ନୋଇଡ଼ା,୨ା୭: ଉତ୍ତରପ୍ରଦେଶର ନୋଇଡ଼ାରେ ଥିବା ସ୍ପା ସେଣ୍ଟର ଉପରେ ପୋଲିସ ଚଢାଉ କରି ୩୫ ଜଣଙ୍କୁ ଗିରଫ କରିଛି। ସେମାନଙ୍କ ମଧ୍ୟରେ ୮ ବିଦେଶିନୀଙ୍କୁ ମିଶାଇ ୨୫ ମହିଳା ଅଛନ୍ତି। ବିଦେଶିନୀମାନେ ଥାଇଲାଣ୍ଡର ବୋଲି ଜଣାପଡ଼ିଛି। ଗିରଫ ୧୦ ପୁରୁଷଙ୍କ ମଧ୍ୟରେ ଗ୍ରାହକଙ୍କ ସହ ସ୍ପା ମ୍ୟାନେଜର ଓ ସୁପରଭାଇଜର ସାମିଲ ଅଛନ୍ତି। ଦୀର୍ଘଦିନ ଧରି ଏଠାରେ ଦେହ ବ୍ୟବସାୟ ଚାଲିଆସୁଥିବା ପୋଲିସ କହିଛି।
ଦେହ ବ୍ୟବସାୟ ଚାଲିଥିବା ଖବର ପାଇ ରବିବାର ରାତିରେ ପୋଲିସ ଯୋଜନାବଦ୍ଧ ଭାବେ ଏକକାଳିନ ସେକ୍ଟର-୧୮ସ୍ଥିତ କମର୍ସିଆଲ ହବ୍ର ୧୪ଟି ସ୍ପା ସେଣ୍ଟର ଉପରେ ଚଢାଉ କରିଥିଲା। ଏସ୍ଏସ୍ପି ବୈଭବ କ୍ରିଷ୍ଣାଙ୍କ ନିର୍ଦ୍ଦେଶରେ ମଧ୍ୟରାତ୍ର ପର୍ଯ୍ୟନ୍ତ ଏହି ଚଢାଉ କରାଯାଇଥିଲା। ୧୪ ପୋଲିସ ଟିମ୍ ସହ ୭ ସର୍କଲ ଅଫିସର, ୮ ଷ୍ଟେଶନ ହାଉସ୍ ଅଫିସର, ୩୦ ଏସ୍ଆଇ ଓ କନେଷ୍ଟବଲ ଏହି ଚଢାଉରେ ସାମିଲ ଥିଲେ। ଚଢାଉ ବେଳେ ସ୍ପା ସେଣ୍ଟର୍ରୁ ଲକ୍ଷାଧିକ ଟଙ୍କା, କଣ୍ଡୋମ୍, ବିୟର ଓ ଅନ୍ୟ କେତେକ ଆପତ୍ତିଜନକ ଦ୍ରବ୍ୟ ମିଳିଥିବା ଗୌତମ ବୁଦ୍ଧ ନଗର ଏସ୍ପି (ରୁରାଲ୍) ଭିନୀତ୍ ଜୈଶଓ୍ବାଲ ପ୍ରକାଶ କରିଛନ୍ତି। ମୋଟ ୧୪ଟି ସ୍ପା ସେଣ୍ଟର୍କୁ ସିଲ୍ କରାଯାଇଥିବାବେଳେ ୩ଟିରେ ବେଧଡ଼କ ଦେହ ବ୍ୟବସାୟ ଚାଲୁଥିଲା ବୋଲି ଜଣାପଡ଼ିଛି। ସ୍ପା ସେଣ୍ଟର୍ ଓ ମାଲିକଙ୍କ ବିରୋଧରେ ପୋଲିସ ମାମଲା ରୁଜୁକରି ତଦନ୍ତ ଜାରିରଖିଥିବା ପ୍ରକାଶ।
