ପୁରୀ ଅଫିସ,୧୩।୩: ପୁରୀକୁ ବିଶ୍ୱ ଐତିହ୍ୟ ସହର କରିବା ଲାଗି ଅଣ୍ଟା ଭିଡ଼ିଛନ୍ତି ରାଜ୍ୟ ସରକାର। ଏଥିପାଇଁ ଏକାଧିକ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରାଯାଇଛି। ସିଂହଦ୍ୱାରକୁ ଆକର୍ଷଣୀୟ ଭାବେ ସଜାଯାଇଛି। ପୂର୍ବାପେକ୍ଷା ଶ୍ରୀକ୍ଷେତ୍ରକୁ ଭକ୍ତ ଏବଂ ପର୍ଯ୍ୟଟକଙ୍କ ଆଗମନ ବି ବୃଦ୍ଧିପାଉଛି। ହେଲେ ଏସବୁ ଭିତରେ ପ୍ରମୁଖ ସମସ୍ୟା ପାଲଟିଛି ବଡ଼ଦାଣ୍ଡରେ ବେଆଇନ ପାର୍କିଂ ଏବଂ ଜବରଦଖଲ। ଫଳରେ ପର୍ଯ୍ୟଟକମାନେ ଯାଆସ କରିବାରେ ଅସୁବିଧା ଭୋଗୁଛନ୍ତି। ବଡ଼ଦାଣ୍ଡର ଦୁଇପାର୍ଶ୍ୱରେ ଉଠାଦୋକାନୀ, ବେଆଇନ ପାର୍କିଂ ରାସ୍ତାକୁ ଅଧା କବ୍ଜା କରିନେଉଛି। ବାଇକ୍ ଏବଂ ଅନ୍ୟାନ୍ୟ ଗାଡିମୋଟର ଯିବାଆସିବା କରିବା ପରେ ଭକ୍ତ ଏବଂ ପର୍ଯ୍ୟଟକ ଚାଲି ଚାଲି ଯିବାରେ ବି ସମସ୍ୟାରେ ପଡୁଛନ୍ତି।
ସହରର ଅନ୍ୟାନ୍ୟ ରାସ୍ତା ଅପେକ୍ଷା ସବୁବେଳେ କୋଳାହଳ ଥାଏ ବଡ଼ଦାଣ୍ଡ। ପାହାନ୍ତା ପରଠାରୁ ରାତି ୧୧ଟା ପର୍ଯ୍ୟନ୍ତ ଭକ୍ତ, ପର୍ଯ୍ୟଟକ ଏବଂ ସହରବାସୀଙ୍କ ଯିବାଆସିବା ଲାଗିରହେ। ୨.୮ କିମି ଲମ୍ବ ଓ ୧୮୦ ଫୁଟ ପ୍ରସ୍ଥ ବିଶିଷ୍ଟ ବଡ଼ଦାଣ୍ଡ ଆଜି ତା’ର ସ୍ବତନ୍ତ୍ରତା ହରାଇଛି।
ବଡ଼ଦାଣ୍ଡରେ ନୂଆ ନୂଆ ବ୍ୟବସାୟିକ ପ୍ରତିଷ୍ଠାନ ଖୋଲାଯାଉଛି। ଅନେକ ଶପିଂମଲ, ହୋଟେଲ, ଲଜିଂ ମଧ୍ୟ ଖୋଲିଛି। କିନ୍ତୁ କେତେକ ବ୍ୟବସାୟିକ ପ୍ରତିଷ୍ଠାନ ନିଜର ପାର୍କିଂ ସୁବିଧା ରଖି ନ ଥିବାରୁ ଟ୍ରାଫିକ ସମସ୍ୟା ଗୁରୁତର ହେଉଛି। କେବଳ ସେତିକି ନୁହେଁ, ବଡ଼ଶଙ୍ଖ ପରିବା ମାର୍କେଟ ବି ବଡ଼ଦାଣ୍ଡ ଉପରେ ବସୁଥିବାବେଳେ କେତେକ ଦୋକାନ ରାସ୍ତା ଉପରେ ରଖାଯାଇଛି। ଫଳରେ ଗୁଣ୍ଡିଚା ମନ୍ଦିରଠାରୁ ବଡ଼ଶଙ୍ଖ ପର୍ଯ୍ୟନ୍ତ ରାସ୍ତା ସଂକୁଚିତ ହେବାରେ ଲାଗିଛି। ଶ୍ରୀମନ୍ଦିର ସୁରକ୍ଷା ଏବଂ ସୌନ୍ଦର୍ଯ୍ୟକରଣ ପାଇଁ ପ୍ରଶାସନ ମନ୍ଦିର ଚତୁଃପାର୍ଶ୍ୱରେ ବସୁଥିବା ଉଠାଦୋକାନୀଙ୍କୁ ହଟାଇ ଦେଇଛି। ବିଶେଷକରି ସିଂହଦ୍ୱାର ସମ୍ମୁଖରେ ଯେଉଁ ବ୍ୟବସାୟୀ ପସରା ମେଲାଉଥିଲେ ସେମାନଙ୍କୁ ବି ତଡ଼ିଦିଆଯାଇଛି। ଫଳରେ ଏହି ଉଠାଦୋକାନୀମାନେ ଶ୍ରୀମନ୍ଦିର କାର୍ଯ୍ୟାଳୟ ପରଠାରୁ ମାର୍କେଟ ଛକ ପର୍ଯ୍ୟନ୍ତ ଉଭୟ ପାର୍ଶ୍ୱରେ ବସୁଛନ୍ତି। ସେମାନଙ୍କୁ ପ୍ରଶାସନ ପକ୍ଷରୁ ବସାଯାଇଛି। ପୂର୍ବରୁ ବଡ଼ଦାଣ୍ଡର ଉଭୟ ପାର୍ଶ୍ୱରେ ଠେଲା ଦୋକାନୀ ବସୁଥିବା ବେଳେ ଏବେ ଏମାନଙ୍କୁ ଆଉ ଏକ ଧାଡ଼ିରେ ଥଇଥାନ କରାଯାଇଛି। ଫଳରେ ବଡ଼ଦାଣ୍ଡ ଉଭୟ ପାର୍ଶ୍ୱରେ ଅଧାରୁ ଅଧିକ ଜାଗାକୁ ମାଡ଼ି ବସିଛନ୍ତି ଉଠା ବ୍ୟବସାୟୀ। ତେବେ ସବୁଠୁ ସଙ୍ଗିନ ସ୍ଥିତି ସୃଷ୍ଟି କରିଛି ବେଆଇନ ପାର୍କିଂ।
ସଚେତନ ନାଗରିକ ମଞ୍ଚ ସଭାପତି ପ୍ରସନ୍ନ ଦାଶ କହିଛନ୍ତି, ବଡ଼ଦାଣ୍ଡର ଶପିଂ ମଲଗୁଡ଼ିକ ମଧ୍ୟରୁ କେତେକଙ୍କ ନିଜସ୍ବ ପାର୍କିଂ ନାହିଁ। ଫଳରେ ଗ୍ରାହକମାନେ ବାଧ୍ୟ ହୋଇ ରାସ୍ତାରେ ଗାଡ଼ି ପାର୍କିଂ କରୁଛନ୍ତି, ଯାହା ଦୁର୍ଘଟଣାର କାରଣ ମଧ୍ୟ ସାଜୁଛି। ଯେଉଁ ଶପିଂ ମଲ୍ର ନିଜସ୍ବ ପାର୍କିଂ ନାହିଁ ସେମାନଙ୍କ ବିରୋଧରେ ପ୍ରଶାସନ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ଦରକାର।
ପୁରୀ-କୋଣାର୍କ ଉନ୍ନୟନ କର୍ତ୍ତୃପକ୍ଷ (ପିକେଡିଏ) ସଚିବ ଲଲାଟେନ୍ଦୁ ସାହୁ କହିଛନ୍ତି ଯେ, ନିଶ୍ଚିତ ପକ୍ଷେ ପୁରୀକୁ ଭକ୍ତ, ପର୍ଯ୍ୟଟକଙ୍କ ସଂଖ୍ୟା ବଢୁଛି। ଏହାକୁ ଦୃଷ୍ଟିରେ ରଖି ଆମକୁ ଭିତ୍ତିଭୂମି ପ୍ରସ୍ତୁତ କରିବାକୁ ପଡ଼ିବ। ବଡ଼ଦାଣ୍ଡରେ ଉଠାଦୋକାନୀ ଏବଂ ବେଆଇନ ପାର୍କିଂ ଯୋଗୁ ରାସ୍ତା ସଂକୁଚିତ ହେଉଛି। ଏହାକୁ ଗୁରୁତ୍ୱର ସହ ନିଆଯାଇଛି। ଯେଉଁ ଶପିଂ ମଲ୍ଗୁଡ଼ିକ ନିଜସ୍ବ ପାର୍କିଂ ସୁବିଧା କରିନାହାନ୍ତି ସେମାନଙ୍କୁ ନୋଟିସ କରାଯାଉଛି।ଏହା ଉପରେ ନିଶ୍ଚିତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
