ବ୍ରହ୍ମପୁର ଅଫିସ,୧୦।୯: ଜଣେ ବ୍ୟବସାୟୀଙ୍କଠୁ ଟଙ୍କା ଲୁଟ ଅଭିଯୋଗରେ ବୈଦ୍ୟନାଥପୁର ଥାନା ପୋଲିସ ଜଣଙ୍କୁ କାବୁ କରିଛି। ସେ ହେଲେ ଲାଞ୍ଜିପଲ୍ଲୀର ମନୋଜ ପାଣିଗ୍ରାହୀ। ତାଙ୍କ ନିକଟରୁ ୩ଟି ମୋବାଇଲ ଫୋନ୍ ଓ ଗୋଟିଏ ସାଇକେଲ ଜବତ ହୋଇଛି। ମନୋଜ କିଛିଦିନ ତଳେ ଜେଲରୁ ଜାମିନରେ ଆସିଥିବା ବେଳେ ପୁଣିଥରେ ଅପରାଧିକ କାର୍ଯ୍ୟକଳାପ ଆରମ୍ଭ କରିଥିବା ପୋଲିସ ଜେରା ବେଳେ ଜାଣିବାକୁ ପାଇଛି।
ଲାଞ୍ଜିପଲ୍ଲୀର ଭୀମସେନ ପାତ୍ର କମାପଲ୍ଲୀ ଛକରେ ଏକ ମୋବାଇଲ ଦୋକାନ କରିଛନ୍ତି। ଗତ ୮ ତାରିଖ ରାତିରେ ଦୋକାନ ବନ୍ଦ କରି ଭୀମସେନ ଘରକୁ ଫେରୁଥିଲେ। ରାସ୍ତାରେ ଜଣେ ଯୁବକ ତାଙ୍କୁ ଅଟକାଇ ମାରଣାସ୍ତ୍ର ଦେଖାଇ ଭୟଭୀତ କରିବା ସହ ୧୮ ହଜାର ଟଙ୍କା, ୩ଟି ମୋବାଇଲ ଫୋନ ଓ ତାଙ୍କ ସାଇକେଲ ଛଡାଇ ନେଇଥିଲା। ଏ ନେଇ ଭୀମସେନ ଥାନାରେ ଅଭିଯୋଗ କରିଥିଲେ। ପୋଲିସ ଏକ ମାମଲା (ନଂ.୨୩୬/୨୧) ରୁଜୁ କରି ତଦନ୍ତ ଆରମ୍ଭ କରିଥିଲା। ପୋଲିସ ଶୁକ୍ରବାର ଅଭିଯୁକ୍ତ ମନୋଜଙ୍କୁ ଧରିବାରେ ସଫଳ ହୋଇଛି।
