ଚିଟାଗଙ୍ଗ,୬।୯- ସ୍ଥାନୀୟ ଜାହୁର ଅହମ୍ମଦ ଚୌଧାରୀ ଷ୍ଟାଡିୟମରେ ଚାଲିଥିବା ବାଂଲାଦେଶ ବିପକ୍ଷ ଏକମାତ୍ର ଟେଷ୍ଟ ମ୍ୟାଚ୍ରେ ଆଫଗାନିସ୍ତାନ ଦଳ ଦୃଢ଼ ସ୍ଥିତିରେ ରହିଛି। ପ୍ରଥମ ଇନିଂସରେ ଆଫଗାନିସ୍ତାନ ୩୪୨ ରନ୍ କରିଥିବାବେଳେ ବାଂଲାଦେଶ ୮ ଉଇକେଟ ହରାଇ ୧୯୪ ରନ୍ କରିଛି। ଘରୋଇ ଦଳକୁ ଇନିଂସ ଅଗ୍ରଣୀ ପାଇଁ ବଳକା ଦୁଇ ଉଇକେଟରେ ୧୪୮ ରନ୍ ଦରକାର।
ଆଫଗାନିସ୍ତାନ ଦଳ ତା’ର ଅସମାପ୍ତ ପ୍ରଥମ ଇନିଂସ ସ୍କୋର ୫/୨୭୧ରୁ ଆରମ୍ଭ କରି ୭୧ ରନ୍ ମଧ୍ୟରେ ଅବଶିଷ୍ଟ ୫ ଉଇକେଟ ହରାଇଥିଲା। ୮୮ ରନ୍ କରି ଅପରାଜିତ ଥିବା ଅସଘର ଆଫଗାନ ବ୍ୟକ୍ତିଗତ ସ୍କୋରରେ ୪ ରନ୍ ଯୋଡ଼ିବାକୁ ସକ୍ଷମ ହୋଇଥିଲେ। ୯୨ ରନ୍ କରି ଆଫଗାନ ପ୍ୟାଭେଲିଅନ ଫେରିଥିଲେ। ଅଫସର ଜଜାଇ ୪୧ ଓ ଅଧିନାୟକ ରସିଦ ଖାନ୍ ୫୧ ରନ୍ର ଇନିଂସ ବଳରେ ଆଫଗାନିସ୍ତାନ ୩୪୨ ରନ୍ କରିପାରିଥିଲା। ଏହାପରେ ଇନିଂସ ଆରମ୍ଭ କରିଥିବା ଘରୋଇ ଦଳ ବ୍ୟାଟିଂ ଆରମ୍ଭରୁ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ଫଳରେ ଦ୍ୱିତୀୟ ଦିବସ ଶେଷ ପର୍ଯ୍ୟନ୍ତ ବ୍ୟାଟିଂ କରି ୮ ଉଇକେଟ ବିନିମୟରେ ୧୯୪ ରନ୍ କରିବାକୁ ସକ୍ଷମ ହୋଇଛି। ଦଳ ପାଇଁ ମୋମିନୁଲ ହକ୍ ୫୨ ଓ ଲିଟନ ଦାସ ୪୪ ରନ୍ କରିଥିଲେ। ଷ୍ଟମ୍ପ ଅପସାରଣ ବେଳକୁ ମୋସଦ୍ଦାକ ହୋସେନ ୪୪ ଓ ତାଇଜୁଲ ଇସଲାମ ୧୪ ରନ୍ କରି ଅପରାଜିତ ଅଛନ୍ତି। ଭ୍ରମଣକାରୀ ବାଂଲାଦେଶ ଦଳ ପାଇଁ ଅଧିନାୟକ ରସିଦ ୪ ଓ ମହମ୍ମଦ ନବି ୨ ଉଇକେଟ ନେଇଛନ୍ତି।
