଷର ପୁଅ ବିନୟଙ୍କ ମୃତ୍ୟୁ ଘଟିଥିଲା। ଏଥିରେ ସୁଧାକରଙ୍କ ଭାଇ ନିରଞ୍ଜନ ଡାହାଣ ଗୋଡ଼ ହରାଇଥିବାବେଳେ ସ୍ତ୍ରୀ କନକ ବର୍ତ୍ତି ଯାଇଥିଲେ। ସେହିପରି ଗତ ଶୁକ୍ରବାର କାଦୁଆ ଗ୍ରାମରୁ ୮ଜଣ ଛାତ୍ରୀଛାତ୍ରଙ୍କୁ ନେଇ ଆସୁଥିବା ଏକ ଅଟୋରିକ୍ସାକୁ ଆଳତୁମା ନିକଟରେ ଠିକାସଂସ୍ଥାର ହାଇଓ୍ବା ଧକ୍କା ଦେଇଥିଲା। ବେପରୁଆ ଗାଡ଼ିଚାଳକଙ୍କ ପ୍ରତି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଅଞ୍ଚଳବାସୀ ଦାବି କରିଛନ୍ତି।
ଏ ନେଇ ଥାନାଧିକାରୀ କୁହନ୍ତି, ଜାତୀୟ ରାଜପଥ ସମ୍ପ୍ରସାରଣ କାର୍ଯ୍ୟ ତ୍ୱରାନ୍ବିତ କରିବାକୁ ପ୍ରଶାସନର ନିଷ୍ପତ୍ତିକ୍ରମେ ଗାଡ଼ିଗୁଡ଼ିକୁ ଦିନବେଳା ଛାଡ଼ିଦିଆଯାଉଛି। ପ୍ରଶାସନ ସହ ଆଲୋଚନା କରାଯିବା ପରେ ପରବର୍ତ୍ତୀ ପଦକ୍ଷେପ ନିଆଯିବ।
