ଜୁନାଗଡ,୩୦।୯(ଡି.ଏନ.ଏ.) କଳାହାଣ୍ଡି ଜିଲା ଜୁନାଗଡ ବ୍ଲକ ସଭାଗୃହଠାରେ ରବିବାର ଓଡିଶା ୪ର୍ଥ ଶ୍ରେଣୀ କର୍ମଚାରୀ ସଂଘର ଏକ ବୈଠକ ଅନୁଷ୍ଠିତ ହୋଇଯାଇଛି। ଜୁନାଗଡ ବ୍ଲକ ସଭାପତି ହର ପ୍ରସାଦ ମାଝୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ବ୍ଲକ ସମସ୍ତ ପଞ୍ଚାୟତର ପିଅନ, ରାତ୍ରି ଜଗୁଆଳି, ଝାଡୁଦ୍ୱାରାମାନେ ଯୋଗଦେଇଥିଲେ। ବର୍ଷ ବର୍ଷ ଧରି ଏହି କର୍ମଚାରୀମାନେ ୩ ଶହରୁ ୧୫ ଶହ ଟଙ୍କା ମଧ୍ୟରେ ପାରଶ୍ରମିକ ପାଇ ପଞ୍ଚାୟତ କାର୍ଯ୍ୟାଳୟରେ ଶ୍ରମିକ ଭାବେ କାମ କରୁଛନ୍ତି। ପୂର୍ବାହ୍ନ ୧୦ଟାରୁ ୫ଟା ପର୍ଯ୍ୟନ୍ତ ଖଟୁଥିଲେ ମଧ୍ୟ ସରକାରଙ୍କ ସର୍ବନିମ୍ନ ମଜୁରୀ ପାଇବାରୁ ବଞ୍ଚତ୍ତ ହୋଇଛନ୍ତି। ବାରମ୍ବାର ଦାବି କରିବା ସତ୍ତ୍ୱେ ରାଜ୍ୟ ସରକାର ୧୨୩/୧୯୬୪ ଓ ୧୨୫/୨୦୧୪ ଆଇନର ଆଳ ଦେଖାଇ ସେମାନଙ୍କୁ ଠକି ଚାଲିଛନ୍ତି। ରାଜ୍ୟ ସରକାର ଜିଆରଏସ୍, ଯୋଗାଣ ସହାୟକ, ଏସିଏମ୍, ଆାଶା ଓ ଅଙ୍ଗନୱାଡି କର୍ମୀଙ୍କ କିଛି ଦାବି ମାନିଥିଲେ ମଧ୍ୟ ଏହି କର୍ମଚାରୀଙ୍କ ଦାବିକୁ ଅଣଦେଖା କରୁଥିବା ପ୍ରକାଶ କରିଛନ୍ତି। ଏହାସହ ନିୟମିତ ଦରମା ଓ ସ୍ଥାୟୀ ନିଯୁକ୍ତି ଦାବି ନେଇ ବୈଠକରେ ଆଳୋଚନା ହୋଇଥିଲା । ଯଦି ଏହି ଦାବି ସରକାର ନ ମାନନ୍ତି ତେବେ ଆସନ୍ତା ଅକ୍ଟୋବରରେ ବିଧାନସଭା ଘେରାଉ କରିବୁ ବୋଲି ସଂଘ ପକ୍ଷରୁ ଚେତାବନୀ ଦିଆଯାଇଥିଲା। ଏହି ବୈଠକରେ ଜିଲା କୋଷାଧ୍ୟକ୍ଷ ନବିନ ଥପ୍ପା, ଜିଲା ଆବାହାକ ଲଲିତ ପାରି, ବ୍ଲକ ସାଧାରଣ ସମ୍ପାଦକ ଦେବେନ୍ଦ୍ର ମାଝି, କୋଷାଧ୍ୟକ୍ଷ ଯଦୁମଣି ଗହୀର, ଆବାହକ ମନୋରଞ୍ଜନ ଛତ୍ରିଆ, ପୂର୍ବତନ ବ୍ଲକ ସଭାପତି ମଦନ ମୋହନ ପାଣ୍ଡେ ପ୍ରମୁଖ ଯୋଗଦେଇଥିଲେ।
