ଏଫ୍‌ପିଆଇ ସରଚାର୍ଜ ପ୍ରତ୍ୟାହାରକୁ ନେଇ ଅର୍ଥମନ୍ତ୍ରୀ ଚୁପ୍‌
8:21 amAugust 11, 2019 / 21

ନୂଆଦିଲ୍ଲୀ,୧୧-୮: ବଜେଟରେ ଲାଗୁ ହୋଇଥିବା ସରଚାର୍ଜକୁ ନେଇ ଚିନ୍ତିତ ଫରେନ ପୋର୍ଟଫୋଲିଓ ଇନ୍‌ଭେଷ୍ଟର(ଏଫ୍‌ପିଆଇ) କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନ୍‌ଙ୍କୁ ଭେଟିଛନ୍ତି। ସରଚାର୍ଜ ଲାଗୁ ହେବା ଦ୍ୱାରା ସେମାନଙ୍କ ନିବେଶ ପ୍ରଭାବିତ ହେଉଛି ଦର୍ଶାଇ ଏଫ୍‌ପିଆଇ ଏହାକୁ ପ୍ରତ୍ୟାହାର ପାଇଁ ଦାବି କରିଛନ୍ତି। ଏହା ପ୍ରତ୍ୟାହାର ହେବା ପରେ ଯାଇ ସେମାନେ ଭାରତରେ ନିବେଶ କରିବେ ବୋଲି ସେମାନେ ସୀତାରାମନ୍‌ଙ୍କୁ ସ୍ପଷ୍ଟ କରିଛନ୍ତି। ତେବେ ଏନେଇ କେନ୍ଦ୍ର ଅର୍ଥମନ୍ତ୍ରୀ ଚୁପ୍‌ ରହିଛନ୍ତି। ସେ ଏସଂକ୍ରାନ୍ତରେ କୌଣସି ପ୍ରତିଶ୍ରୁତି ଦେଇନାହାନ୍ତି। ଏଠାରେ ଡୋମେଷ୍ଟିକ ଇନ୍‌ଷ୍ଟିଚ୍ୟୁଶନାଲ ଇନ୍‌ଭେଷ୍ଟର ଓ ଏଫ୍‌ପିଆଇଙ୍କ ସହ ସୀତାରାମନ୍‌ ସରଚାର୍ଜକୁ ନେଇ ଆଲୋଚନା କରିଥିଲେ। ତେବେ ଏହାକୁ ପ୍ରତ୍ୟାହାର କରିବା ନେଇ ଅର୍ଥମନ୍ତ୍ରୀ ପ୍ରତିଶ୍ରୁତି ଦେବା ସଂକ୍ରାନ୍ତରେ ମନ୍ତ୍ରଣାଳୟ ପକ୍ଷରୁ କିଛି ସ୍ପଷ୍ଟ କରାଯାଇନାହିଁ। ଉଲ୍ଲେଖଯୋଗ୍ୟ ଯେ, ଅତି ଧନୀ ଓ ଏଫ୍‌ପିଆଇଙ୍କ ଉପରେ ସରଚାର୍ଜ ଲାଗୁ କରାଯିବ ବୋଲି ଚଳିତ ଆର୍ଥିକ ବର୍ଷର ବଜେଟ ଉପସ୍ଥାପନ କରି ଅର୍ଥମନ୍ତ୍ରୀ ସୀତାରାମନ୍‌ ଘୋଷଣା କରିଥିଲେ। ଏଥିରେ କ୍ଷୁବ୍‌ଧ ଏଫପିଆଇ ବଜେଟ ପରେ ଆଜିସୁଦ୍ଧା ଷ୍ଟକ ବଜାରରୁ ୨୨ ହଜାର କୋଟି ଟଙ୍କା କାଢ଼ି ନେଇଛନ୍ତି। ବୈଠକରେ ବିଦେଶୀ ସଂସ୍ଥାଗତ ନିବେଶକମାନେ ଉପସ୍ଥିତ ଥିଲେ। ତେବେ ଏହି ବୈଠକରେ ଉପସ୍ଥିତ ଥିବା ଅର୍ଥ ମନ୍ତ୍ରଣାଳୟର ଅଧିକାରୀମାନେ ସବୁ ଶୁଣିବା ପରେ ମଧ୍ୟ କିଛି ଉତ୍ତର ଦେଇ ନ ଥିଲେ। ସେମାନେ ଦିଆଯାଇଥିବା ପରାମର୍ଶକୁ ଚୁପ୍‌ଚାପ୍‌ ଶୁଣିଥିଲେ। ଆସୋସିଏଶନ ଅଫ୍‌ ଆସେଟ୍‌ ମ୍ୟାନେଜମେଣ୍ଟ ରାଉଣ୍ଡଟେବଲ ଅଫ୍‌ ଇଣ୍ଡିଆ ପ୍ରେସିଡେଣ୍ଟ ନନ୍ଦିତା ପାରକର୍‌ କହିଛନ୍ତି ଯେ, ଅର୍ଥମନ୍ତ୍ରୀଙ୍କୁ ଟିକସ ବ୍ୟବସ୍ଥା ଓ ଇଜ୍‌ ଅଫ୍‌ ଡୁଇଂ ବିଜନେସ ସମ୍ପର୍କରେ କୁହାଯାଇଛି। ଇକ୍ୟୁଟି ନିବେଶ କ୍ଷେତ୍ରରେ ଭାରତରେ ଏଫ୍‌ପିଆଇ ପ୍ରାୟ ୨୫ରୁ ୩୫ ବିଲିୟନ ଡଲାର ନିବେଶ କରିପାରିବେ ବୋଲି ସୀତାରାମନ୍‌ଙ୍କୁ ଜଣାଇ ଦିଆଯାଇଛି। ତେବେ ଏଥିଲାଗି ସ୍ଥିର ଟିକସ ବ୍ୟବସ୍ଥା ଲାଗୁ ହେବା ଆବଶ୍ୟକ ବୋଲି କୁହାଯାଇଛି।