ଏକକ ଏସିଆନ ମୁଦ୍ରା ଲାଗି ମାଲେସିଆ ପ୍ରଧାନମନ୍ତ୍ରୀଙ୍କ ପ୍ରସ୍ତାବ
1:58 amMay 31, 2019 / 21

ଟୋକିଓ,୩୧-୫: ପୂର୍ବ ଏସିଆର ଦେଶଗୁଡ଼ିକ ନିଜ ମଧ୍ୟରେ ବାଣିଜ୍ୟ କାରବାର ପାଇଁ ଏକକ ଏସିଆନ ମୁଦ୍ରା ପ୍ରଚଳନ କରିବା ଉଚିତ୍‌ ବୋଲି ମାଲେସିଆ ପ୍ରଧାନମନ୍ତ୍ରୀ ମହମ୍ମଦ ମହାତିର ଗୁରୁବାର ପ୍ରସ୍ତାବ ଦେଇଛନ୍ତି। ତାଙ୍କର କହିବାନୁଯାୟୀ,ପ୍ରସ୍ତାବିତ ଏସିଆନ ମୁଦ୍ରା ସୁନା ଆଧାରିତ ହେବା ଉଚିତ୍‌। ଏହାଦ୍ୱାରା ଆଞ୍ଚଳିକ ବାଣିଜ୍ୟକୁ ପ୍ରୋତ୍ସାହନ ମିଳିବ ଏବଂ ଆମେରିକା ଡଲାର ଉପରେ ଦେଶଗୁଡ଼ିକର ନିର୍ଭରଶୀଳତା କମିବ। ମହାତିର କହିଛନ୍ତି ଯେ, ଏହି ପ୍ରସ୍ତାବିତ ମୁଦ୍ରା କେବଳ ଆଞ୍ଚଳିକ ବାଣିଜ୍ୟ ଲାଗି ବ୍ୟବହାର କରାଯିବ ଏବଂ ପ୍ରତ୍ୟେକ ଦେଶ ନିଜର ଘରୋଇ ମୁଦ୍ରା ପ୍ରଚଳନ ଜାରି ରଖିବେ। ଏଠାରେ ‘ ଫ୍ୟୁଚର ଅଫ୍‌ ଏସିଆ’ ସମ୍ମିଳନୀରେ ଯୋଗ ଦେଇ ମହାତିର କହିଛନ୍ତି ଯେ, ସୁଦୂର ପୂର୍ବ ଏସିଆକୁ ଏକାଠି ହେବାକୁ ପଡେ, ତେବେ ଆମକୁ ବାଣିଜ୍ୟ ଲାଗି ଏକକ ମୁଦ୍ରା ପ୍ରଚଳନ କରିବାକୁ ହେବ, ଯାହା କି ବାଣିଜ୍ୟ କାରବାର ପାଇଁ ବ୍ୟବହାର କରାଯାଇପାରିବ। ସେ କହିଛନ୍ତି ଯେ, ବିଶ୍ୱର ସବୁ ରାଷ୍ଟ୍ର ବାଣିଜ୍ୟ କାରବାର ପାଇଁ ଏବେ ଆମେରିକା ଡଲାର ଉପରେ ନିର୍ଭର କରୁଛନ୍ତି। ତେବେ ଏହା ସ୍ଥାୟୀ ନୁହେଁ। ଏଣୁ ପ୍ରସ୍ତାବିତ ମୁଦ୍ରା ସୁନା ଆଧାରିତ ହେବା ଆବଶ୍ୟକ। ଏହା ଡଲାର ତୁଳନାରେ ଅଧିକ ସ୍ଥାୟୀ ହେବ। ସେ କହିଛନ୍ତି ଯେ, ଆଞ୍ଚଳିକ ମୁଦ୍ରା ବିନିମୟ ଦର ପ୍ରତ୍ୟେକ ଶେର ପ୍ରଦର୍ଶନ ଆଧାର ଉପରେ ନିର୍ଭର କରିବ। ଏହାଦ୍ୱାରା ଆଞ୍ଚଳିକ ବାଣିଜ୍ୟକୁ ସହଜ କରାଯାଇପାରିବ। ଏହାଦ୍ୱାରା ଆମ ଉପରେ କେତେ ଋଣ ବୋଝ ରହିଛି ସହଜରେ ଜାଣି ହେବ ଏବଂ ଆମକୁ କେତେ ପରିମାଣରେ ଏସିଆନ ମୁଦ୍ରା ଦେବାକୁ ହେବ।