ଭାରତରେ ପ୍ରତିଦିନ କ୍ୟାନ୍ସରରେ ୩୦୦ ଲୋକ ପ୍ରାଣ ହରାଉଛନ୍ତି। ଗତ ଦୁଇ ଦଶନ୍ଧିରେ କ୍ୟାନ୍ସର ରୋଗୀଙ୍କ ସଂଖ୍ୟା ଭାରତରେ ଦୁଇ ତୃତୀୟାଂଶରୁ ଅଧିକ ବୃଦ୍ଧି ପାଇଛି। ବିଶ୍ୱରେ ଅନ୍ୟ ଦେଶ ତୁଳନାରେ ଭାରତରେ କ୍ୟାନସରଜନିତ ମୃତ୍ୟୁ ହାର ମଧ୍ୟ ଅଧିକ। ନ୍ୟାଶ୍ନାଲ ହେଲ୍ଥ ପ୍ରୋଫାଇଲ(୨୦୧୯)ର ତଥ୍ୟରୁ ଜଣାପଡେ, ୨୦୧୭-୨୦୧୮ ଗୋଟିଏ ବର୍ଷରେ ଦେଶରେ କ୍ୟାନ୍ସର ୩୦୦ ପ୍ରତିଶତ ଅର୍ଥାତ ୩ଗୁଣରୁ ଅଧିକ ରୋଗୀଙ୍କ ସଂଖ୍ୟା ବୃଦ୍ଧିପାଇଛି। ଏଣୁ ଭାରତରେ କ୍ୟାନ୍ସର ସମ୍ପର୍କରେ ସଚେତନତା ସୃଷ୍ଟି କରିବା ପାଇଁ ପ୍ରତିବର୍ଷ ନଭେମ୍ବର ୭ରେ ‘ରାଷ୍ଟ୍ରୀୟ କ୍ୟାନ୍ସର ସଚେତନତା ଦିବସ’ ପାଳନ କରାଯାଉଛି। ୨୦୧୪ ସେପ୍ଟେମ୍ବରରେ ଭାରତର ତତ୍କାଳୀନ ସ୍ବାସ୍ଥ୍ୟମନ୍ତ୍ରୀ ରାଷ୍ଟ୍ରୀୟ କ୍ୟାନ୍ସର ସଚେତନତା ଦିବସ ପାଳନ କରାଯିବା ଲାଗି ଘୋଷଣା କରିବା ପରେ ସେହିବର୍ଷ ନଭେମ୍ବର ୭ ରେ ପ୍ରଥମେ ଏହି ଦିବସ ପାଳନ କରାଯାଇଥିଲା।
‘ଇଣ୍ଡିଆ ଏଗେନ୍ଷ୍ଟ କ୍ୟାନସର’ର ତଥ୍ୟରୁ ଜଣାପଡେ ଯେ,ଭାରତରେ ୨୫ ଲକ୍ଷରୁ ଅଧିକ କ୍ୟାନ୍ସର ପୀଡିତ ରହିଛନ୍ତି। ପ୍ରତିବର୍ଷ ୧୧ ଲକ୍ଷ ନୂଆ ରୋଗୀ ଯୋଡି ହେଉଛନ୍ତି ଏବଂ ୭ ଲକ୍ଷରୁ ଅଧିକ ପୀଡିତଙ୍କ ମୃତ୍ୟୁ ହେଉଛି। ପ୍ରତି ଦୁଇ ମିନିଟ୍ରେ ଜଣେ କ୍ୟାନ୍ସର ରୋଗୀ ଚିହ୍ନଟ ହେଉଛନ୍ତି। ସର୍ଭାଇକଲ କ୍ୟାନ୍ସରରେ ପ୍ରତି ୮ ମିନିଟରେ ଜଣେ ମହିଳା ଓ ତମାଖୁ ଜନିତ କ୍ୟାନ୍ସରରେ ପ୍ରତିଦିନ ୩୫୦୦ ଜଣଙ୍କର ମୃତ୍ୟୁ ହେଉଛି।
