ମୁମ୍ବାଇ,୧୯।୬: ଏଟିଏମ୍ରୁ ଏକାଥରକେ ୫ହଜାର ଟଙ୍କାରୁ ଉର୍ଦ୍ଧ୍ୱ ଉଠାଣ ଉପରେ ଗ୍ରାହକଙ୍କୁ ଚାର୍ଜ ଲାଗିପାରେ। ଏହି ପ୍ରସଙ୍ଗ ଉପରେ ବର୍ତ୍ତମାନ ରିଜର୍ଭ ବ୍ୟାଙ୍କ ବିଚାରବିମର୍ଷ କରୁଛି। ଆର୍ଟିଆଇରେ ମଗାଯାଇଥିବା ସୂଚନାରୁ ଏଭଳି ତଥ୍ୟ ସାମ୍ନାକୁ ଆସିଛି। ଡିଜିଟାଲ ନେଣଦେଣକୁ ଉତ୍ସାହିତ କରିବା ଏବଂ ନଗଦ କାରବାରକୁ କମ୍ କରିବା ଲାଗି କେନ୍ଦ୍ରୀୟ ବ୍ୟାଙ୍କ ଏଭଳି ଏକ ଦିଗ ଉପରେ ଧ୍ୟାନ ରଖିଛି। ଇଣ୍ଡିଆନ୍ ବ୍ୟାଙ୍କ ଆସୋସିଏଶନର ଚିଫ ଏକଜିକ୍ୟୁଟିଭ୍ ଭି.ଜି. କନ୍ନନଙ୍କ ଅଧ୍ୟକ୍ଷତାରେ ଗଠିତ କମିଟି କେନ୍ଦ୍ରୀୟ ବ୍ୟାଙ୍କକୁ ଏ ସମ୍ପର୍କରେ ଏକ ରିପୋର୍ଟ ପ୍ରଦାନ କରିଛି। ଅକ୍ଟୋବର ୨୨ରେ କେନ୍ଦ୍ରୀୟ ବ୍ୟାଙ୍କ ଏହି ରିପୋର୍ଟ ଲାଭ କରିଥିଲା। ଏହି ରିପୋର୍ଟକୁ ବର୍ତ୍ତମାନ ସାର୍ବଜନୀନ କରାଯାଇ ନାହିଁ। ଆର୍ଟିଆଇ କର୍ମୀ ଶ୍ରୀକାନ୍ତ ଏଲ୍ଙ୍କ ଏହି ସଂକ୍ରାନ୍ତୀୟ ଆବେଦନକୁ ଆର୍ବିଆଇର ପବ୍ଲିକ ଇନଫରମେଶନ ଅଫିସର ପୂର୍ବରୁ ଖାରଜ କରି ଦେଇଥିଲେ। ରିଜର୍ଭ ବ୍ୟାଙ୍କର ରେସପନ୍ସ ବିରୋଧରେ ଶ୍ରୀକାନ୍ତ ପୁଣି ଥରେ ଆବେଦନ କରିବା ପରେ ଏହି ତଥ୍ୟ ତାଙ୍କୁ ମିଳିଥିଲା। ସେ ଏହି ରିପୋର୍ଟକୁ ଲୋକଲୋଚନକୁ ଆଣିଛନ୍ତି। ବର୍ତ୍ତମାନ ଏଟିଏମ୍ ପରିଚାଳନା ଖର୍ଚ୍ଚ ବହୁଳ ଭାବେ ବଢିଛି। ୨୦୦୮ ଏବଂ ୨୦୧୨ ମଧ୍ୟରେ ଏହି ଖର୍ଚ୍ଚର ସମୀକ୍ଷା କରାଯାଇ ନାହିଁ। ଏଭଳି ବିଭିନ୍ନ ପ୍ରସଙ୍ଗ ଉକ୍ତ ରିପୋର୍ଟରେ ସାମିଲ ହୋଇଛି।
