କୋଲକାତା,୨୨।୧୧(ପି.ଟି.)- ଭାରତୀୟ ଉଇକେଟକିପର ରିଦ୍ଧିମାନ ଶାହା ଶୁକ୍ରବାର କ୍ରିକେଟର ଲମ୍ବା ଫର୍ମାଟରେ କ୍ୟାଚ୍ ଓ ଷ୍ଟମ୍ପିଂକୁ ମିଶାଇ ୧୦୦ ଉଇକେଟ ପୂରଣ କରିଛନ୍ତି। ଏହି ସଫଳତା ପାଇବାରେ ସେ ଦେଶର ୫ମ ଉଇକେଟକିପର। ଇଡେନ ଗାର୍ଡେନ୍ସଠାରେ ବାଂଲାଦେଶ ଓ ଭାରତ ମଧ୍ୟରେ ଚାଲିଥିବା ଦିବାରାତ୍ର ଟେଷ୍ଟ ଅବସରରେ ରିଦ୍ଧିମାନ ଏହି ମାଇଲଷ୍ଟୋନ ସ୍ପର୍ଶ କରିଛନ୍ତି। ୩୫ ବର୍ଷୀୟ ଶାହା ବାଂଲାଦେଶର ପ୍ରଥମ ଇନିଂସରେ ୨ କ୍ୟାଚ୍ ନେଇଥିଲେ। ପ୍ରଥମଟି ଉମେଶ ଯାଦବଙ୍କ ବଲରେ ଶାଦମାନ ଇସଲାମ (୨୯)ଙ୍କ କ୍ୟାଚ୍ ରିଦ୍ଧିମାନଙ୍କ ପାଇଁ ୧୦୦ତମ ଶିକାର ଥିଲା। ସେ ଏପର୍ଯ୍ୟନ୍ତ ଉଇକେଟ ପଛରେ ରହି ଟେଷ୍ଟରେ ୧୦୧ ବ୍ୟାଟ୍ସମ୍ୟାନଙ୍କୁ ଆଉଟ୍ କରିସାରିଛନ୍ତି। ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀଙ୍କ ନାମରେ ୨୯୪ ବ୍ୟାଟ୍ସମ୍ୟାନଙ୍କ ଉଇକେଟ ରହିଛି, ଯାହାକି ଦେଶରେ ସର୍ବାଧିକ। ତାଙ୍କ ବ୍ୟତୀତ ସଇଦ କିରିମାନି, କିରନ ମୋରେ ଓ ନୟନ ମୋଙ୍ଗିଆଙ୍କ ଭଳି ଉଇକେଟକିପର ଏହି ତାଲିକାରେ ରହିଛନ୍ତି।
