ଖଡିଆଳ,୩୦।୯(ଡି.ଏନ.ଏ.) ନୂଆପଡା ଜିଲା ଖଡିଆଳ ପୋଲିସ ୫ଜଣ ଆନ୍ତଃଜିଲା ଡକାୟତଙ୍କୁ ଗିରଫ କରିଛି । ଏଥିସହ ସେମାନଙ୍କଠାରୁ ୪୨୧୧ ଟଙ୍କା ସମେତ ୬ଟି ମୋବାଇଲ ଫୋନ ଓ ୩ଟି ମୋଟରସାଇକେଲକୁ ଜବତ କରିଛି। ଗିରଫ ଡକାୟତମାନେ ହେଲେ ଡକାୟତ ଗ୍ରୁପର ମୁଖ୍ୟ ଖଡିଆଳ ନିନାପଡାର ମନୋରଞ୍ଜନ ସରାଫ, ବଲାଙ୍ଗୀର ଜିଲା ତୁରେକେଲା ଅଞ୍ଚଳର ଲୋକନାଥ ଶଗରିଆ ଓ ନିରଞ୍ଜନ ଖୁରା, କୋମନା ଥାନା ଅନ୍ତର୍ଗତ ଚାନ୍ଦୋପଲା ଗାଁର ତ୍ରିଲୋଚନ ଶବର ଓ ବିଘ୍ନରାଜ ଶବର । ଗତ ୨୩ ତାରିଖ ସନ୍ଧ୍ୟା ପ୍ରାୟ ୮ଟାରେ ଖଡିଆଳ ଥାନା ଅନ୍ତର୍ଗତ ଝୋଲପଥର ଗ୍ରାମର କପଡା ବ୍ୟବସାୟୀ କୋଶଳ ମେହେର ଓ ତାଙ୍କ ଦୁଇ ସାଥି ମକରଧ୍ୱଜ ମେହେର ଓ ଦାଶରଥି ତାଣ୍ଡି ଏକ ମୋଟରସାଇକେଲରେ ସାନମହେଶ୍ୱରରୁ ଝୋଲପଥର ଗାଁକୁ ଫେରୁଥିଲେ । ବାଟରେ ଏକ ପାହାଡ ନିକଟରେ ଦୁଇଟି ମୋଟରସାଇକେଲରେ ୬ଜଣ ଅଜଣା ବ୍ୟକ୍ତି ଆସି ବଳପୂର୍ବକ ଅଟକାଇ ଥିଲେ । ପରେ ସେମାନେ ଅତର୍କିତ ଭାବେ ଲାଠିରେ ଆକ୍ରମଣ କରି କୋଶଳ ମେହେରଙ୍କଠାରୁ ୧୩ ହଜାର ଟଙ୍କା ସହ ଗୋଟିଏ ମୋବାଇଲ ଫୋନ ଓ ତାଙ୍କ ସାଥି ଦାଶରଥିଙ୍କଠାରୁ ୨୦୪୦ ଟଙ୍କା ଲୁଟି ନେଇ ଫେରାର ହୋଇଯାଇଥିଲେ। ଡକାୟତଙ୍କ ଆକ୍ରମଣରେ କୋଶଳ ମେହେରଙ୍କ ମୁଣ୍ଡ ଫାଟିଯିବାରୁ ତାଙ୍କ ସାଥି ମକରଧ୍ୱଜ ଖଡିଆଳ ମିଶନ ହସ୍ପିଟାଲରେ ଭର୍ତ୍ତି କରିଥିଲେ। ଏ ନେଇ ଖଡିଆଳ ଥାନାରେ ମକରଧ୍ୱଜ ଲିଖିତ ଅଭିଯୋଗ କରିଥିଲେ। ନୂଆପଡା ଏସପିଙ୍କ ନିର୍ଦ୍ଦେଶକ୍ରମେ ଖଡିଆଳ ଥାନା ଏକ ସ୍ବତନ୍ତ୍ର ପୋଲିସ ଟିମ ରାଜ୍ୟର ବିଭିନ୍ନ ସ୍ଥାନରେ ଚଢ଼ାଉ କରି ଏହି ଘଟଣାରେ ସମ୍ପୃକ୍ତ ୫ଜଣ ଡକାୟତଙ୍କୁ ଖଡିଆଳ ପୋଲିସ ଗିରଫ କରିଛି । ଖଡିଆଳ ଥାନା ଏସଡିପିଓ ଖବରଦାତା ସମ୍ମିଳନୀରେ ଏହି ସୂଚନା ଦେଇଛନ୍ତି । ଖଡିଆଳ ଆଇଆଇସି କୌଳାଶ ଚନ୍ଦ୍ର ସେଠୀଙ୍କ ନେତୃତ୍ୱରେ ସବଇନ୍ସପେକ୍ଟର ଜିତୁ ମୋହନ ବେଶ୍ରା ତଦନ୍ତ ଭାର ନେଇ ଗିରଫ କରିଥିବା ଖଡିଆଳ ଏସଡିପିଓ ବିରଞ୍ଚତ୍ନାରାୟଣ ଦେହୁରୀ କହିଛନ୍ତି ।
