ବିନିକା,୩୦।୮(ଡି.ଏନ୍.ଏ): ସୁବର୍ଣ୍ଣପୁର ଜିଲା ବିନିକା ବ୍ଲକ ସାରଙ୍ଗପାଲି ଗାଁର ୫୦ରୁ ଅଧ୍କା ଚାଷୀ ଉଠା ଜଲସେଚନ ଭରସାରେ ଫିବଛର ୭୦ ହେକ୍ଟର ଜମିରେ ଧାନଚାଷ୍ କରୁଛନ୍। ଜିରାନଦୀରୁ ଲିଫ୍ଟ ଜରିଆରେ ଚାଷୀ ଜମିକେ ପାଏନ୍ ମଡ଼ଉଛନ୍। ଇଥିରଲାଗି ଜିରାନଦୀ ଖଁଡ଼ିରେ ୨ଟା ଲିଫ୍ଟ ପଏଣ୍ଟ ଅଛେ। ହେଲେ ଗଲାବଛର ଜିରାନଦୀରେ ଆସିଥିବାର ବଢ଼ିରେ ୨ ନଂ. ଲିଫ୍ଟ ପଏଣ୍ଟର ୧୧ କେଭି ବିଦ୍ୟୁତ୍ ତାର ଆର ଟ୍ରାନ୍ସଫର୍ମର ଅଚଲ ହେଇଯାଇଥିଲା। ଇ ବାବ୍ଦେ ଥାନୀୟ ଚାଷୀ ବିନିକା ବିଦ୍ୟୁତ୍ ବିଭାଗ ଜେଇ ଆର ଏସ୍ଡିଓକୁଁ ଜନେଇଥିଲେ। ପଛେ ୨ନଂ. ଲିଫ୍ଟ ପଏଣ୍ଟର ଚାଷୀମାନେ ଟଁକା ଠୁଲେଇ ବିଦ୍ୟୁତ୍ ବିଭାଗରେ ଜମା କଲାରୁ ବିଭାଗ ତରଫୁ ନୂତନ ଟ୍ରାନ୍ସଫର୍ମର ଥାପନ କରାଯାଇଥିଲା। ହେଲେ ଇ ନୂତନ ଟ୍ରାନ୍ସଫର୍ମର ଥାପନା ବେଲେ ବିଭାଗ୍ ସୁରକ୍ଷାକେ ଗୁରୁତ୍ ନାଇଁଦେଇ। ଯେନ୍ଥିରଲାଗି ଗଲା ବଛର ବଢ଼ିରେ ଉପ୍ଡି ପଡ଼ିଥିବାର ବିଦ୍ୟୁତ୍ ଖୁଁଟା ଆଏଜ୍ ବି ସେନ୍ଥେଇ ପଡ଼ି ରହିଛେ। ୨ ନଂ. ଲିଫ୍ଟ ଅଧୀନ ଚାଷୀମାନେ ଥାନୀୟ ସରପଁଚ୍କଁର ସଂଗେ ବିଭାଗୀୟ ଜେଇକୁଁ ଇ ଦିଗେ ପଦକ୍ଷେପ ନେବାକେ ଅନୁରୋଧ କରିଥିଲେ। ପଛେ ଫେନ୍ ଘାଏ ଚାଷୀମାନେ ୨୪.୫.୨୦୧୯ରେ ବିଦ୍ୟୁତ୍ ବିଭାଗ ଏସ୍ଡିଓ ରଶ୍ମିରଞ୍ଜନ ଜେନାକଁୁ ଇ ଦିଗେ ପଦକ୍ଷେପ ନେବାକେ ଗୁହାରି କରିଥିଲେ। ଏସ୍ଡିଓ ଜେନା ବି ଚାଷୀକୁଁ ବହୁତ୍ ଜଲ୍ଦି ସମସିଆର ସମାଧାନ କରାଯିବାକେ କଥା ଦେଇଥିଲେ। ହେଲେ ଇ ଘଟନାକେ ଆଏଜ୍ ୧୫ ମାସ ବିତିଯାଇଛେ, ବିଭାଗୀୟ ଏସ୍ଡିଓ ବି ଚାଷୀକୁ ଦେଇଥିବାର କଥା ପାସରି ଦେଇଛନ୍। ଏନ୍ତାଥି ନଦୀ ଖଁଡ଼ିରେ ଟ୍ରାନ୍ସଫର୍ମର ଆର ଉନିଆ ବିଦ୍ୟୁତ୍ ସରଂଜାମ୍ ବିପଦ୍ ଅବସ୍ତାରେ ପଡ଼ି ରହିଛେ। ଇଆଡ଼େ ଟ୍ରାନ୍ସଫର୍ମରକେ ବିପଦ୍ ଅବସ୍ତାରେ ଝୁଲି ରହିଥିବାର ତାରମାନକେ ବିଦ୍ୟୁତ୍ ପରବାହିତ ହେଉଛେ। ଇଥିରଲାଗି ଗଁାବାସୀ ଭଏରେ ନଦୀକେ ଗଧାବୁଢ଼ା କି ଝାଡ଼ାଝପଟ ଯିବାକେ ଡରୁଛନ୍। ଗଁାବାସୀକର କହେବାର ହିସାବେ ଇ ଭିତରେ ଗଁାର ଅନେକ ଲୁକ୍କର ଗଈବଲଦ, ଛେଲ୍ମେଢ଼ି ବିଦ୍ୟୁତ୍ ଆଘାତରେ ମରି ସାଏଲେନ। ଇଆଡ଼େ ବରଷା ଲାଗି ରହିଲେ କି ଜିରାନଦୀରେ ବଢ଼ି ଆଏଲେ ଫେନ୍ଘାଏ ଟ୍ରାନ୍ସଫର୍ମର ଖରାପ୍ ହେବାରଟା ଥଏ ଆଏ ବଲି ଚାଷୀମାନେ ଅଭିଯୋଗ କରିଛନ୍। ଇ ବାବ୍ଦେ ଚାଷୀମାନେ ବିଭାଗୀୟ ଅଧ୍କାରୀମାନକୁ ବାରବାର ଗୁହାରି କରି ନିରାଶ ହେଇଛନ୍। ଇ ଦିଗେ ଜିଲାପାଲ ଦୁରୁଷ୍ଟି ଦେଇ ପଦକ୍ଷେପ ନେବାକେ ଗଁାର ସନ୍ତୋଷ ଭୋଇ, ବ୍ରଜମୋହନ ଭୋଇ, ବିଶ୍ୱଜିତ ଭୋଇ, ଚିତ୍ତରଞ୍ଜନ ଭୋଇ, ଦିବାକର ପଧାନ, ରସିକ ଜାଲ, କାକୀ ଗୋବିନ୍ଦ ରାଓ, ରଘୁ ବାଘ, ପ୍ରଶାନ୍ତ ମୁଦୁଲି ପରମୁଖ ଚାଷୀ ଅନୁରୋଧ କରିଛନ୍। ଇ ବାବ୍ଦେ ବିଭାଗୀୟ ଏସ୍ଡିଓ ରଶ୍ମିରଞ୍ଜନ ଜେନାକୁଁ ପଚରାଲାରୁ ଠିକ୍ ସମିଆରେ ଏକ୍ଜ୍ୟୁକିଟିଭ ଇଞ୍ଜିନିୟର ଆର ଏସିକଁର ବଦଲି ହେଇଗଲା। ଯେନ୍ଥିରଲାଗି ମରାମତି କାଯ୍ ଲାଗି ଯୁକ୍ତି ପତର ସଂପାଦନ କରବାରେ ଡେରି ହେଲା। ଏହେଦେ ଏସିକଁର ଅଫିସକେ ସାରଙ୍ଗପାଲି ଲିଫ୍ଟ ନଂ.୨ର ମରାମତି ଲାଗି ଚୁକ୍ତିପତର ପଠାଯାଇଛେ। ବହୁତ୍ ଜଲଦି ମରାମତି କାଯ୍ ଆରମ୍ ହେବା ବଲି ସେ କହିଥିଲେ।
