ନୂଆଦିଲ୍ଲୀ,୧୮।୮: ଲଗାଣ ବର୍ଷାରେ ଦେଶର ଅଧିକାଂଶ ଭାଗରେ ବନ୍ୟା ସୃଷ୍ଟି ହୋଇଛି। ଅଧା ଭାରତ ବନ୍ୟାରେ ବୁଡି ଗଲାଣି କହିଲେ ଚଳେ। ଉତ୍ତରାଖଣ୍ଡରେ ଗଙ୍ଗୋତ୍ରୀ, ୟମୁନୋତ୍ରୀ ବିପଦସଙ୍କେତ ଉପରେ ପ୍ରବାହିତ ହେଉଥିବା ବେଳେ ବଦ୍ରିନାଥ ହାଇଓ୍ବେକୁ ବନ୍ଦ କରି ଦିଆଯାଇଛି। ସେହିପରି ଜମ୍ମୁରେ କେତେକ ନଦୀ ବିପଦ ସଙ୍କେତ ନିକଟବର୍ତ୍ତି ହୋଇଥିବା ବେଳେ ବୈଷ୍ଣୋଦେବୀ ହେଲିକପ୍ଟର ସେବାକୁ ମଧ୍ୟ ବନ୍ଦ କରି ଦିଆଯାଇଛି। ପଞ୍ଜାବର ବନ୍ୟା ପରିସ୍ଥିତି ମଧ୍ୟ ଭୟଙ୍କର। ଏଠାରେ ପାଖାପାଖି ବନ୍ୟା ପ୍ରଭାବିତ ୮୧ ଗାଁକୁ ଖାଲି କରିବାକୁ ପ୍ରଶାସନ ନିର୍ଦ୍ଦେଶ ଦେଇଛି। ରାଜସ୍ଥାନ ବର୍ଷାରେ ଏପର୍ଯ୍ୟନ୍ତ ୧୬ଜଣଙ୍କ ମୃତ୍ୟୁ ହୋଇ ସାରିଲାଣି। ଏଥିରୁ ବାଦ୍ ଯାଇନାହିଁ ଆନ୍ଧ୍ର ପ୍ରଦେଶ। ଏବେ ଏଠାରେ ପ୍ରାୟ ୮୭ ଗାଁ ବନ୍ୟାଦ୍ୱାରା ପ୍ରଭାବିତ ହୋଇଛି। ଏପଟେ ଆସନ୍ତା ୨୪ ଘଣ୍ଟା ମଧ୍ୟରେ ବିଭିନ୍ନ ରାଜ୍ୟରେ ପ୍ରବଳ ବର୍ଷାର ଅନୁମାନ କରିଛି ପାଣିପାଗ ବିଭାଗ। ଆଉ ଏହି ଲଗାଣ ବର୍ଷା ବନ୍ୟା ପୀଡିତଙ୍କ ଉପରେ ବୋଝ ଉପରେ ନଳିତା ବିଡା ଭଳି ହେବ ବୋଲି ଅନୁମାନ କରାଯାଉଛି। ଚଳିତ ବନ୍ୟାରେ ଲକ୍ଷ ଲକ୍ଷ ଲୋକ ପ୍ରଭାବିତ ହୋଇଥିବା ବେଳେ କୋଟି କୋଟି ଟଙ୍କାର ସମ୍ପତ୍ତି ନଷ୍ଟ ହୋଇଥିବା ଆକଳନ କରାଯାଇଛି।
