ସୁରତ, ୪।୧୦ (ପି.ଟି.)- ଭ୍ରମଣକାରୀ ଦକ୍ଷିଣ ଆଫ୍ରିକା ମହିଳା କ୍ରିକେଟ୍ ଦଳ ବିପକ୍ଷରେ ଗୁରୁବାର ଏଠାରେ ଖେଳାଯାଇଥିବା ୫ମ ଟି୨୦ ମ୍ୟାଚ୍କୁ ଭାରତ ୫ ଉଇକେଟ୍ରେ ଜିତିନେଇଛି। ଫଳରେ ୬ ମ୍ୟାଚ୍ବିଶିଷ୍ଟ ସିରିଜରେ ଘରୋଇ ଭାରତୀୟ ଦଳ ଏବେ ୩-୦ରେ ଅଗ୍ରଣୀ ଲାଭ କରିଛି। ପୂର୍ବରୁ ବର୍ଷା କାରଣରୁ ସିରିଜର୨ୟ ଓ ୩ୟ ମ୍ୟାଚ୍ ବାତିଲ ହୋଇଯାଇଥିଲା। ସିରିଜର ଅନ୍ତିମ ତଥା ୬ଷ୍ଠ ମ୍ୟାଚ୍ ଶୁକ୍ରବାର ଏଠାରେ ଖେଳାଯିବ।
ସ୍ଥାନୀୟ ଲାଲାଭାଇ କଣ୍ଟ୍ରାକ୍ଟର ଷ୍ଟାଡିୟମରେ ଗୁରୁବାର ଖେଳାଯାଇଥିବା ଏହି ମ୍ୟାଚ୍ରେ ଭାରତୀୟ ଦଳର ଅଧିନାୟିକା ହରମନପ୍ରୀତ କୌର ଟସ୍ ଜିତି ଦକ୍ଷିଣ ଆଫ୍ରିକାକୁ ବ୍ୟାଟିଂ ପାଇଁ ଆମନ୍ତ୍ରଣ କରିଥିଲେ। ନିର୍ଦ୍ଧାରିତ ୨୦ ଓଭରରେ ଦକ୍ଷିଣ ଆଫ୍ରିକା ୮ ଉଇକେଟ୍ ହରାଇ ୯୮ ରନ କରିଥିଲା। ଭାରତ ପକ୍ଷରୁ ରାଧା ଯାଦବ ୩ ଓ ଦୀପ୍ତି ଶର୍ମା ୨ ଉଇକେଟ୍ ନେଇଥିଲେ। ଜବାବରେ ଭାରତ ଅଧିନାୟିକା କୌରଙ୍କ ଅପରାଜିତ ୩୪ ରନ ବଳରେ ୧୭.୧ ଓଭରରେ ୫ ଉଇକେଟ୍ ହରାଇ ଲକ୍ଷ୍ୟ ହାସଲ କରିନେଇଥିଲା। ଓପନର୍ ଶେଫାଳି ବର୍ମା ୧୪ ଓ ଦୀପ୍ତି ୧୬ ରନ କରିଥିଲେ।
