ନୂଆଦିଲ୍ଲୀ,୨-୮: ରାଷ୍ଟ୍ରାୟତ୍ତ ଟେଲିକମ କମ୍ପାନୀ ଭାରତ ସଞ୍ଚାର ନିଗମ ଲିମିଟେଡ(ବିଏସ୍ଏନ୍ଏଲ) ଓ ମହାନଗର ଟେଲିଫୋନ ନିଗମ ଲିମିଟେଡ(ଏମ୍ଟିଏନ୍ଏଲ୍) ଏହାର କର୍ମଚାରୀଙ୍କୁ ଜୁଲାଇ ଦରମା ଦେବାରେ ବିଫଳ ହୋଇଛି। ବିଗତ ୬ ମାସ ମଧ୍ୟରେ ଏହା ଦ୍ୱିତୀୟଥର। ଏଥିପୂର୍ବରୁ କମ୍ପାନୀ ଫେବୃୟାରୀରେ ନିଜର କର୍ମଚାରୀଙ୍କୁ ଦରମା ଦେଇପାରି ନ ଥିଲା। ସରକାରଙ୍କ ଠାରୁ ସହାୟତା ଆଣି ଏହା ମାର୍ଚ୍ଚ ୧୫ ସୁଦ୍ଧା ଦରମା ଦେଇଥିଲା। ବିଏସ୍ଏନଏଲ୍ ସିଏମ୍ଡି ପି.କେ.ପୁରଓ୍ବାର କହିଛନ୍ତି ଯେ, ଏ ଦିଗରେ ପ୍ରୟାସ ଚାଲିଛି। ଆସନ୍ତା ୪ କିମ୍ବା ୫ ତାରିଖ ମଧ୍ୟରେ କର୍ମଚାରୀଙ୍କୁ ବେତନ ଦେବାକୁ ଚେଷ୍ଟା କରାଯାଉଛି। ଅର୍ଥ ମନ୍ତ୍ରଣାଳୟ ପକ୍ଷରୁ କୌଣସି ବଜେଟୀୟ ସହାୟତା ଦିଆଯାଉ ନ ଥିବାରୁ ଟେଲିକମ୍ ବିଭାଗ ବିଏସ୍ଏନ୍ଏଲ୍କୁ ସହାୟତା ପ୍ରଦାନ ସ୍ଥିତିରେ ନାହିଁ। ସୂଚନାଥାଉ କି, କର୍ମଚାରୀଙ୍କ ଦରମା ବାବଦରେ ବିଏସ୍ଏନ୍ଏଲ୍ ମାସକୁ ପ୍ରାୟ ୮୫୦ କୋଟି ଟଙ୍କା ଓ ଏମ୍ଟିଏନ୍ଏଲ୍ ୧୬୦ କୋଟି ଟଙ୍କା ବ୍ୟୟ କରିଥାଏ। ଅଲ୍ ଇଣ୍ଡିଆ ବିଏସ୍ଏନ୍ଏଲ୍ ଏମ୍ପ୍ଲଇଜ୍ ୟୁନିୟନ ମହାସଚିବ ପ୍ରହ୍ଲାଦ ରାୟ କହିଛନ୍ତି ଯେ, ବର୍ତ୍ତମାନ କମ୍ପାନୀ ଭେଣ୍ଡରଙ୍କ ବକେୟା ବାବଦରେ ଥିବା ୩୦୦୦ କୋଟି ଟଙ୍କା ମଧ୍ୟରୁ କିଛି ଅଂଶ ପ୍ରଦାନ ପାଇଁ ଆଭ୍ୟନ୍ତରୀଣ ସ୍ରୋତରୁ ଅର୍ଥ ଯୋଗାଡ କରୁଛି। ଏହି ସ୍ରୋତରୁ ହିଁ ଆସନ୍ତା ୧୦ ଦିନ ଭିତରେ କର୍ମଚାରୀଙ୍କୁ ଦରମା ପ୍ରଦାନ କରାଯିବ।
