ଅନୁଗୋଳ ଅଫିସ, ୨୦।୬ – ଅନୁଗୋଳକୁ ସିଲାଇ ତାଲିମ ନେବାକୁ ଆସୁଥିବା ବେଳେ ଡେରଜାଙ୍ଗ ଗ୍ରାମର ସୁବାସ ବେହେରାଙ୍କ ସହ ପ୍ରେମ ସମ୍ପର୍କ ଆରମ୍ଭ ହୋଇଥିଲା। ପରେ ବିବାହ ପ୍ରତିଶ୍ରୁତି ଦେଇ ସୁବାସ ତାଙ୍କ ସହ ଶାରୀରିକ ସମ୍ପର୍କ ରଖିଥିଲେ। ଏବେ ସେ ୬ ମାସର ଗର୍ଭବତୀ। କିନ୍ତୁ ପ୍ରେମିକ ତାଙ୍କୁ ବିବାହ କରିବାକୁ ମନା କରିଦେବା ସହ ଫେରାର ହୋଇଯାଇଛନ୍ତି। ଏ ନେଇ ସେ ଜରପଡ଼ା ଥାନାରେ ଏତଲା ଦେଇଛନ୍ତି। କିନ୍ତୁ ପୋଲିସ ଅଭିଯୁକ୍ତଙ୍କୁ ଧରିବା ପରିବର୍ତ୍ତେ ଛାଡ଼ି ଦେଇଛି। ତେଣୁ ତାଙ୍କୁ ନ୍ୟାୟ ପ୍ରଦାନ କରାଯାଉ ବୋଲି ଜରପଡ଼ା ଥାନା ଅଞ୍ଚଳର ଜନୈକା ଯୁବତୀ ବୁଧବାର ଅନୁଗୋଳ ଏସ୍ପି ମିତ୍ରଭାନୁ ମହାପାତ୍ରଙ୍କ ନିକଟରେ ଅଭିଯୋଗ କରିଛନ୍ତି। ଏହି ସମୟରେ ସେ ଆତ୍ମାହୁତି ଦେବାକୁ ଏକ ବ୍ୟାଗରେ କିରୋସିନ ଆଣିଥିବା ଜଣାପଡ଼ିବା ପରେ ସେଠାରେ ଉପସ୍ଥିତ ପୋଲିସ ତାହାକୁ ଛଡ଼ାଇ ନେଇଥିଲେ।
ଅଭିଯୋଗରେ ଯୁବତୀଙ୍କ ବାପା ଦର୍ଶାଇଛନ୍ତି ଯେ, ଡେରେଜାଙ୍ଗର ସୁବାସ ତାଙ୍କ ଝିଅକୁ ବିବାହ ପ୍ରତିଶ୍ରୁତି ଦେଇ ଶାରୀରିକ ସମ୍ପର୍କ ରଖିଥିଲେ। ଝିଅ ଗର୍ଭବତୀ ଥିବା ଜାଣିବା ପରେ ତାଙ୍କ ମା’ ଭାଙ୍ଗି ପଡ଼ିଥିଲେ। ଲୋକ ଲଜ୍ଜା ଭୟକୁ ନେଇ ଆତଙ୍କିତ ଥିବା ମା’ଙ୍କ ହୃଦଘାତରେ ମୃତ୍ୟୁ ହୋଇଯାଇଥିଲା। ଏବେ ଝିଅ ମଧ୍ୟ ଆତ୍ମାହୁତି ଦେବ ବୋଲି କହୁଛି। ଜରପଡ଼ା ଥାନାରେ ଅଭିଯୁକ୍ତ ପ୍ରେମିକ ସୁବାସଙ୍କ ବିରୋଧରେ ଲିଖିତ ଅଭିଯୋଗ କରାଯାଇଥିଲା। କିନ୍ତୁ ପୋଲିସ ଅଦ୍ୟାବଧି କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁନାହିଁ। ଅଭିଯୁକ୍ତ ସୁବାସଙ୍କୁ ଧରି ଥାନାକୁ ଆଣିଥିଲେ ହେଁ ସଲାସୁତୁରା କରି ପୋଲିସ ଛାଡ଼ି ଦେଇଥିବା ଯୁବତୀଙ୍କ ବାପା ଅଭିଯୋଗ କରିଛନ୍ତି। ଏ ନେଇ ଜରପଡ଼ା ଥାନା ଅଧିକାରୀ ବିନ୍ଦୁବାସିନୀ ବିଶ୍ୱାଳ କହିଛନ୍ତି, ଅଭିଯୋଗ ଉପରେ ନଂ.୧୨୮/୧୯ରେ ମାମଲା ରୁଜୁ ହୋଇଛି। ଯୁବତୀଙ୍କ ପରିବାର ଲୋକମାନେ କରିଥିବା ଅଭିଯୋଗରେ କୌଣସି ସତ୍ୟତା ନାହିଁ। ଅଭିଯୁକ୍ତଙ୍କୁ ଧରିବା ପାଇଁ ବିଭିନ୍ନ ସ୍ଥାନରେ ଚଢ଼ାଉ କରାଯାଇଛି। ଯୁବତୀ ଜଣକ ବ୍ୟସ୍ତ ନ ହୋଇ କିଛି ଦିନ ଅପେକ୍ଷା କରନ୍ତୁ ବୋଲି ଥାନା ଅଧିକାରୀ ପ୍ରକାଶ କରିଛନ୍ତି।
