ବଇଣ୍ଡା,୫।୧(ଡି.ଏନ.ଏ.) – ପୁରୀ-ହାଟିଆ ତପସ୍ବିନୀ ଏକ୍ସପ୍ରେସ ନଂ.୧୮୪୫୨ ଇଞ୍ଜିନରେ ତ୍ରୁଟି ଯୋଗୁ ଶନିବାର ଅନୁଗୋଳ ଓ ବାମୁର ଷ୍ଟେଶନରେ ଦୀର୍ଘ ୫ ଘଣ୍ଟା ଅଟକି ରହିଥିଲା। ଫଳରେ ପିଇବା ପାଣି ପାଇଁ ଯାତ୍ରୀଙ୍କୁ ବଡ଼ ଅସୁବିଧାର ସମ୍ମୁଖୀନ ହେବାକୁ ପଡ଼ିଥିଲା। ଏହାକୁ ନେଇ ସେମାନେ ତୀବ୍ର ଅସନ୍ତୋଷ ବ୍ୟକ୍ତ କରିଥିବା ବେଳେ ଉକ୍ତ ଟ୍ରେନ୍ରେ ଯାତ୍ରା କରୁଥିବା ପୂର୍ବତନ କେନ୍ଦ୍ରମନ୍ତ୍ରୀ ତଥା ସୁନ୍ଦରଗଡ଼ ଏମ୍ପି ଜୁଏଲ ଓରାମ ମଧ୍ୟ ଟୁଇଟ୍ କରି କ୍ଷୋଭ ପ୍ରକାଶ କରିଥିଲେ। ତେବେ ଇଞ୍ଜିନ ବଦଳାଯିବା ପରେ ଟ୍ରେନ୍ଟି ଗନ୍ତବ୍ୟ ପଥରେ ଯାଇଥିବା ଜଣାପଡ଼ିଛି।
ଶୁକ୍ରବାର ରାତିରେ ପୁରୀ ଷ୍ଟେଶନ ଛାଡ଼ିଥିବା ତପସ୍ବିନୀ ଏକ୍ସପ୍ରେସ୍ ଅନୁଗୋଳ ଷ୍ଟେଶନରେ ରାତି ୨ଟା ୧୩ରେ ପହଞ୍ଚିଥିଲା। ସେଠାରେ ଇଞ୍ଜିନରେ ତ୍ରୁଟି ଦେଖାଦେବାରୁ ୨ ଘଣ୍ଟା ବିଳମ୍ବ ଅର୍ଥାତ ୪ଟା ୦୫ରେ ସମ୍ବଲପୁର ଅଭିମୁଖେ ଛାଡିଥିଲା। ଭୋର ୪ଟା ୪୫ରେ ଏକ୍ସପ୍ରେସ୍ ଅନୁଗୋଳ ଜିଲାର ବଇଣ୍ଡା ଷ୍ଟେଶନ ଓ ବାମୁରରେ ସକାଳ ୫ଟା ୩୬ରେ ପହଞ୍ଚିଥିଲା। ହେଲେ ଇଞ୍ଜିନର ଚକ ଜାମ ହୋଇଯିବାରୁ ସେଠାରେ ଟ୍ରେନ୍ଟି ୩ ଘଣ୍ଟା ଅଟକି ରହିଥିଲା। ହଣ୍ଡପାରୁ ଏକ ନୂଆ ଇଞ୍ଜିନ ଅଣାଯାଇ ଟ୍ରେନ୍ରେ ଲଗାଯିବା ପରେ ସକାଳ ୮ଟା ୪୦ରେ ତାହା ହାଟିଆ ଅଭିମୁଖେ ଯାତ୍ରା କରିଥିଲା। ଏ ନେଇ ବାମୁର ଷ୍ଟେଶନ ମାଷ୍ଟର ରଞ୍ଜିତ କୁମାର ମହାନ୍ତି କହିଛନ୍ତି, ଚକ ଜାମ ଯୋଗୁ ଟ୍ରେନ୍ ଆଗକୁ ଗଡ଼ିପାରି ନ ଥିଲା। ଇଞ୍ଜିନ ପରିବର୍ତ୍ତନ ପାଇଁ ଏହି ବିଳମ୍ବ ହୋଇଥିଲା।
