ନୂଆଦିଲ୍ଲୀ,୨୯।୩: କରୋନା ପାଇଁ ସାରା ଦେଶକୁ ଲକ୍ଡାଉନ୍ ଘୋଷଣା କରାଯାଇଛି। ଫଳରେ ଦେଶ ଏକ ପ୍ରକାର ଠପ୍ ହୋଇ ଯାଇଛି। ଲକ୍ ଡାଉନକୁ ୫ ଦିନ ହୋଇଥିବା ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିବାର ତାଙ୍କ ମନ୍ କି ବାତ୍ କାର୍ଯ୍ୟକ୍ରମରେ କରୋନା ସମ୍ପର୍କରେ କଥା ହୋଇଛନ୍ତି। ଏହି କାର୍ଯ୍ୟକ୍ରମ ମାଧ୍ୟମରେ ସେ ଦେଶବାସୀଙ୍କୁ କ୍ଷମା ମାଗିଛନ୍ତି। ମୋଦି କହିଛନ୍ତି ଏମିତି କିଛି ନିଷ୍ପତ୍ତି ନେବାକୁ ପଡିଛି ଯାହା ଫଳରେ ଆପଣମାନଙ୍କ ସାଧାରଣ ଜୀବନଯାତ୍ରାରେ ବହୁ ଅସୁବିଧା ଉପୁଜିଛି। ବିଶେଷ କରି ଲକ୍ଡାଉନ୍ ସମୟରେ ଗରିବମାନେ ଯେଉଁଭଳି ଅସୁବିଧାର ସମ୍ମୁଖୀନ ହେଉଛନ୍ତି ସେଥିପାଇଁ ମୁଁ କ୍ଷମା ମାଗୁଛି। କିନ୍ତୁ କରୋନା ମଣିଷର ମୃତ୍ୟୁକୁ ଚାହିଁ ବସିଥିବା ବେଳେ ଏଭଳି ନିଷ୍ପତ୍ତି ନେବା ଜରୁରୀ ହୋଇପଡିଛି। ଆପଣମାନେ ମୋ ଉପରେ ରାଗିଥିବେ ଅବା ଅଭିମାନ କରିଥିବେ ହେଲେ ଦେଶବାସୀଙ୍କୁ କରୋନା ମହାମାରୀଠାରୁ ବଞ୍ଚାଇ ରଖିବାକୁ ଏଭଳି ନିଷ୍ପତ୍ତି ନେବା ଜରୁରୀ ହୋଇପଡିଛି ବୋଲି ମୋଦି ରବିବାର ତାଙ୍କ ମନ୍ କି ବାତ୍ କାର୍ଯ୍ୟକ୍ରମରେ କହିଛନ୍ତି। କରୋନା ମୁକାବିଲା ସମୟରେ ଡାକ୍ତର, ନର୍ସ, ପାରାମେଡିକାଲ ଷ୍ଟାଫ ଯେଉଁଭଳି ଭାବେ ସେବା ଯୋଗାଇଛନ୍ତି ତା’ର ଖୁବ୍ ପ୍ରଶଂସା କରିଛନ୍ତି ମୋଦି। କରୋନା ସହ ଲଢିବାକୁ ହେଲେ ଆମକୁ ଘର ଭିତରେ ବନ୍ଦ ହୋଇ ରହିବା ସହ ସକରାତ୍ମକ ଚିନ୍ତାଧାରା ପୋଷଣ କରିବା ଜରୁରୀ ବୋଲି ମୋଦି କହିଛନ୍ତି।
