ନୂଆଦିଲ୍ଲୀ, ୬।୬: କରୋନା ସଂକ୍ରମଣ ଯୋଗୁ ଦେଶରେ ଆତଙ୍କ ଦେଖାଦେଇଛି। ଏପରିସ୍ଥଳେ ଜଣେ ମାଲିକ ନିଜ ଗୃହପାଳିତ ପ୍ରାଣୀଙ୍କୁ ଦିଲ୍ଲୀରୁ ମୁମ୍ବାଇ ଆଣିବା ଲାଗି ୯ ଲକ୍ଷ ୬୦ ହଜାର ଟଙ୍କାର ଏକ ବିମାନ ବୁକ୍ କରିଛନ୍ତି। ଜୁନ୍ ଦ୍ୱିତୀୟ ସପ୍ତାହରେ ଉଡ଼ାଣ କରିବ। ୨୫ ବର୍ଷ ବୟସ୍କା ଦୀପିକା ସିଂ ଦିଲ୍ଲୀରେ ଥିବା ତାଙ୍କ ଗୃହପାଳିତ ପ୍ରାଣୀଙ୍କୁ ମୁମ୍ବାଇ ଆଣିବା ଲାଗି ବିମାନର ୬ଟି ସିଟ୍କୁ ଲକ୍ଷେ ୬୦ ହଜାର ଟଙ୍କା ଲେଖାଏଁ ଦେଇ ବୁକ୍ କରିଛନ୍ତି। ଦୀପିକା ସାଇବର ସିକ୍ୟୁରିଟି ରିସର୍ଚ୍ଚର ଭାବେ କାମ କରିଥାନ୍ତି। ଏହି ବିମାନଟି କୁକୁର, ବିଲେଇ, ପକ୍ଷୀ ଆଦିଙ୍କ ନେବା କାମରେ ବ୍ୟବହୃତ ହୋଇଥାଏ। ଏନେଇ ଏକ୍ରିଶନ ଆଭିଏଶନ୍ର ମାଲିକ ରାହୁଲ ମୁଚ୍ଛଲ କହିଛନ୍ତି ଯେ, କରୋନା ମହାମାରୀ ସଙ୍କଟ ସମୟରେ ଗୃହପାଳିତ ପ୍ରାଣୀଙ୍କୁ ସୁରକ୍ଷିତ ଭାବେ ନେବା ଆଣିବା ଲାଗି ବିମାନକୁ ବ୍ୟବହାର କରାଯାଉଛି। ବିମାନରେ ପ୍ରବେଶ ପୂର୍ବରୁ ପ୍ରାଣୀଙ୍କ ପରୀକ୍ଷା କରାଯିବ ଏବଂ ସେମାନଙ୍କୁ ପିଞ୍ଜରାରେ ଭର୍ତ୍ତି କରାଯିବାର ବ୍ୟବସ୍ଥା କରାଯାଇଛି।
