ଭୋପାଳ,୨।୭: ପାଠ ପଢିବା ପାଇଁ ଖାତା ବହି, ସିଲଟ, କଲମ ଅବା ପେନସିଲ୍ ଆବଶ୍ୟକ ହୋଇଥାଏ। ତେବେ ମଧ୍ୟପ୍ରଦେଶ ଖଣ୍ଡଓ୍ବା ଜିଲାରେ ଥିବା ଏକ ପ୍ରାଥମିକ ସ୍କୁଲରେ ରସଗୋଲାର ସ୍ବାଦ ଏବଂ ଆକାର ଦ୍ୱାରା ଛାତ୍ରୀମାନେ ପାଠ ପଢିବା ଆରମ୍ଭ କରୁଛନ୍ତି। ଜିଲା ମୁଖ୍ୟାଳୟ ଠାରୁ ପ୍ରାୟ ୬୦ କିଲୋମିଟର ଦୂରରେ ଥିବା ସରକାରୀ ବାଳିକା ବିଦ୍ୟାଳୟରେ ଏଭଳି ପାଠପଢା ହେଉଛି। ପ୍ରଧାନ ଶିକ୍ଷକ ରାଜେଶ ଚୌରେ ଛାତ୍ରୀମାନଙ୍କୁ ରସଗୋଲା ସହିତ ଅନ୍ୟ ମିଠା ବଣ୍ଟନ କରି ଏହାକୁ ଗଣିବାକୁ କହିଥାନ୍ତି। ଏହାର ଆକାର ସମ୍ପର୍କରେ ମଧ୍ୟ ଅନେକ ପ୍ରଶ୍ନ କରିଥାନ୍ତି। ଫଳରେ ଛାତ୍ରୀମାନେ ଖେଳ ମାଧ୍ୟମରେ ପାଠପଢା ସହଜରେ କରିପାରିଥାନ୍ତି। ଏଭଳି ପଦ୍ଧତି ଦ୍ୱାରା ଛାତ୍ରୀମାନଙ୍କର ବ୍ୟବହାରିକ ଜ୍ଞାନର ବିକାଶ ହୋଇପାରୁଥିବା ପ୍ରଧାନଶିକ୍ଷକ କହିଛନ୍ତି। ଏଠାରେ ପ୍ରଥମଠାରୁ ୫ମ ଶ୍ରେଣୀରେ ଅଧ୍ୟୟନ କରୁଥିବା ୧୬୦ ଜଣ ଛାତ୍ରୀଙ୍କୁ ଏହି ପଦ୍ଧତିରେ ପାଠପଢା ଯାଇଥାଏ। ନିଜ ଦରମା ଟଙ୍କା ଖର୍ଚ୍ଚ କରି ପ୍ରଧାନଶିକ୍ଷକ ଏଭଳି ପଦ୍ଧତିରେ ପାଠପଢା ଜାରି ରଖିଛନ୍ତି।
