ମୁମ୍ବାଇ,୮-୧୧: ଭାରତର ବିତ୍ତୀୟ ଗଣିତ ଉପରେ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି। ବିତ୍ତୀୟ ଶୃଙ୍ଖଳା ଉପରେ ରହିଥିବା ବିଭିନ୍ନ ତଥ୍ୟ ସ୍ବଚ୍ଛ ହେବା ଆବଶ୍ୟକତା ରହିଛି। ଜି-୨୦ ଦେଶ ସମୂହକୁ ବିଚାର କଲେ ଭାରତ ଏହି କ୍ଷେତ୍ରରେ ବହୁ ପଛରେ ରହିଥିବା ଅନ୍ତର୍ଜାତୀୟ ମୁଦ୍ରା ପାଣ୍ଠି(ଆଇଏମ୍ଏଫ୍) ଗୁରୁବାର କହିଛି। ବଜେଟରେ ଧାର୍ଯ୍ୟ ହୋଇଥିବା ଲକ୍ଷ୍ୟ ହାସଲ କରିବା ଲାଗି ଭାରତ ଗତ କିଛି ବର୍ଷ ହେବ ସକ୍ଷମ ହେଉ ନାହିଁ। ଏଦିଗରେ ଏହା ଅଧିକ ଯତ୍ନବାନ ହେବାର ଆବଶ୍ୟକତା ରହିଥିବା ଆଇଏମ୍ଏଫ୍ର ଉପନିର୍ଦ୍ଦେଶକ ଆନି ମ୍ୟାରି ଗୁରୁବାର ଏନ୍ଏସ୍ଇର ଏକ କାର୍ଯ୍ୟକ୍ରମରେ କହିଛନ୍ତି।
କର୍ପୋରେଟ ଟିକସ ହ୍ରାସ ଦ୍ୱାରା ରାଜକୋଷକୁ ୧.୪୫ ଲକ୍ଷ କୋଟି ଟଙ୍କା କ୍ଷତି ହେବ। ଏହାକୁ ଭରଣା ଲାଗି ଭାରତ କିଭଳି ପଦକ୍ଷେପ ନେବ ସେ ଦିଗରେ କିଛି ସ୍ପଷ୍ଟ କରି ନ ଥିବା ସେ କହିଛନ୍ତି। ସରକାରଙ୍କ ଡାଟାକୁ ନେଇ ଦେଶର ୧୦୦ ଅର୍ଥନୀତିଜ୍ଞ ବିଭିନ୍ନ ଆଶଙ୍କା କରିବା ସହ ପ୍ରଶ୍ନ ଉଠାଇଥିଲେ। ଏଭଳି ସମୟରେ ବିତ୍ତୀୟ ସ୍ବଚ୍ଚତା ବୃଦ୍ଧି ହେବାର ଆବଶ୍ୟକତା ରହିଛି। ବିତ୍ତୀୟ ସ୍ଥିତିର ସମ୍ପୂର୍ଣ୍ଣ ଛବି ଘରୋଇ କ୍ଷେତ୍ର ପାଇବା ଏବେ କଷ୍ଟକର। ଏହା ହେଲେ ଉଚ୍ଚ ସ୍ତରର ଋଣ ହ୍ରାସ ଘରୋଇ କ୍ଷେତ୍ର ଲାଗି ଆର୍ଥତ୍କ ସମ୍ପତ୍ତି କ୍ଷେତ୍ରରେ ସୁଯୋଗ ସୃଷ୍ଟି କରା ଯାଇପାରିବ। ମନ୍ଥର ଅଭିବୃଦ୍ଧିକୁ ତ୍ୱରାନ୍ବିତ କରିବା ଲାଗି ବିତ୍ତୀୟ ପ୍ୟାକେଜ ପ୍ରଦାନ କରିଦେଲେ ଅର୍ଥ ବ୍ୟବସ୍ଥା ବଢିଯିବ ବୋଲି କହି ହେବ ନାହିଁ। ଏହା କେବେ ପର୍ଯ୍ୟାପ୍ତ ନୁହେଁ। ଅନ୍ୟ ଅଭିବୃଦ୍ଧିଶୀଳ ଅର୍ଥନୀତିଗୁଡ଼ିକ ତୁଳନାରେ ସରକାରଙ୍କ ଋଣ ଅଧିକ ରହିଲେ ଏହା ଅଭିବୃଦ୍ଧିକୁ ପଛକୁ ଟାଣିବ ବୋଲି ସେ କହିଛନ୍ତି।
ସେ ଆହୁରୀ ମଧ୍ୟ କହିଛନ୍ତି ଯେ, ପ୍ରକୃତ ସ୍ଥିତିକୁ ଦେଖି ବିତ୍ତୀୟ ଧାରା ଆକଳନ ହେବାର ଆବଶ୍ୟକତା ରହିଛି। ଏହା ହେଲେ ଘରୋଇ କ୍ଷେତ୍ରର ଆଶାକୁ ଏକ ଉନ୍ନତ ଦିଶା ମିଳି ପାରିବ। ଏକ୍ଷେତ୍ରରେ ଭାରତ ସରକାର ଉଭୟ ଚକ୍ରୀୟ ଏବଂ ଢାଞ୍ଚାଗତ ଚ୍ୟାଲେଞ୍ଜକୁ ବିଚାର କରି ବିଭିନ୍ନ ନୀତି ଉପରେ କାର୍ଯ୍ୟ କରିବାର ଆବଶ୍ୟକତାକୁ ବୁଝିବାକୁ ହେବ। ଶ୍ରମ ଜମି ଏବଂ ବଜାର ଲାଗି ସଂସ୍କାର ପଦକ୍ଷେପ ଉପରେ ମ୍ୟାରି ଗୁରୁତ୍ୱାରୋପ କରିଛନ୍ତି। ଏହା ହେଲେ ଜିଡିପି ଅଭିବୃଦ୍ଧିକୁ ଫେରାଇ ଅଣାଯାଇ ପାରିବ ଏବଂ ଅର୍ଥ ବ୍ୟବସ୍ଥାରେ ସ୍ଥିତାବସ୍ଥା ବଜାୟ ରହିବ। ରାଷ୍ଟ୍ରାୟତ୍ତ ବ୍ୟାଙ୍କ ମିଶ୍ରଣ ବେଳେ ସରକାର ବିଭିନ୍ନ ସାବଧାନତା ବଜାୟ ରଖିବାକୁ ପଡିବ। ଏହାବାଦ ଗଭର୍ନାସ ଏବଂ ପୁଞ୍ଜି ପ୍ରଦାନ ଭଳି ବିଷୟକୁ ଭାରତ ବିଷୟକୁ ସରକାର ବିଚାର କରିବାକୁ ହେବ। ଏହାବାଦ ଏନ୍ବିଏଫ୍ସି କ୍ଷେତ୍ର ଉପରେ ଫୋକସ କରିବାକୁ ସେ ମତ ରଖିଛନ୍ତି।
