ଲକ୍ଷ୍ନୌ,୨୩।୭: ଉତ୍ତର ପ୍ରଦେଶ ସରକାର ଭଗବାନ ରାମଙ୍କର ଏକ ୨୫୧ ମିଟର ଉଚ୍ଚତା ବିଶିଷ୍ଟ ପ୍ରତିମୂର୍ତ୍ତି ସ୍ଥାପନ କରିବାକୁ ଯୋଜନା କରିଛନ୍ତି। ଅଯୋଧ୍ୟାରେ ଏହା ସ୍ଥାପନ କରାଯିବ। ଗୁଜରାଟରେ ପ୍ରତିଷ୍ଠା ହୋଇଥିବା ଷ୍ଟାଚ୍ୟୁ ଅଫ୍ ୟୁନିଟି ବା ସର୍ଦ୍ଦାର ବଲ୍ଲଭ ଭାଇ ପଟେଲଙ୍କ ମୂର୍ତ୍ତିଠାରୁ ମଧ୍ୟ ଏହା ଅଧିକ ଉଚ୍ଚତା ବିଶିଷ୍ଟ ହେବ। ଏହା ବିଶ୍ୱର ସର୍ବୋଚ୍ଚ ଷ୍ଟାଚ୍ୟୁ ହେବ ବୋଲି କୁହାଯାଉଛି। ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଅଧ୍ୟକ୍ଷତାରେ ସୋମବାର ଅନୁଷ୍ଠିତ ଏକ ଉଚ୍ଚ ସ୍ତରୀୟ ବୈଠକରେ ଏହି ନିଷ୍ପତ୍ତି ନିଆଯାଇଛି। ଅଯୋଧ୍ୟାର ସରାୟୁ ନଦୀ ନିକଟରେ ପ୍ରାୟ ଶହେ ହେକ୍ଟର ସ୍ଥାନରେ ଏହା ନିର୍ମାଣ କରାଯିବାର ଯୋଜନା ରହିଛି। ଏଥିପାଇଁ କାମ ଖୁବ୍ ଶୀଘ୍ର ଆରମ୍ଭ ହେବ ବୋଲି ମୁଖ୍ୟମନ୍ତ୍ରୀ ସୂଚନା ଦେଇଛନ୍ତି। ଅଯୋଧ୍ୟାର ଆଧୁନିକିକରଣ ପାଇଁ ରାମଙ୍କ ଉପରେ ଏକ ଡିଜିଟାଲ ମ୍ୟୁଜିୟମ, ଲାଇବ୍ରେରୀ, ପାର୍କିଂ ଓ ଫୁଡ ପ୍ଲାଜା ଭଳି ସୁବିଧା କରାଯିବାକୁ ଯୋଜନା ରହିଛି। ଏଥିପାଇଁ ଉତ୍ତର ପ୍ରଦେଶ ସରକାର ଗୁଜରାଟ ସରକାରଙ୍କ ସହ ଏକ ଏମ୍ଓୟୁ ସାଇନ୍ କରିଛନ୍ତି। ଯେଉଁଥିରେ ଗୁଜରାଟ ସରକାର ଟେକ୍ନିକାଲ ଆସିଷ୍ଟାନସ୍ ଓ ଗାଇଡାନ୍ସ ଯୋଗାଇଦେବେ।
