ମୁମ୍ବାଇ, ୩୧।୭(ପି.ଟି.)-ପୂର୍ବତନ ଭାରତୀୟ ବ୍ୟାଟ୍ସମ୍ୟାନ ତଥା ଆନ୍ଧ୍ର ପ୍ରଦେଶ ଦଳର ଅଧିନାୟକ ଓ୍ବାଇ. ଭେନୁଗୋପାଳ ରାଓ ମଙ୍ଗଳବାର କ୍ରିକେଟର ସମସ୍ତ ଫର୍ମାଟରୁ ଅବସର ନେଇଛନ୍ତି। ଭାରତ ପକ୍ଷରୁ ୧୬ଟି ଏକଦିବସୀୟ ଅନ୍ତର୍ଜାତୀୟ ଏବଂ ୬୫ଟି ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ) ମ୍ୟାଚ ଖେଳିଥିବା ଭେନୁଗୋପାଳଙ୍କ ଅବସର ସମ୍ପର୍କରେ ଆନ୍ଧ୍ର କ୍ରିକେଟ ଆସୋସିଏଶନ ପକ୍ଷରୁ ସ୍ପଷ୍ଟ କରାଯାଇଛି। ୨୦୦୫ ଜୁଲାଇ ୩୦ରେ ଦାମ୍ବୁଲାଠାରେ ଶ୍ରୀଲଙ୍କା ବିପକ୍ଷରେ ଅନ୍ତର୍ଜାତୀୟ ପଦାର୍ପଣ କରିଥିବା ଏହି ୩୭ ବର୍ଷୀୟ ବିଶାଖାପଟନମ୍ ବାସିନ୍ଦା ଭାରତ ପକ୍ଷରୁ ୧୧ଟି ଇନିଂସ ଖେଳି ଗୋଟିଏ ଅର୍ଦ୍ଧଶତକ ସହାୟତାରେ ୨୧୮ ରନ ସଂଗ୍ରହ କରିଥିଲେ। ୨୦୦୬ ମେ ୨୩ରେ ସେ ଓ୍ବେଷ୍ଟଇଣ୍ଡିଜ ବିପକ୍ଷରେ ବାସେଟେରେଠାରେ କ୍ୟାରିୟରର ଶେଷ ଅନ୍ତର୍ଜାତୀୟ ଦିନିକିଆ ମ୍ୟାଚ ଖେଳିଥିଲେ। ତେବେ ସେ ୧୨୧ଟି ପ୍ରଥମଶ୍ରେଣୀ ମ୍ୟାଚ ଖେଳି ୧୭ ଶତକ ଏବଂ ୩୦ ଅର୍ଦ୍ଧଶତକ ସହାୟତାରେ ସେ ୭,୦୮୧ ରନ ସଂଗ୍ରହ କରିଥିଲେ। ଆଇପିଏଲରେ ସେ ୨୦୦୮ରୁ ୨୦୧୪ ମଧ୍ୟରେ ଡେକାନ ଚାର୍ଜର୍ସ ଓ ସନ୍ରାଇଜର୍ସ ପକ୍ଷରୁ ପ୍ରତିନିଧିତ୍ୱ କରିଥିଲେ।
