ମୁମ୍ବାଇ: ବଲିଉଡ୍ ନାୟିକା ସୁସ୍ମିତା ସେନ୍ ଏବେ ସୋସିଆଲ ମିଡିଆରେ ଖୁବ୍ ଆକ୍ଟିଭ ରହୁଛନ୍ତି। ଏବେ ଲକ୍ଡାଉନ ସମୟରେ ସେ ତାଙ୍କ ପରିବାର ସହ ସମୟ କାଟୁଥିବା ବେଳେ ଅଧିକାଂଶ ଖବରକୁ ସେ ତାଙ୍କ ଫ୍ୟାନଙ୍କ ସହ ଶେୟାର ମଧ୍ୟ କରୁଛନ୍ତି। ନିକଟରେ ସେ ସୋସିଆଲ ମିଡିଆରେ ଏକ ପୋଷ୍ଟ କରି ସ୍ପଷ୍ଟ କରିଛନ୍ତି କି ୬ ବର୍ଷ ପୂର୍ବେ ସେ ଏଡିଶନ ନାମକ ଏକ ରୋଗରେ ପୀଡ଼ିତ ହୋଇଥିଲେ। ହେଲେ ତାଙ୍କର ଦୃଢ ଇଚ୍ଛା ଶକ୍ତି ଓ ନନ ଚାକ ଓ୍ବାର୍କ ଆଉଟ ତାଙ୍କୁ ଏହି ରୋଗ କବଳରୁ ରକ୍ଷା କରିଛି ବୋଲି ସେ କହିଛନ୍ତି। ହେଲେ ଏଥିପାଇଁ ତାଙ୍କୁ ଦୀର୍ଘ ୪ ବର୍ଷ ସଂଘର୍ଷ କରିବାକୁ ପଡିଛି। ସୁସ୍ମିତା ତାଙ୍କ ୟୁଟ୍ୟୁବ ଚ୍ୟାନେଲରେ ଏକ ଭିଡିଓ ଶେୟାର କରିଛନ୍ତି। ଯେଉଁଥିରେ ସେ ନନ ଚାକ ସହ ଓ୍ବାର୍କ ଆଉଟ କରୁଥିବା ଦେଖାଯାଉଛି। ଏହି ଭିଡିଓ ସହ ସୁସ୍ମିତା ଏକ ଲମ୍ବା ଚଉଡା ପୋଷ୍ଟ ମଧ୍ୟ ଲେଖିଛନ୍ତି। ଏଥିରେ ସେ ତାଙ୍କୁ ହୋଇଥିବା ଏଡିଶନ ରୋଗ ସମ୍ପର୍କରେ ଉଲ୍ଲେଖ କରିଛନ୍ତି। ସେ ଲେଖିଛନ୍ତି ଏହି ରୋଗ ହେବା ପରେ ତାଙ୍କ ରୋଗପ୍ରତିରୋଧକ ଶକ୍ତି ସମ୍ପୂର୍ଣ୍ଣ ଦୁର୍ବଳ ହୋଇଯାଇଥିଲା। ୨୦୧୪ରେ ତାଙ୍କୁ ଏକ ଅଟୋ ଇମ୍ୟୁନୋ ସମ୍ପର୍କିତ ରୋଗ ହୋଇଥିଲା ଯାହାର ନାଁ ଥିଲା ଏଡିଶନ ବୋଲି ସେ ଲେଖିଛନ୍ତି। ଏହାପରେ ସେ ଅନୁଭବ କରିଥିଲେ ଯେମିତି ତାଙ୍କ ଶରୀରରେ ଆଦୌ ପ୍ରତିରୋଧକ ଶକ୍ତି ନାହିଁ। ସବୁବେଳେ ଥକ୍କା ଲାଗିବା ସହ ଆଖି ତଳ କଳାପଡିବା ଆରମ୍ଭ ହୋଇଯାଇଥିଲା। ଏହାକୁ ନେଇ ବହୁତ ଚିନ୍ତିତ ହୋଇପଡିବା ପରେ ସେ ନିଜ ମନକୁ ଦୃଢ କରିଥିଲେ ବୋଲି କହିଛନ୍ତି। ଏହି ରୋଗ ସହ ସଂଘର୍ଷ କରି ୨୦୧୯ରେ ତାଙ୍କର ଏଡ୍ରିନାଲ ଗ୍ଲାଣ୍ଡ ଆକ୍ଟିଭ ହୋଇଯାଇଥିବା ସେ ପ୍ରକାଶ କରିଛନ୍ତି। ଏହାପରେ ସେ ଲେଖିଛନ୍ତି ଆମ ସମସ୍ତଙ୍କ ଭିତରେ ଜଣେ ଯୋଦ୍ଧା ରହିଛି। ତେଣୁ ଦୃଢ ମନୋବଳ ହିଁ ଆମକୁ ସବୁ ପରିସ୍ଥିତିକୁ ସାମ୍ନା କରିବାକୁ ସାହସ ଦେବା ସହ ବଡ ବଡ ରୋଗକୁ ମଧ୍ୟ ଦୂରେଇ ଦେବ ବୋଲି ସେ କହିଛନ୍ତି। ଏବେ ସାରା ବିଶ୍ୱ କରୋନା ଭଳି ମହାମାରୀ ସହ ଲଢୁଥିବା ବେଳେ ସୁସ୍ମିତାଙ୍କ ଏହି କଥା କରୋନା ସଂକ୍ରମିତଙ୍କୁ ସାହସ ଯୋଗାଇବ ନିଶ୍ଚୟ।
