ନୂଆଦିଲ୍ଲୀ,୨୦-୭: ମୋଦି ସରକାର ଦେଶର ଅର୍ଥନୀତିକୁ ୨୦୨୪-୨୫ ସୁଦ୍ଧା ୫ ଲକ୍ଷ କୋଟି ଡଲାରରେ ପହଞ୍ଚାଇବାର ଲକ୍ଷ୍ୟ ରଖିଛନ୍ତି। ଏହା ଉପରେ ପୂର୍ବତନ ରାଷ୍ଟ୍ରପତି ତଥା ବିଶିଷ୍ଟ ଅର୍ଥନୀତିଜ୍ଞ ପ୍ରଣବ ମୁଖାର୍ଜୀ ନିଜର ପ୍ରତିକ୍ରିୟା ପ୍ରକାଶ କରି ମୋଦି ସରକାରଙ୍କୁ କଟାକ୍ଷ କରିଛନ୍ତି। ଯୋଜନା ଆୟୋଗକୁ ଭାଙ୍ଗି ଦେଇଥିବା ସରକାର ମନେ ରଖିବା ଉଚିତ୍ ଯେ, ଯୋଜନାବଦ୍ଧ ଅର୍ଥନୀତି ପ୍ରତି ଭରସା ଥିବା ସରକାର ହିଁ ଆଧୁନିକ ଭାରତର ମୂଳଦୁଆ ପକାଇଥିଲେ। ଆଜିକାଲି ତାହା ଦେଖାଯାଉନାହିଁ। ୫ଲକ୍ଷ କୋଟି ଡଲାର ଅର୍ଥନୀତି ଆଡକୁ ଭାରତ ଅଗ୍ରସର ହେଉଛି ବୋଲି ଯେଉଁମାନେ କହୁଛନ୍ତି, ସେମାନେ ଜାଣନ୍ତୁ ଯେ, ସ୍ବାଧୀନତା ପରେ କଂଗ୍ରେସ ସରକାର ଦ୍ୱାରା ଏହାର ଦୃଢ଼ ଭିତ୍ତି ସ୍ଥାପନ କରାଯାଇଥିଲା। ସ୍ଥାନୀୟ ମାଓ୍ବଲକର ହଲ୍ସ୍ଥିତ କନଷ୍ଟିଚ୍ୟୁଶନ କ୍ଲବ ଅଫ୍ ଇଣ୍ଡିଆରେ ଆୟୋଜିତ ଏକ କାର୍ଯ୍ୟକ୍ରମରେ ଯୋଗ ଦେଇ ପ୍ରଣବ କହିଛନ୍ତି ଯେ, ଯେଉଁ ଲୋକମାନେ ୫୫ ବର୍ଷର କଂଗ୍ରେସ ଶାସନକୁ ସମାଲୋଚନା କରୁଛନ୍ତି, ସେମାନେ ଭୁଲିଯାଉଛନ୍ତି ଯେ, ଦେଶ ସ୍ବାଧୀନ ବେଳେ ଭାରତ କେଉଁଠି ଥିଲା ଏବଂ ଆମେ ଏବେ କେଉଁଠି ପହଞ୍ଚତ୍ଛୁ। ଅଣ କଂଗ୍ରେସ ଶାସନର ମଧ୍ୟ ଦୃଢ଼ ଅର୍ଥନୀତିରେ ଯୋଗଦାନ ଥିଲା। ତେବେ ଯେଉଁମାନେ ୫୫ ବର୍ଷର କଂଗ୍ରେସ ଶାସନକୁ ସମାଲୋଚନା କରୁଛନ୍ତି, ସେମାନେ ଆମେ କେଉଁଠୁ ଆରମ୍ଭ କରିଥିଲୁ ଓ କେଉଁଠି ଛାଡିଲୁ। ଭାରତର ଅର୍ଥନୀତି ଯଦି ଏବେ ୫ ଲକ୍ଷ କୋଟି ଡଲାରରେ ପହଞ୍ଚତ୍ବାକୁ ଯାଉଛି। କଂଗ୍ରେସ ସରକାର ଦେଶର ଅର୍ଥନୀତିକୁ ୧.୮ ଲକ୍ଷ କୋଟି ଡଲାରରେ ପହଞ୍ଚାଇ ଶାସନ ଛାଡ଼ିଛି। ପ୍ରାୟ ଶୂନ୍ୟରୁ ଅର୍ଥନୀତିକୁ ଏହି ସ୍ଥାନରେ ପହଞ୍ଚାଇପାରିଛି କଂଗ୍ରେସ ସରକାର। ଭାରତର ଭବିଷ୍ୟତର ଅର୍ଥନୀତିର ଭିତ୍ତିଭୂମି ପୂର୍ବତନ ପ୍ରଧାନମନ୍ତ୍ରୀ ଜବାହରଲାଲ ନେହେରୁ, ଡ.ମନମୋହନ ସିଂ ଏବଂ ପି.ଭି.ନରସିଂହ ରାଓଙ୍କ ସରକାର ଯୋଗୁ ସମ୍ଭବ ହୋଇପାରିଛି। ପୂର୍ବତନ ରାଷ୍ଟ୍ରପତି ମୁଖାର୍ଜୀ କହିଛନ୍ତି ଯେ, ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ବଜେଟ ଭାଷଣ ବେଳେ ୫ ଲକ୍ଷ କୋଟି ଡଲାର ଅର୍ଥନୀତି ସମ୍ପର୍କରେ ଉଲ୍ଲେଖ କରିଥିଲେ। ଏହା ଆକାଶରୁ ଉଡ଼ି ଆସିବନି। ଏଥିଲାଗି ଆବଶ୍ୟକ ଦୃଢ଼ ଭିତ୍ତିଭୂମି ରହିଛି। ଏହାକୁ ବ୍ରିଟିଶମାନେ ନୁହେଁ ଦେଶ ସ୍ବାଧୀନ ପରେ ଭାରତୀୟମାନେ ହିଁ ତିଆରି କରିଛନ୍ତି। ସେ କହିଛନ୍ତି ଯେ, ଭାରତର ଅର୍ଥନୀତି ଏବେ ଦ୍ରୁତଗତିରେ ଆଗେଇ ଚାଲିଛି। ନେହେରୁ ତଥା ଅନ୍ୟମାନେ ଦେଶରେ ଆଇଆଇଟି,ଇସ୍ରୋ, ଆଇଆଇଏମ୍, ବ୍ୟାଙ୍କିଙ୍ଗ ନେଟ୍ଓ୍ବାର୍କ ଆଦି ସ୍ଥାପନ କରିବା ଯୋଗୁ ଏହା ସମ୍ଭବ ହୋଇପାରିଛି। ଡ.ମନମୋହନ ସିଂ ଏବଂ ନରସିଂହା ରାଓଙ୍କ ଅର୍ଥନୀତିର ଉଦାରୀକରଣ କରିବା ଯୋଗୁ ଏହାକୁ ସହାୟତା ମିଳିଥିଲା। ଯାହା ଦ୍ୱାରା ଭାରତର ଅର୍ଥନୀତି ଅଭିବୃଦ୍ଧି ସମ୍ଭାବନା ବଢ଼ିଛି। ଏହାକୁ ଭିତ୍ତି କରି ଅର୍ଥମନ୍ତ୍ରୀ ଆଜି ଉକ୍ତ ଦାବି କରୁଛନ୍ତି।
