ମାଲକାନଗିରି, ୪।୮ (ଡି.ଏନ୍.ଏ.): ଛତିଶଗଡ଼ର ରାଜନନ୍ଦଗାଁଓ ଜିଲା ଅନ୍ତର୍ଗତ ସୀତାଗୋତା ଜଙ୍ଗଲରେ ଶନିବାର ଯବାନ ଓ ମାଓବାଦୀଙ୍କ ମଧ୍ୟରେ ଗୁଳି ବିନିମୟ ହୋଇଛି। ଏଥିରେ ୭ ମାଓବାଦୀ ନିହତ ହୋଇଛନ୍ତି। ଘଟଣାସ୍ଥଳରୁ ଯବାନମାନେ ୭ ମାଓବାଦୀଙ୍କ ମୃତଦେହ ସହ ଏକେ. ୪୭ ରାଇଫଲ, ୩୦୩ ରାଇଫଲ୍, ୧୨ ବୋର୍ ଗନ୍, ସିଙ୍ଗଲ୍ ସଟ୍ ରାଇଫଲ ଏବଂ ବିପୁଳ ପରିମାଣର ଗୁଳିଗୋଳା ଜବତ କରିଛନ୍ତି। ଗତ ୨୮ ତାରିଖରୁ ମାଓବାଦୀ ସଂଗଠନ ତରଫରୁ ଶହୀଦ ସପ୍ତାହ ପାଳନ ହେଉଥିଲାବେଳେ ଶେଷଦିନରେ ଛତିଶଗଡ଼ ସୁରକ୍ଷା କର୍ମୀଙ୍କୁ ବଡ଼ ସଫଳତା ମିଳିଛି।
ଜିଲା ରିଜର୍ଭ ଗାର୍ଡ (ଡିଆର୍ଜି) ଯବାନମାନେ ଶନିବାର ସକାଳେ ତଲାସି ଅଭିଯାନରେ ବାହାରିଥିଲାବେଳେ ଛତିଶଗଡ-ମହାରଷ୍ଟ୍ର ସୀମନ୍ତ ବଙ୍ଗାଡି ଥାନା ଅଧୀନ ସୀତାଗୋତା ଜଙ୍ଗଲରେ କେତେକ ମାଓବାଦୀ ଲୁଚି ରହିଥିବା ସୂଚନା ମିଳିଥିଲା। ସୂଚନା ଆଧାରରେ ଡିଆରଜି, ଛତିଶଗଡ ସଶସ୍ତ୍ର ବଳ ଏବଂ ଜିଲ୍ଲା ପୁଲିସ ସେଠାରେ ପହଞ୍ଚତ୍ ତଲାସି ଅଭିଯାନ ଆରମ୍ଭ କରିଥିଲେ ବୋଲି ଛତିଶଗଡ଼ ପୋଲିସ ମହାନିର୍ଦ୍ଦେଶକ ଡି.ଏମ୍. ଅଓ୍ବସ୍ତି କହିଛନ୍ତି। ପ୍ରବଳ ବର୍ଷା ସତ୍ତ୍ୱେ ଗୁଳି ବିନିମୟ ଜାରି ରହିଥିବା ଜଣାପଡିଛି। ଏକେ-୪୭ ରାଇଫଲ ଜବତ ହୋଇଥିବାରୁ କମାଣ୍ଡର କ୍ୟାଡରର ମାଓବାଦୀ ନିହତ ହୋଇଥିବା ଜଣାପଡିଛି। ତେବେ ତାଙ୍କ ପରିଚୟ ମିଳିନାହିଁ । ଏମ୍ଏମ୍ସି ମାଓବାଦୀ ଜୋନ୍ରେ ଛତିଶଗଡ଼ ପୋଲିସ ପାଇଁ ଏହା ଏକ ବଡ଼ ସଫଳତା ବୋଲି ଡିଜିପି କହିଛନ୍ତି।
ବସ୍ତର ଅଞ୍ଚଳରେ ବର୍ଷେ ହେଲା ମାଓବାଦୀ ଦମନ ଅଭିଯାନକୁ ଜୋରଦାର କରାଯାଇଥିବାରୁ ସେମାନେ ଏମ୍ଏମ୍ସି (ମହାରାଷ୍ଟ୍ର-ମଧ୍ୟପ୍ରଦେଶ-ଛତିଶଗଡ଼) ଜୋନ୍କୁ ପଳାଇଆସିଛନ୍ତି। ସେଥିପାଇଁ ଉକ୍ତ ଜୋନ୍ରେ ତଲାସି ଅଭିଯାନ ଆରମ୍ଭ ହୋଇଛି। ଏଠାରେ ବିସ୍ତାର ଦଳମ୍ ନାମରେ ମାଓବାଦୀ ସଂଗଠନ କାର୍ଯ୍ୟ କରୁଛି, ଯେଉଁଥିରେ ପାଖାପାଖି ୨୦୦ ସଶସ୍ତ୍ର କ୍ୟାଡର ରହିଛନ୍ତି। ସୂଚନାଯୋଗ୍ୟ, ଜୁଲାଇ ୨୭ରେ ଜଗଦଲପୁର ଜିଲା ଜଙ୍ଗଲ ମଧ୍ୟରେ ସୁରକ୍ଷା ବଳର ଏନ୍କାଉଣ୍ଟରରେ ୩ ମହିଳା କ୍ୟାଡରଙ୍କ ସମେତ ୭ ମାଓବାଦୀ ନିହତ ହୋଇଥିଲେ। ସେଠାରୁ ପୋଲିସ ଇନ୍ଶାସ୍ ରାଇଫଲ ସମେତ ୫ଟି ଅସ୍ତ୍ର ଜବତ କରିଥିଲା।
