ବଇଣ୍ଡା, ୨୦ା୯(ଡି.ଏନ.ଏ.)- ଅନୁଗୋଳ ଜିଲା ଆଠମଲ୍ଲିକ ବ୍ଲକ ଠାକୁରଗଡ ଗ୍ରାମର ପୂର୍ତ୍ତ ବିଭାଗ ଡାକବଙ୍ଗଳା ଓ ଏହା ନିକଟସ୍ଥ ସରକାରୀ ଜମି ଜବରଦଖଲ କରାଯାଇ ସେଠାରେ ଘର ନିର୍ମାଣ କରାଯାଇଥିବା ନେଇ ଗ୍ରାମବାସୀ ଜିଲାପାଳଙ୍କଠାରେ ଅଭିଯୋଗ କରିଥିଲେ। ଅଭିଯୋଗ କ୍ରମେ ଶୁକ୍ରବାର ରାଜସ୍ବ ବିଭାଗ ପକ୍ଷରୁ ଉକ୍ତ ଜାଗାଗୁଡିକୁ ଚିହ୍ନଟ କରାଯାଇଛି। ଠାକୁରଗଡ ଆର୍ଆଇ ଇତିଶ୍ରୀ ସାହୁ, ରାଜସ୍ବ କର୍ମଚାରୀ ପୂର୍ଣ୍ଣଚନ୍ଦ୍ର ସ୍ବାଇଁ, ପୂର୍ତ୍ତ ବିଭାଗ କନିଷ୍ଠ ଯନ୍ତ୍ରୀ ହିମାଂଶୁ ମହାଳିକ ଉପସ୍ଥିତ ରହି ଦଖଲ ହୋଇଥିବା ପ୍ଲଟ ନଂ ୭୩୩, ୭୩୪, ୭୪୨, ୭୪୩, ୭୪୧, ୭୪୦, ୭୩୯, ୭୩୮ର ଜମିକୁ ଚିହ୍ନଟ କରିଥିଲେ। ଏଥିସହ ଜବରଦଖଲକାରୀଙ୍କୁ ଜମିରେ କରିଥିବା ଘର ଭାଙ୍ଗିବାକୁ ନିର୍ଦ୍ଦେଶ ଦିଆଯାଇଛି। ଏପରିକି ଡାକବଙ୍ଗଳାକୁ ଯାଇଥିବା ୨ଟି ରାସ୍ତା ଜବରଦଖଲ ହୋଇଥିବାବେଳେ ତାହାକୁ ମଧ୍ୟ ଚିହ୍ନଟ କରାଯାଇଥିଲା। ଡାକବଙ୍ଗଳାକୁ ରାସ୍ତା ନିର୍ମାଣସହ ଚତୁଃପାର୍ଶ୍ୱରେ ପାଚେରି ନିର୍ମାଣ ପାଇଁ ଗ୍ରାମବାସୀ ପୂର୍ତ୍ତ ବିଭାଗ ଅଧିକାରୀଙ୍କ ଦୃଷ୍ଟି ଆକର୍ଷଣ କରିଥିଲେ। ଏହି ଅବସରରେ ଗ୍ରାମ ସଭାପତି ବସନ୍ତ କୁମାର ସାହୁ, ଉପସଭାପତି ନେପାଳ ସାହୁ, ହେମନ୍ତ ଖୁଣ୍ଟିଆ, ସୁରେଶ ଚନ୍ଦ୍ର ସାହୁ, ରବୀନ୍ଦ୍ର ବେହେରା, ସୁଜିତ କୁମାର ଦେହୁରୀ, ଲକ୍ଷ୍ମଣ ସେନାପତି, ବିକ୍ରମ ବାଘଙ୍କ ସମେତ ଗ୍ରାମବାସୀ ଉପସ୍ଥିତ ଥିଲେ।
