ନୂଆଦିଲ୍ଲୀ,୮ା୧(ପି.ଟି.): କଂଗ୍ରେସ ଓ ଅନ୍ୟ ବିରୋଧୀ ଦଳର ନେତାମାନେ ଆଗାମୀ ୧୩ରେ ଦିଲ୍ଲୀରେ ଏକାଠି ହୋଇ ଜେଏନ୍ୟୁ ସ୍ଥିତି ଓ ସିଏଏ ବିରୋଧୀ ହିଂସାକାଣ୍ଡ ସମ୍ପର୍କରେ ଆଲୋଚନା କରିବେ। ବୈଠକରେ ଏନେଇ ପରବର୍ତ୍ତୀ ନିଷ୍ପତ୍ତି ନିଆଯିବାର ସମ୍ଭାବନା ରହିଛି। ବୈଠକରେ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ, ଟିଏମ୍ସି ନେତ୍ରୀ ମମତା ବାନାର୍ଜୀ, ଡିଏମ୍କେ ମୁଖ୍ୟ ଏମ୍.କେ. ଷ୍ଟାଲିନ୍, ବାମପନ୍ଥୀ ଓ ଆଞ୍ଚଳିକ ଦଳର ନେତାମାନେ ଯୋଗଦେବେ। ମିଳିଥିବା ସୂଚନା ଅନୁଯାୟୀ କଂଗ୍ରେସ ପକ୍ଷରୁ ବରିଷ୍ଠ ନେତାମାନଙ୍କର ବୈଠକ ଏନେଇ ସୋମବାରକୁ ଡ଼କାଯାଇଛି। ବିଭିନ୍ନ ବିଶ୍ୱବିଦ୍ୟାଳୟରେ ଦେଖାଦେଇଥିବା ହିଂସା ସମ୍ପର୍କରେ ଏଥିରେ ଆଲୋଚନା କରାଯିବ ବୋଲି ଜଣାପଡ଼ିଛି। ଗୁଲାମ୍ ନବୀ ଆଜାଦଙ୍କ ନେତୃତ୍ୱରେ କଂଗ୍ରେସର ପ୍ରାରମ୍ଭିକ ବୈଠକ ଶେଷ ହୋଇଥିବାବେଳେ ଯୁବ ଓ ଛାତ୍ର ନେତାଙ୍କ ସମର୍ଥନ ଲାଗି ବିରୋଧୀ ଦଳଗୁଡ଼ିକ ସଜବାଜ ହେଉଥିବା ଏଥିରୁ ସହଜେ ଅନୁମେୟ। ଦିଲ୍ଲୀ ବିଧାନସଭା ନିର୍ବାଚନ ପାଖେଇ ଆସୁଥିବାବେଳେ ଭାଜପା ବିରୋଧୀ ହାଓ୍ବାକୁ ବଳଦେବା ଲାଗି ଜୋର୍ଦାର ପ୍ରୟାସ କରାଯାଉଛି।
