ନୂଆଦିଲ୍ଲୀ,୮-୧: ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳଗୁଡିକର ପରବର୍ତ୍ତୀ ଇଜ ଅଫ୍ ଡୁଇଁ ବିଜନେସ ର଼୍ୟାଙ୍କିଙ୍ଗ ଆସନ୍ତା ମାର୍ଚ୍ଚରେ ଆସିବାର ସମ୍ଭାବନା ରହିଛି। ବାଣିଜ୍ୟ ଏବଂ ଉଦ୍ୟୋଗ ମନ୍ତ୍ରଣାଳୟ ପକ୍ଷରୁ ଏହି ସୂଚକାଙ୍କ ଜାରି କରାଯାଉଥିବା ବେଳେ ରାଜ୍ୟଗୁଡିକରେ ବାଣିଜ୍ୟ କରିବାର ସୁବିଧା ସୁଯୋଗ ସମ୍ପର୍କିତ ବିଭିନ୍ନ ପ୍ରସଙ୍ଗକୁ ଏଠାରେ ସାମିଲ କରାଯାଇଥାଏ ବୋଲି ପ୍ରକ୍ରିୟା ସହ ଜଡିତ ଜଣେ ଅଧିକାରୀ ମଙ୍ଗଳବାର ସୂଚନା ଦେଇଛନ୍ତି। ଅଧିକାରୀ ଜଣକ କହିଛନ୍ତି ଯେ, ଏହା ଫେବୃୟାରୀ ଶେଷ କିମ୍ବା ମାର୍ଚ୍ଚରେ ଆସିପାରେ। ବିଭିନ୍ନ ରାଜ୍ୟରେ ନିର୍ବାଚନ ଯୋଗୁ ଏହି ରିପୋଟ; ଜାରି କରିବା ବିଳମ୍ବ ହୋଇଥିବା ସେ ସ୍ପଷ୍ଟ କରିଛନ୍ତି। ଦେଶରେ ବାଣିଜି୍ୟକ ପରିବେଶକୁ ଉନ୍ନତ କରିବା ଏବଂ ରାଜ୍ୟ ସ୍ତରରେ ଏ ନେଇ ଏକ ପ୍ରତିଦ୍ୱନ୍ଦ୍ୱିତା ମନୋଭାବ ଆଣିବା ଦିଗରେ ପଦକ୍ଷେପ ଗ୍ରହଣ କରାଯାଉଛି। ରାଜ୍ୟଗୁଡିକ ଏଥିରେ ଉନ୍ନତି କରିଲେ ଘରୋଇ ତଥା ଜାତୀୟ ଏବଂ ଅନ୍ତର୍ଜାତୀୟ ସ୍ତରର ନିବେଶକଙ୍କୁ ଆକୃଷ୍ଟ କରିବା ସହଜ ହେବ ବୋଲି ଅଧିକାରୀ ମତ ଦେଇଛନ୍ତି।
ଇଜ ଅଫ୍ ଡୁଇଁ ବିଜନେସର ପ୍ରୋତ୍ସାହନ ଲାଗି ରାଜ୍ୟଗୁଡିକ ବିଭିନ୍ନ ପଦକ୍ଷେପ ନେଇଛନ୍ତି। ଏହା ମଧ୍ୟରେ ସିଙ୍ଗଲଓ୍ବିଣ୍ଡୋ ସିଷ୍ଟମ ମଞ୍ଜୁରୀ ବ୍ୟବସ୍ଥା ରହିଛି। ରାଜ୍ୟଗୁଡିକର ର଼୍ୟାଙ୍କ ପ୍ରସ୍ତୁତି ଲାଗି ନିର୍ମାଣ ଅନୁମତି, ଶ୍ରମ ଆଇନ, ପରିବେଶ ମଞ୍ଜୁରୀ, ସୂଚନା ଲାଭ, ଜମିର ଉପଲବ୍ଧତା, ସିଙ୍ଗଲ ଓ୍ବିଣ୍ଡୋ ସିଷ୍ଟମ ଭଳି ବିଭିନ୍ନ ସୁବିଧା ସାମିଲ ରହିଛି। ଡିମାର୍ଟମେଣ୍ଟ ଫର ପ୍ରମୋଶନ ଅଫ୍ ଇଣ୍ଡଷ୍ଟ୍ରି ଆଣ୍ଡ ଇଣ୍ଟରନାଲ ଟ୍ରେଡ(ଡିପିଆଇଆଇଟି) ଏବଂ ବିଶ୍ୱ ବ୍ୟାଙ୍କ ମିଳିତ ହୋଇ କେନ୍ଦ୍ର ଶାସିତ ଅଞ୍ଚଳ ଏବଂ ରାଜ୍ୟଗୁଡିକର ବାଣିଜ୍ୟ ସଂସ୍କାର ଧାରା ଜାରି ରଖିଛନ୍ତି। ଏ ଦିଗରେ ବିଜନେସ୍ ରିଫର୍ମ ଆକ୍ସନ ପ୍ଲାନ(ବିଆର୍ଏପି) କାର୍ଯ୍ୟଧାରା ଜାରି ହୋଇଛି। ଶେଷ ଥର ହୋଇଥିବା ର଼୍ୟାଙ୍କିଙ୍ଗ ଜୁଲାଇ ୨୦୧୮ରେ ପ୍ରକାଶ ପାଇଥିଲା। ଏଥିରେ ଆନ୍ଧ୍ର ପ୍ରଦେଶ ଶୀର୍ଷରେ ରହିଥିଲା। ଆନ୍ଧ୍ର ପ୍ରଦେଶ ଦ୍ୱିତୀୟ ଏବଂ ହରିୟାଣା ତୃତୀୟ ସ୍ଥାନରେ ଥିଲା। ଶୀର୍ଷ ୧୦ ରାଜ୍ୟ ମଧ୍ୟରେ ଯଥାକ୍ରମେ ଝାଡଖଣ୍ଡ(୪), ଗୁଜରାଟ(୫), ଛତିଶଗଡ(୬), ମଧ୍ୟ ପ୍ରଦେଶ(୭), କର୍ନାଟକ(୮), ରାଜସ୍ଥାନ(୯) ଏବଂ ପଶ୍ଚିମବଙ୍ଗ ୧୦ମ ସ୍ଥାନରେ ରହିଛି। ବିଶ୍ୱ ବ୍ୟାଙ୍କ ପକ୍ଷରୁ ପ୍ରକାଶିତ ଇଜ ଅଫ୍ ଡୁଇଁ ବିଜନେସ ରିପୋର୍ଟରେ ଭାରତ ୧୯୦ ଦେଶ ମଧ୍ୟରୁ ୬୩ତମ ସ୍ଥାନରେ ରହିଛି। ଏହି ଧାରାରେ ଉନ୍ନତି ଆଣିବା ଲାଗି ବାଣିଜ୍ୟ ମନ୍ତ୍ରଣାଳୟ ବିଭିନ୍ନ ଦିଗ ଉପରେ କାମ କରୁଛି। ଆସନ୍ତା ବର୍ଷରେ ଶୀର୍ଷ ୫୦ ଦେଶ ମଧ୍ୟକୁ ଆଣିବା ଲାଗି ସରକାର ବିଭିନ୍ନ ପଦକ୍ଷେପ ନେଉଛନ୍ତି।
