ଖୋର୍ଦ୍ଧା ଅଫିସ,୬ା୪: ଖୋର୍ଦ୍ଧା ଜିଲା ପ୍ରଶାସନ ପକ୍ଷରୁ କୋଭିଡ-୧୯ ଭୂତାଣୁ ସଂକ୍ରମଣ ନିୟନ୍ତ୍ରଣ ଲାଗି ପ୍ରଚେଷ୍ଟା ଜାରି ରହିଛି। ଶନିବାର ସୁଦ୍ଧା ଖୋର୍ଦ୍ଧା, ଟାଙ୍ଗୀ, ବୋଲଗଡ଼ ଏବଂ ବାଳକାଟୀ ସ୍ବାସ୍ଥ୍ୟ ପରୀକ୍ଷା କେନ୍ଦ୍ରରୁ ୧୬୪ଜଣଙ୍କ ସ୍ବାବ ପରୀକ୍ଷା ଲାଗି ପଠାଯାଇଥିଲା। ସମସ୍ତଙ୍କ ରିପୋର୍ଟ ନେଗେଟିଭ ରହିଛି। ବିଭିନ୍ନ ରାଜ୍ୟରୁ ୩୬୬୯ଜଣ ଶ୍ରମିକ ଖୋର୍ଦ୍ଧା ଜିଲାକୁୁ ଆସିଛନ୍ତି। ସେମାନଙ୍କ ମଧ୍ୟରୁ ୨୫୫୭ଜଣଙ୍କୁ କ୍ୱାରାଣ୍ଟାଇନରେ ରଖାଯାଇଛି। ଅବଶିଷ୍ଟ ୧୧୧୨ଜଣଙ୍କୁ ଯଥାଶୀଘ୍ର କ୍ୱାରାଣ୍ଟାଇନରେ ରଖାଯିବ ବୋଲି ଜିଲାପାଳ ସୀତାଂଶୁ ରାଉତ ରବିବାର କହିଛନ୍ତି।
ସେ କହିଲେ ଯେ, ୨୮୬ଜଣ ୧୦୪ ନମ୍ବରରେ ପଞ୍ଜୀକୃତ ହୋଇଛନ୍ତି। ତମାଣ୍ଡୋ ଭ୍ରମରବର ହାଇସ୍କୁଲଠାରେ ଏକ ଡେଷ୍ଟିଚ୍ୟୁଟ ହୋମ ଖୋଲାଯାଇଛି। ସେଠାରେ ୨ଶହ ଅସହାୟ ବ୍ୟକ୍ତିଙ୍କ ରହିବା ଓ ଖାଇବା ବ୍ୟବସ୍ଥା କରାଯାଇଛି। ସହରରେ ଭିକ୍ଷାବୃତ୍ତି କରୁଥିବା ୮୦ଜଣଙ୍କୁ ସେଠାରେ ରଖାଯାଇଛି। ଏହାସହ ଜିଲାର ଖୋର୍ଦ୍ଧା ଓ ଜଟଣୀ ପୌର ପରିଷଦ, ବାଣପୁର ଓ ବାଲୁଗଁା ବିଜ୍ଞାପିତ ପରିଷଦରେ ୯ଟି ଏବଂ ୧୯୦ଟି ପଞ୍ଚାୟତରେ ୨୦୧ଟି ମୋଟ ୨୧୦ଟି ଅସ୍ଥାୟୀ ମେଡିକାଲ ବ୍ୟବସ୍ଥା କରାଯାଇଛି। ଏଥିରେ ୫୦୨୮ ଶଯ୍ୟା ରହିଛି। ଜାମୁଝରି ଓ ଛତାବରଠାରେ ଦୁଇଟି କ୍ୱାରାଣ୍ଟାଇନ କେନ୍ଦ୍ରରେ ୨୫୨ଜଣ ରହିବା ବ୍ୟବସ୍ଥା ରହିଛି। ଏହି ଅବସରରେ ଜିଲାପାଳ ରାଉତ ସମସ୍ତ ଜନସାଧାରଣ ଲକଡାଉନ ନୀତି ନିୟମକୁ ପାଳନ ଲାଗି ଆହ୍ବାନ କରିଥିଲେ।
