ନୂଆଦିଲ୍ଲୀ, ୧୪।୬(ପି.ଟି.): ଆସନ୍ତା ଅକ୍ଟୋବରରେ ଭାରତରେ ବ୍ୟୟବହୁଳ ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ୍) ଆୟୋଜନ ସହଜ ନୁହେଁ ବୋଲି ଅନୁଭବ କରୁଛନ୍ତି କ୍ରିକେଟ କିମ୍ବଦନ୍ତୀ ସୁନୀଲ ଗାଭାସ୍କର। ଏହି ମାସରେ ଅଷ୍ଟ୍ରେଲିଆରେ ଟି୨୦ ବିଶ୍ୱକପ ହେବାର ଥିବାରୁ ଆଇପିଏଲକୁ ସେପ୍ଟେମ୍ବର ଆରମ୍ଭରେ ଆୟୋଜନ କରାଯାଇପାରେ ବୋଲି ସେ ମତ ଦେଇଛନ୍ତି। ସ୍ପୋର୍ଟିଂ ଇଭେଣ୍ଟ ଗୁଡ଼ିକରେ ୨୫ ପ୍ରତିଶତ ଦର୍ଶକଙ୍କୁ ଅନୁମତି ଦିଆଯାଇ ପାରିବ ବୋଲି ଅଷ୍ଟ୍ରେଲିଆ ସରକାର ଆନୁଷ୍ଠାନିକ ଘୋଷଣା କରିଛନ୍ତି। ତେଣୁ ଆଇପିଏଲ୍ ଅପେକ୍ଷା ଟି୨୦ ବିଶ୍ୱକପ ଆୟୋଜନ ସମ୍ଭାବନା ବଢ଼ିଛି।
”ଅଷ୍ଟ୍ରେଲିଆ ସରକାରଙ୍କ ଘୋଷଣାପରେ ଅକ୍ଟୋବରରେ ଟି୨୦ ବିଶ୍ୱକପ ଆୟୋଜନ ହୋଇପାରେ। ଏହା ହେଲେ ଅଂଶଗ୍ରହଣକାରୀ ଦଳଗୁଡ଼ିକ ୩ ସପ୍ତାହ ପୂର୍ବରୁ ଅଷ୍ଟ୍ରେଲିଆରେ ପହଞ୍ଚତ୍ବା ଆଶା କରାଯାଉଛି। ୧୪ ଦିନ କ୍ୱାରାଣ୍ଟାଇନ୍ ପରେ ୭ ଦିନ ଅଭ୍ୟାସ ମ୍ୟାଚ ଖେଳିବେ। ଯଦି ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ଟି୨୦ ବିଶ୍ୱକପ ହେଉ ବୋଲି ଚାହିଁବ ତେବେ ଆଇପିଏଲ୍ ଆୟୋଜନ କଷ୍ଟକର ହୋଇପଡ଼ିବ। କାରଣ ଟି୨୦ ବିଶ୍ୱକପ ବାତିଲ ହେଲେ ଯାଇ ଆଇପିଏଲ ସମ୍ଭବ ହୋଇପାରିବ“ ବୋଲି ଗାଭାସ୍କର କହିଛନ୍ତି।
ଆଇପିଏଲ୍ ଶ୍ରୀଲଙ୍କା କିମ୍ବା ୟୁଏଇରେ ସେପ୍ଟେମ୍ବରରେ କରାଇଲେ ସମସ୍ୟାର ସମାଧାନ ହୋଇପାରିବ ବୋଲି ସେ ଅନୁଭବ କରୁଛନ୍ତି। ”ମୌସୁମୀବାୟୁ ସକ୍ରିୟ ଥିବାଯୋଗୁ ସେପ୍ଟେମ୍ବରରେ ଭାରତରେ ଆଇପିଏଲ ସମ୍ଭବ ନୁହେଁ। ପ୍ରତି ଦଳ ପରସ୍ପରକୁ ୨ ଥର ବଦଳରେ ଥରେ ଲେଖାଏ ଭେଟବା କାର୍ଯ୍ୟସୂଚୀରେ ଏହାକୁ ସେପ୍ଟେମ୍ବର ପ୍ରାରମ୍ଭରେ ଶ୍ରୀଲଙ୍କାରେ ଆୟୋଜନ କରାଯାଇପାରେ“ ବୋଲି ଏହି ପୂର୍ବତନ ଅଧିନାୟକ ପ୍ରକାଶ କରିଛନ୍ତି। କୋଭିଡ-୧୯ ପରବର୍ତ୍ତୀ କ୍ରିକେଟ ଖେଳାଳିଙ୍କ ପାଇଁ ନୂଆ ଅଭିଜ୍ଞତା ଆଣିବ। ବିଶେଷ କରି ଦର୍ଶକଙ୍କ ବିନା ଖେଳିବା ନିଆରା ଅନୁଭୂତି ହେବ। ଅନେକ ସମୟରେ ଦର୍ଶକମାନେ ହିଁ ଖେଳରେ ରୋମାଞ୍ଚ ଭରିଥାନ୍ତି। ସେମାନଙ୍କ ଉପସ୍ଥିତିରେ ବାତାବରଣ ଭିନ୍ନ ଥାଏ। ସ୍ବାଭାବିକଭାବେ ଖେଳାଳିମାନେ ତାହାକୁ ମିସ୍ କରିବେ ବୋଲି ଏହି ପୂର୍ବତନ ଓପନର କହିଛନ୍ତି।