ଲାନସେଟ୍ ରିପୋର୍ଟରୁ ଜଣାପଡିଛି ଯେ ,ହୃଦ୍ଘାତ ପରେ କ୍ୟାନ୍ସରରେ ବେଶି ଲୋକ ମୃତ୍ୟୁମୁଖରେ ପଡୁଛନ୍ତି। କ୍ୟାନ୍ସରର ମୂଳ କାରଣ ଧୂମପାନ, ତମାଖୁ ସେବନ। ତମାଖୁରୁ ୧୪ ପ୍ରକାର କ୍ୟାନ୍ସର ହେଉଛି। ଏହାବାଦ ମଦ୍ୟ, ଡ୍ରଗ୍ସ ଓ ଅପୁଷ୍ଟିକର ଖାଦ୍ୟ ଯୋଗୁ ମଧ୍ୟ ଏହା ହେଉଛି। ୧୦୦ ଜଣ କ୍ୟାନ୍ସର ରୋଗୀଙ୍କ ମଧ୍ୟରୁ ୪୦ ଜଣ ଏହି ଦୁଇଟି କାରଣ ଯୋଗୁୁ ପୀଡିତ ହେଉଛନ୍ତି। ଦେଶରେ ତମାଖୁ ସେବନ କାରଣରୁ ଦିନକୁ ୩ ହଜାରରୁ ଊର୍ଦ୍ଧ୍ୱ କ୍ୟାନ୍ସର ପୀଡିତଙ୍କ ମୃତ୍ୟୁ ହେଉଛି। ରାଜସ୍ଥାନରେ ତମାଖୁ ଓ ଧୂମପାନ ଉପତ୍ାଦ ବ୍ୟବହାରରୁ ଦିନକୁ ୨୬୭ ଜଣଙ୍କର ମୃତ୍ୟୁ ଘଟୁଛି। ଗୋଟିଏ ପକେଟ ସିଗାରେଟ ଆୟୁଷରୁ ୩ ଘଣ୍ଟା ୪୦ ମିନିଟ କମାଇ ଦେଉଛି। ଧୂମପାନ ଯୋଗୁ ଦେଶରେ ପ୍ରତି ଘଣ୍ଟାରେ ୧୩୭ ଲୋକଙ୍କର ପ୍ରାଣହାନି ହେଉଛି। ସରକାର ତମାଖୁ ବିକ୍ରି ଉପରେ କଟକଣା ଲଗାଇଲେ ବି ତାହା ଧୂଆଁରେ ରହିଯାଉଛି। ସର୍ବସାଧାରଣ ସ୍ଥାନରେ ଧୂମପାନ ଉପରେ କଟକଣା ଲାଗଯାଇଥିଲେ ମଧ୍ୟ ତାହାକୁ କଡାକଡି ଭାବେ ପାଳନ କରାଯାଇପାରୁନି। ବାୟୁପ୍ରଦୂଷଣ ଯୋଗୁ ଲିଭର କ୍ୟାନ୍ସର ବ୍ୟାପୁଛି। ଅସୁରକ୍ଷିତ ଯୌନସମ୍ପର୍କ ସଭାଇକଲ କ୍ୟାନ୍ସରର କାରଣ। କ୍ୟାନ୍ସର ଆରମ୍ଭରୁ ୬୦ ପ୍ରତିଶତ ପୀଡିତଙ୍କର ସଫଳ ଚିକିତ୍ସା କରାଯାଇପାରିବ। କ୍ୟାନ୍ସରର ଲକ୍ଷଣ, ଚିକିତ୍ସା ପଦ୍ଧତି ସମ୍ପର୍କରେ ଅବଗତ କରିବା ସହ ଏହାକୁ କିଭଳି ରୋଗାଯାଇପାରିବ ସେଥିପାଇଁ ସଚେତନତା ଆଣିବା ସାମ୍ପ୍ରତିକ ସମୟର ଏକ ବଡ଼ ଆହ୍ବାନ।
