ନୂଆଦିଲ୍ଲୀ,୧୫।୬: ଚଳିତବର୍ଷ ରାଷ୍ଟ୍ରାୟତ୍ତ ବ୍ୟାଙ୍କ ଘରୋଇକରଣ ଲାଗି ସରକାର ଅଗ୍ରସର ହୋଇ ନ ପାରନ୍ତି। ବ୍ୟାଙ୍କଗୁଡିକର ଭାଲ୍ୟୁଏଶନ ଏବଂ ଚାପଗ୍ରସ୍ତ ସମ୍ପତ୍ତି ବର୍ତ୍ତମାନ ଉଚ୍ଚରେ ରହିଛି। ସେହିଭଳି କୋଭିଡ-୧୯ ଦେଶର ବ୍ୟାଙ୍କିଙ୍ଗ କ୍ଷେତ୍ରର ଚାପକୁ ବଢାଇଛି। ଏଭଳି ବିଭିନ୍ନ ସମସ୍ୟାକୁ ବିଚାର କରି ସରକାର ବ୍ୟାଙ୍କ ଘରୋଇକରଣ ଯୋଜନାକୁ ଆଗକୁ ନ ବଢାଇ ପାରନ୍ତି ବୋଲି ପ୍ରକ୍ରିୟା ସହ ଜଡିତ ଜଣେ ଅଧିକାରୀ ସୂଚନା ଦେଇଛନ୍ତି। ବର୍ତ୍ତମାନ ୪ ରାଷ୍ଟ୍ରାୟତ୍ତ ବ୍ୟାଙ୍କ ରିଜର୍ଭ ବ୍ୟାଙ୍କର ପ୍ରମ୍ପ୍ଟ କରେକ୍ଟିଭ ଆକ୍ସନ(ପିସିଏ) ନିୟମ ଯୋଗୁ ବିଭିନ୍ନ କଟକଣାରେ ରହିଛନ୍ତି। ଏହା ମଧ୍ୟରେ ଋଣ ଯୋଗାଣ, ପରିଚାଳନା କ୍ଷତିପୂରଣ ଏବଂ ନିର୍ଦ୍ଦେଶକଙ୍କ ଫି’ ଭଳି ବିଭିନ୍ନ ପ୍ରସଙ୍ଗ ସାମିଲ ରହିଛି। ଏଭଳି ପ୍ରସଙ୍ଗକୁ ଦେଖିଲେ ଇଣ୍ଡିଆନ ଓଭରସିଜ ବ୍ୟାଙ୍କ, ସେଣ୍ଟ୍ରାଲ ବ୍ୟାଙ୍କ ଅଫ ଇଣ୍ଡିଆ, ୟୁକୋ ବ୍ୟାଙ୍କ ଏବଂ ୟୁନାଇଟେଡ ବ୍ୟାଙ୍କ ଅଫ ଇଣ୍ଡିଆର ଘରୋଇକରଣ ଲାଗି ବର୍ତ୍ତମାନ ସ୍ଥିତି ଭଲ ନୁହେଁ ବୋଲି ଅଧିକାରୀ କହିଛନ୍ତି। ଯଦି ସଂସ୍ଥାଗୁଡିକ ଷ୍ଟ୍ରାଟେଜିକ ସେକ୍ଟର ସହ ସମ୍ପର୍କ ରଖିଥାନ୍ତି ତେବେ ତା’ର ଘରୋଇକରଣ ଲାଗି ସରକାର ଆଗଭର ହେବେ ନାହିଁ। ସରକାର ବ୍ୟାଙ୍କଗୁଡିକରେ ଅଂଶଧନକୁ କମାଇବା ଦିଗରେ ପଦକ୍ଷେପ ନେବାକୁ ଯୋଜନା ରଖିଛନ୍ତି। ମାତ୍ର ବର୍ତ୍ତମାନର ମହାମାରୀ କେବଳ ବ୍ୟାଙ୍କଗୁଡିକର ଅଭିବୃଦ୍ଧିକୁ ପ୍ରଭାବିତ କରିନାହିଁ ବରଂ ସେଗୁଡିକର ଆର୍ଥତ୍କ ଅବସ୍ଥାକୁ କ୍ଷତିଗ୍ରସ୍ତ କରିଛି। ଫେବୃୟାରୀରେ ଆସିଥିବା ବଜେଟରେ ବ୍ୟାଙ୍କଗୁଡିକ ଲାଗି ପୁଞ୍ଜି ଯୋଗାଣ ଲାଗି କୌଣସି ଘୋଷଣା ହୋଇନାହିଁ। ବ୍ୟାଙ୍କଗୁଡିକର ମିଶ୍ରଣ ଦିଗରେ ସରକାର ଗତ କିଛିବର୍ଷରେ ବିଭିନ୍ନ ପଦକ୍ଷେପ ହାତକୁ ନେଇଛନ୍ତି। ବର୍ତ୍ତମାନ ଷ୍ଟେଟ ବ୍ୟାଙ୍କ ସହ ଷ୍ଟେଟ ବ୍ୟାଙ୍କ ଅଫ୍ ସୌରାଷ୍ଟ୍ର, ଷ୍ଟେଟ ବ୍ୟାଙ୍କ ଅଫ୍ ଇନ୍ଦୋର, ଷ୍ଟେଟ ବ୍ୟାଙ୍କ ଅଫ ପଟିଆଲା, ଷ୍ଟେଟ ବ୍ୟାଙ୍କ ଅଫ ବିକାନେର ଆଣ୍ଡ ଜୟପୁର, ଷ୍ଟେଟ ବ୍ୟାଙ୍କ ଅଫ ମହୀଶୁର, ଷ୍ଟେଟ ବ୍ୟାଙ୍କ ଅଫ ଟ୍ରାଭାଙ୍କୋର, ଷ୍ଟେଟ ବ୍ୟାଙ୍କ ଅଫ ହାଇଦ୍ରାବାଦ ଏବଂ ଭାରତୀୟ ମହିଳା ବ୍ୟାଙ୍କ ମିଶ୍ରଣ ହୋଇଛି। ସେହିଭଳି ୨୦୧୯ ଏପ୍ରିଲରୁ ବ୍ୟାଙ୍କ ଅଫ ବରୋଦା ସହ ବିଜୟା ବ୍ୟାଙ୍କ ଏବଂ ଦେନା ବ୍ୟାଙ୍କ ମିଶ୍ରଣ ହୋଇଥିବା ବେଳେ ଏହା ଦେଶର ତୃତୀୟ ବୃହତ ବ୍ୟାଙ୍କ ହୋଇପାରିଛି। ଏପ୍ରିଲରୁ ଆରମ୍ଭ ହୋଇଥିବା ମେଗା ବ୍ୟାଙ୍କ ମିଶ୍ରଣ ଯୋଜନାରେ ପଞ୍ଜାବ ନ୍ୟାଶନାଲ ବ୍ୟାଙ୍କ ସହ ଓରିଏଣ୍ଟାଲ ବ୍ୟାଙ୍କ ଅଫ କମର୍ସ ଏବଂ ୟୁନାଇଟେଡ ବ୍ୟାଙ୍କ ଅଫ ଇଣ୍ଡିଆ ମିଶିଛି। ସେହିଭଳି କାନାରା ବ୍ୟାଙ୍କ ସହ ସିଣ୍ଡିକେଟ ବ୍ୟାଙ୍କ, ୟୁନିୟନ ବ୍ୟାଙ୍କ ଅଫ ଇଣ୍ଡିଆ ସହ ଆନ୍ଧ୍ର ବ୍ୟାଙ୍କ ଏବଂ କର୍ପୋରେଶନ ବ୍ୟାଙ୍କ, ଇଣ୍ଡିଆନ ବ୍ୟାଙ୍କ ଆଲ୍ଲାହାବାଦ ବ୍ୟାଙ୍କ ମିଶି ଥିବା ଜଣାପଡିଛି। ମିଶ୍ରଣ ଦ୍ୱାରା ୭ ବଡ ବ୍ୟାଙ୍କ ଏବଂ ୫ ଛୋଟ ବ୍ୟାଙ୍କ ରହିଛନ୍ତି। ଏହା ୨୦୧୭ରେ ୨୭ ରହିଥିଲା।
