ବାରିପଦା ଅଫିସ,୨୫ା୫- ମହାମାରୀ କରୋନା ଭୂତାଣୁର ସଂକ୍ରମଣ ପ୍ରତିରୋଧ ଉଦ୍ଦେଶ୍ୟରେ ମୟୂରଭଞ୍ଜ ଜିଲାର ସମସ୍ତ ଅସ୍ଥାୟୀ ସ୍ବାସ୍ଥ୍ୟ ଶିବିର (ଟିଏମ୍ସି), କ୍ୱାରାଣ୍ଟାଇନ୍ ଓ ଆଇସୋଲେଶନ କେନ୍ଦ୍ରରେ ୧୪୪ ଧାରା ଜାରି କରାଯାଇଛି। ସତର୍କତା ପଦକ୍ଷେପ ସ୍ବରୂପ ସାମାଜିକ ଦୂରତ୍ୱ ବଜାୟ ରଖିବା ପାଇଁ ଗୁରୁତ୍ୱ ଦିଆଯାଇଥିବା ବେଳେ ଉକ୍ତ କେନ୍ଦ୍ରକୁ ଆବଶ୍ୟକ ନ ଥାଇ ବାହାର ଲୋକ ଆସୁଥିବାରୁ ସମସ୍ତ ଟିଏମ୍ସି କେନ୍ଦ୍ରକୁ କଣ୍ଟେନ୍ମେଣ୍ଟ ଜୋନ୍ ଅଞ୍ଚଳ ଭାବେ ଘୋଷଣା କରାଯାଇଛି। ଏହି କେନ୍ଦ୍ରର ୫୦ ମିଟର ପରିଧି ଅଞ୍ଚଳରେ ୧୪୪ ଧାରା ନିର୍ଦ୍ଦେଶନାମା ଅନ୍ୟାଦେଶ ପର୍ଯ୍ୟନ୍ତ ଜିଲା ପ୍ରଶାସନ ପକ୍ଷରୁ ଜାରି କରାଯାଇଛି। ଉକ୍ତ ଟିଏମ୍ସି ସମେତ ସମଗ୍ର ଜିଲାରେ ସନ୍ଧ୍ୟା ୭ଟାରୁ ସକାଳ ୭ଟା ପର୍ଯ୍ୟନ୍ତ ରାତ୍ରିକାଳୀନ କର୍ଫ୍ୟୁ କଟକଣା ଜାରି କରାଯାଇଛି। ସେହିଭଳି ଜିଲାର ସମସ୍ତ ସ୍କୁଲ, କଲେଜ, ଶିକ୍ଷାନୁଷ୍ଠାନ, ତାଲିମ କେନ୍ଦ୍ର, କୋଚିଂ ପ୍ରତିଷ୍ଠାନ ଆଦି ପୂର୍ବପରି ବନ୍ଦ ରହିବ। ହୋଟେଲ, ରେଷ୍ଟୁରାଣ୍ଟ ଓ ଅନ୍ୟାନ୍ୟ ଅତିଥି ସେବା କ୍ଷେତ୍ରରେ ପୂର୍ବଭଳି କଟକଣା ବଳବତ୍ତର ରହିବ। ସିନେମା ହଲ୍, ଶପିଂ ମଲ୍, ଜିମ୍, ଅବସର ବିନୋଦନ ପାର୍କ, ଥିଏଟର, ବାର୍ ଏବଂ ଅଡିଟୋରିୟମ ଆଦି ଜନସମାଗମ ସ୍ଥାନକୁ ବନ୍ଦ ରଖାଯାଇଛି। ସ୍ପୋଟର୍ସ କମ୍ପ୍ଲେକ୍ସ, ଷ୍ଟାଡିୟମ, କ୍ରୀଡ଼ା କସରତ ଆଦି କାର୍ଯ୍ୟକ୍ରମକୁ କ୍ରୀଡ଼ାବିତ୍ ଓ ଖେଳାଳିମାନଙ୍କ ପାଇଁ ଅନୁମତି ଦିଆଯାଇଥିବାବେଳେ ଦର୍ଶକଙ୍କ ପାଇଁ କଟକଣା ଲାଗୁ ରହିଛି। ଅନୁମତିପ୍ରାପ୍ତ ଦୋକାନ, ବଜାର ଓ ବ୍ୟବସାୟିକ ପ୍ରତିଷ୍ଠାନ ସକାଳ ୭ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଖୋଲା ରହିବ। ଉଲ୍ଲେଖଯୋଗ୍ୟ ଯେ, କରୋନା ସନ୍ଦେହରେ ଜିଲାର ୩୬୪୬ ଜଣଙ୍କ ସ୍ବାବ୍ ସଂଗ୍ରହ ପରେ ପରୀକ୍ଷା ପାଇଁ ପଠାଯାଇଥିଲା। ରବିବାର ସୁଦ୍ଧା ସେଥିମଧ୍ୟରୁ ୩୫୦୮ ଜଣଙ୍କ ରିପୋର୍ଟ ଆସିଥିବା ବେଳେ ୩୪୯୪ଟି ରିପୋର୍ଟ ନେଗେଟିଭ୍ ଓ ୧୪ଟି ପଜିଟିଭ୍ ଆସିଛି। ୧୩୮ଟି ରିପୋର୍ଟ ଅପେକ୍ଷାରେ ରହିଛି। ଆକ୍ରାନ୍ତଙ୍କ ମଧ୍ୟରୁ ୯ ଜଣ ସୁସ୍ଥହୋଇ ଘରକୁ ଫେରିଥିବା ବେଳେ ବର୍ତ୍ତମାନ ଆଉ ୫ ଜଣ ସଂକ୍ରମିତ ଚିକିତ୍ସିତ ହେଉଛନ୍ତି।
