ଭୁବନେଶ୍ୱର, ୪।୧୦(କ୍ରୀଡ଼ା ପ୍ରତିନିଧି)- ସପୋର୍ଟ ସ୍କୁଲ ସ୍ପୋଟର୍ସ ଫାଉଣ୍ଡେଶନ(ଏସଏସଏସଏଫ)ର ଦ୍ୱିତୀୟ କାର୍ଯ୍ୟକ୍ରମ ଗୁରୁବାର କ୍ୟାପିଟାଲ ହାଇସ୍କୁଲଠାରେ ଅନୁଷ୍ଠିତ ହୋଇଥିଲା। ଏଥିରେ ୬ରୁ ୧୨ ବର୍ଷ ମଧ୍ୟରେ ୫୦ ପିଲାଙ୍କର ୧୫ ପ୍ରକାର ଶାରୀରିକ ପରୀକ୍ଷା କରାଯାଇଥିଲା। ପିଲାଙ୍କ ବୟସ ଅନୁଶୀଳନ, ଫିଟ୍ନେସ ସ୍ତର ଏବଂ କ୍ରୀଡ଼ା ଦକ୍ଷତା ମପାଯିବା ଏହାର ଅନ୍ତର୍ଭୁକ୍ତ ଥିଲା। ”ଏସଏସଏସଏଫର ଏହା ଏକ ବିରଳ ପଦକ୍ଷେପ। ଏହା ପିଲାମାନଙ୍କର ଫିଟ୍ନେସ୍ ଏବଂ କ୍ରୀଡ଼ା ଦକ୍ଷତା ଅନୁମାନ କରିବା କ୍ଷେତ୍ରରେ ବିଶେଷ ସହାୟକ ହେବ“ ବୋଲି ସ୍କୁଲର ପ୍ରଧାନ ଶିକ୍ଷୟିତ୍ରୀ ସୋନାମିକା ରାୟ ପ୍ରକାଶ କରିଛନ୍ତି। ଫାଉଣ୍ଡେଶନର ମୁଖ୍ୟ ଡ. ମୁକ୍ତିପ୍ରସାଦ ଦାଶଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଅନୁଷ୍ଠିତ ଏହି କାର୍ଯ୍ୟକ୍ରମକୁ ଅମିତ କୁମାର ସାହୁ, ପ୍ରସାଦ ସାହୁ, ତାରାପ୍ରସାଦ ପରିଡ଼ା, ଦୀପ୍ତି ସୁନ୍ଦର ଦାଶ, ଅନିଲ ଜେନା, ଲକ୍ଷ୍ମୀଧର ମହାନ୍ତି, ସମୀର କୁମାର ସାହୁ ପରିଚାଳନା କରିଥିଲେ। ବିଶ୍ୱରଞ୍ଜନ ସାହୁ ଏହି ପ୍ରକଳ୍ପର ମାଷ୍ଟର ଟ୍ରେନର ଦାୟିତ୍ୱ ତୁଲାଉଛନ୍ତି। ପ୍ରକାଶ ଯୋଗ୍ୟ ଯେ, ଗତ ଅଗଷ୍ଟ ୨୯ରେ ଏପିଜେ ସ୍କୁଲରେ ଏସଏସଏସଏଫ କାର୍ଯ୍ୟକ୍ରମର ଶୁଭାରମ୍ଭ ହୋଇଥିଲା।
