ଜଲଗାଓଁ,୧୪ା୧୦(ପି.ଟି.): ବିରୋଧୀ ଦଳଗୁଡ଼ିକର ସାହସ ଥିଲେ ସେମାନେ ନିଜ ନିର୍ବାଚନୀ ଇସ୍ତାହାରରେ ୩୭୦ ଅନୁଚ୍ଛେଦ ଫେରାଇ ଆଣିବା ପାଇଁ ଘୋଷଣା କରନ୍ତୁ। ମହାରାଷ୍ଟ୍ରର ଜଲଗାଓଁରେ ରବିବାର ଏକ ନିର୍ବାଚନୀ ସଭାରେ କଂଗ୍ରେସ ଓ ଜାତୀୟତାବାଦୀ କଂଗ୍ରେସ ପାର୍ଟି (ଏନ୍ସିପି)କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏଭଳି ଚ୍ୟାଲେଞ୍ଜ କରିଛନ୍ତି।
ଆସନ୍ତା ୨୧ରେ ହେବାକୁ ଥିବା ମହାରାଷ୍ଟ୍ର ବିଧାନସଭା ନିର୍ବାଚନ ପାଇଁ ପ୍ରଧାନମନ୍ତ୍ରୀ ମୋଦି ଭାଜପା ପକ୍ଷରୁ ରବିବାର ପ୍ରଥମ ନିର୍ବାଚନୀ ସଭାକୁ ସମ୍ବୋଧିତ କରିଛନ୍ତି। ସେ କହିଛନ୍ତି, ଜମ୍ମୁ-କଶ୍ମୀର କେବଳ ଏକ ଭୂଖଣ୍ଡ ନୁହେଁ। ଉପତ୍ୟକାରେ ୪୦ ବର୍ଷର ସ୍ବାଭାବିକ ସ୍ଥିତି ଫେରାଇ ଆଣିବା ପାଇଁ ୪ ମାସରୁ ଅଧିକ ସମୟ ଲାଗିବ ନାହିଁ। ବିରୋଧୀ ଦଳଗୁଡ଼ିକ ସମ୍ବିଧାନର ଅନୁଚ୍ଛେଦ ୩୭୦ ଉଚ୍ଛେଦ ନିଷ୍ପତ୍ତିକୁ ନେଇ ରାଜନୀତି କରୁଛନ୍ତି। ପଡ଼ୋଶୀ ପାକିସ୍ତାନ ଯେଉଁ ଭାଷା କହୁଛି ବିରୋଧୀ ମଧ୍ୟ ସେହି ସମାନ ଭାଷା କହୁଛନ୍ତି। ଜମ୍ମୁ-କଶ୍ମୀରକୁ ନେଇ ସାରା ଭାରତ ଯାହା ଅନୁଭବ କରୁଛି କଂଗ୍ରେସ ଏବଂ ଏନ୍ସିପି ନେତାମାନେ ଠିକ୍ ତା’ର ବିପରୀତ ଚିନ୍ତା କରୁଛନ୍ତି। ସେମାନେ କୁମ୍ଭୀର କାନ୍ଦଣା ବନ୍ଦ କରନ୍ତୁ। ସତ୍ସାହସ ଥିଲେ ବିରୋଧୀ ଦଳଗୁଡ଼ିକ ମହାରାଷ୍ଟ୍ର ସମେତ ଆଗକୁ ହେବାକୁ ଥିବା ନିର୍ବାଚନଗୁଡ଼ିକର ଇସ୍ତାହାରରେ ଜମ୍ମୁ-କଶ୍ମୀରକୁ ସ୍ବତନ୍ତ୍ର ରାଜ୍ୟ ପାହ୍ୟା ପୁନଃ ପ୍ରଦାନ କରିବା ନେଇ ଉଲ୍ଲେଖ କରନ୍ତୁ। ସେମାନେ ଅଗଷ୍ଟ ୫ର ଅନୁଚ୍ଛେଦ ୩୭୦ ଏବଂ ୩୫କ ଉଚ୍ଛେଦ ନିଷ୍ପତ୍ତିକୁ ଚ୍ୟାଲେଞ୍ଜ କରନ୍ତୁ ବୋଲି ମୋଦି ଆହ୍ବାନ ଦେଇଛନ୍ତି। ବିରୋଧୀ ୩୭୦କୁ ଫେରାଇ ଆଣିବା ପାଇଁ କହିଲେ ତାହା ଲୋକଙ୍କ ଲାଗି ଗ୍ରହଣୀୟ ହେବନାହିଁ। ବିରୋଧୀ ଦଳଗୁଡ଼ିକର ଭବିଷ୍ୟତ ନଷ୍ଟ ହୋଇଯିବ ବୋଲି ପ୍ରଧାନମନ୍ତ୍ରୀ ଚେତାଇ ଦେଇଛନ୍ତି।
ପ୍ରଧାନମନ୍ତ୍ରୀ ଏହି ଅବସରରେ ଦେବେନ୍ଦ୍ର ଫଡନବିସ୍ଙ୍କ ନେତୃତ୍ୱାଧୀନ ମହାରାଷ୍ଟ୍ରର ଭାଜପା-ଶିବସେନା ମେଣ୍ଟ ସରକାରର ୫ ବର୍ଷର ପ୍ରଦର୍ଶନକୁ ପ୍ରଶଂସା କରିଛନ୍ତି। ଏହି ଦୁର୍ନୀତିମୁକ୍ତ ସରକାର ଚାଷୀଙ୍କଠାରୁ ଶିଳ୍ପପତିଙ୍କ ଯାଏ ସମସ୍ତଙ୍କଠାରେ ବିଶ୍ୱାସ ସୃଷ୍ଟି କରିପାରିଛି। ସେହିପରି ଭାଜପା ନେତୃତ୍ୱାଧୀନ ଏନ୍ଡିଏ ଉପରେ ପୁନଃ ଆସ୍ଥା ପ୍ରକଟ କରିଥିବାରୁ ସେ ଜନସାଧାରଣଙ୍କୁ ଧନ୍ୟବାଦ ଦେଇଥିଲେ। ଲୋକ ସଭା ନିର୍ବାଚନରେ ଏକ ସକ୍ଷମ ଓ ଶକ୍ତ ନୂଆ ଭାରତ ସପକ୍ଷରେ ହୋଇଥିବା ମତଦାନ ଦେଶକୁ ବିଶ୍ୱର ଯୋଗ୍ୟତମ ସ୍ଥାନକୁ ନେଇଯିବ। ଏହି ଜନାଦେଶ ଯୋଗୁ ଭାରତର ସ୍ବରକୁ ବିଶ୍ୱର ମହାଶକ୍ତିମାନେ ଶୁଣୁଛନ୍ତି। ଏହା ମୋଦି ପାଇଁ ନୁହେଁ, ବରଂ ଆପଣମାନଙ୍କ ଗୋଟିଏ ଭୋଟ ଯୋଗୁ ସମ୍ଭବ ହୋଇପାରିଛି ବୋଲି ପ୍ରଧାନମନ୍ତ୍ରୀ କହିଛନ୍ତି।
