ଛେଣ୍ଡିପଦା,୧୪ା୪(ସ୍ବ.ପ୍ର.)- ଅନୁଗୋଳ ଜିଲା ଜରପଡା ଓ ଅନୁଗୋଳ ବନାଞ୍ଚଳର ସୀମାନ୍ତ ରେଞ୍ଜ ଅଞ୍ଚଳରେ ଅସୁସ୍ଥ ହୋଇ ବୁଲୁଥିବା ଏକ ମାଈ ହାତୀକୁ ସୋମବାର ବନ ବିଭାଗ ପକ୍ଷରୁ ଛୋଟକୋଇଲି ଜଙ୍ଗଲରେ ଟ୍ରାଙ୍କୁଲାଇଜ କରାଯାଇଛି। ଏହା ପରେ ହାତୀର ଚିକିତ୍ସା କରାଯାଇଛି । ହାତୀଟି ପ୍ରାୟ ୨ ସପ୍ତାହ ହେବ ଅନୁଗୋଳ, ଜରପଡା, ପୁରୁଣାଗଡ ବନାଞ୍ଚଳରେ ଅସୁସ୍ଥ ଅବସ୍ଥାରେ ଘୁରି ବୁଲୁଥିଲା । ଖବରପାଇ ବନ ବିଭାଗ ପକ୍ଷରୁ ହାତୀର ଗତିବିଧିକୁ ଲକ୍ଷ୍ୟ କରାଯାଇ ଛୋଟତେନ୍ତୁଳି ନିକଟରେ ଟ୍ରାଙ୍କୁଲାଇଜ କରାଯାଇଥିଲା। ଏଥି ସହ ସାତକୋଶିଆ ବନ୍ୟପ୍ରାଣୀ ଚିକିତ୍ସକଙ୍କ ଦ୍ବାରା ଏହାର ଚିକିତ୍ସା କରାଯାଇଛି ।ହାତୀର ବୟସ ୨୦/୨୫ ବର୍ଷ ହେବ ବୋଲି ଅନୁମାନ କରାଯାଉଛି। ଏହାର ପେଟ କିମ୍ବା ମଳଦ୍ୱାର ନିକଟରେ ସଂକ୍ରମଣ ହୋଇଥିବା ସନ୍ଦେହ କରାଯାଉଛି ବୋଲି ବନ ବିଭାଗ ଏସିଏଫ ବାସୁଦେବ ନାୟକ ପ୍ରକାଶ କରିଛନ୍ତି। ହାତୀଟି ସମ୍ପୂର୍ଣ୍ଣ ସୁସ୍ଥ ହେବା ପର୍ଯ୍ୟନ୍ତ ଏକ ଟିମ୍ ଏହା ଉପରେ ନଜର ରଖିଥିବା ବିଭାଗ ପକ୍ଷରୁ କୁହାଯାଇଛି।
