ଅନୁଗୋଳ ଅଫିସ, ୨୯।୯ – ସରକାରୀ କାର୍ଯ୍ୟାଳୟ, ମେଡିକାଲରୁ ଦଲାଲଙ୍କୁ ହଟାଇବାକୁ ରାଜ୍ୟ ସରକାରଙ୍କ ନିର୍ଦ୍ଦେଶ ଓ ଅନୁଗୋଳ ପୋଲିସର ଘନ ଘନ ଚଢ଼ାଉ କାମ ଦେଇଛି। ଶୁକ୍ରବାର ୭ଜଣଙ୍କୁ ଗିରଫ କରାଯାଇଥିବାରୁ ଏବେ ଜିଲାର ବିଭିନ୍ନ ସରକାରୀ କାର୍ଯ୍ୟାଳୟ ଏପରିକି ଆରଟିଓ ଏବଂ ମେଡିକାଲ ପରିସରରୁ ଅନ୍ୟ ଦଲାଲମାନେ ଛୁ ମାରିଥିବା ଜୋରଦାର ଚର୍ଚ୍ଚା ହେଉଛି। ଶନିବାର ଜଣେ ହେଲେ ବି ଦଲାଲଙ୍କୁ ଗିରଫ କରାଯାଇ ନ ଥିବାରୁ ଏହି ଆଲୋଚନା ଏବେ ଜୋର୍ ଧରିଛି।
ପ୍ରକାଶ ଯେ, ଅନୁଗୋଳ ଜିଲା ମୁଖ୍ୟାଳୟଠାରୁ ଆରମ୍ଭ କରି ମୁଖ୍ୟ ଚିକିତ୍ସାଳୟ, ଆରଟିଓ କାର୍ଯ୍ୟାଳୟ ଆଦିରେ ଅନେକ ଦଲାଲ ଆଡ୍ଡା ଜମାଉଥିଲେ। ବିଭିନ୍ନ କାର୍ଯ୍ୟରେ ଏଠାକୁ ଆସୁଥିବା ଲୋକଙ୍କୁ ସେମାନେ ଶୋଷଣ କରୁଥିଲେ। ଏପରିକି କର୍ମଚାରୀଙ୍କ ପରି ଚେୟାର ଟେବୁଲ ପକାଇ ଫାଇଲ କାମ କରୁଥିଲେ। କିନ୍ତୁ ଶନିବାର ଏପରି କିଛି ଦେଖିବାକୁ ମିଳିନାହିଁ। ସକାଳେ ଆରଟିଓ କାର୍ଯ୍ୟାଳୟଠାରୁ ଆରମ୍ଭ କରି ମେଡିକାଲ ପର୍ଯ୍ୟନ୍ତ ବିଭିନ୍ନ କାର୍ଯ୍ୟାଳୟରେ ପୋଲିସ ପଇଁତରା ମାରିଥିଲା। ଏପରି କି ସାଦା ପୋଷାକରେ ମଧ୍ୟ ବିଭିନ୍ନ ସ୍ଥାନରେ ପୋଲିସ ମୁତୟନ ରହିଥିଲେ। କିଏ କ’ଣ କରୁଛି, କେଉଁମାନେ ମେଡିକାଲକୁ ଆସୁଥିବା ରୋଗୀଙ୍କ ସହ କଥା ହେଉଛନ୍ତି ସେମାନଙ୍କ ଉପରେ ନଜର ରଖାଯାଇଥିଲା। ସେହିପରି ଆରଟିଓ କାର୍ଯ୍ୟାଳୟରେ ମଧ୍ୟ ଦଲାଲ ସକ୍ରିୟ ରହିଛନ୍ତି କି ନାହିଁ ତାହା ଦେଖାଯାଉଥିଲା। ତେବେ ଏହି ଦୁଇ କାର୍ଯ୍ୟାଳୟରୁ କୌଣସି ଦଲାଲ ପୋଲିସ ହାତରେ ଧରାପଡ଼ି ନ ଥିଲେ। ଶୁକ୍ରବାର ପୋଲିସ ୭ ଜଣ ଦଲାଲଙ୍କୁ ଧରି କୋର୍ଟ ଚାଲାଣ କରିଥିବାରୁ ଅନ୍ୟ ଦଲାଲମାନେ ଏବେ ଜିଲାପାର ହୋଇ ଯାଇଥିବା ଚର୍ଚ୍ଚା ହେଉଛି। ଆଉ କେତେଜଣ ତାଙ୍କ କାର୍ଯ୍ୟ ଛାଡ଼ି ସୁରକ୍ଷିତ ସ୍ଥାନରେ ଯାଇ ଆତ୍ମଗୋପନ କରିଥିବା କୁହାଯାଉଛି। ଅପରପକ୍ଷରେ ମାସର ଚତୁର୍ଥ ଶନିବାର ବିଭିନ୍ନ କାର୍ଯ୍ୟାଳୟ ପ୍ରଥମାର୍ଦ୍ଧରେ ଖୋଲା ଥିଲେ ମଧ୍ୟ ଅନେକ ଅଧିକାରୀଙ୍କ ଦେଖା ନ ଥିଲା।
