କେନ୍ଦ୍ର ସରକାର ସାଧାରଣତନ୍ତ୍ର ଦିବସ ପୂର୍ବରୁ ୨୦୨୦ ପଦ୍ମ ପୁରସ୍କାର ଘୋଷଣା କରିଛନ୍ତି। ଚଳିତବର୍ଷ ୭ଜଣଙ୍କୁ ପଦ୍ମ ବିଭୂଷଣ, ୧୬ଜଣଙ୍କୁ ପଦ୍ମଭୂଷଣ ଏବଂ ୧୧୮ ଜଣଙ୍କୁ ପଦ୍ମଶ୍ରୀ ସମ୍ମାନରେ ସମ୍ମାନିତ କରାଯିବ। ଏଥର ପଦ୍ମଶ୍ରୀ ପୁରସ୍କାର ପାଇଁ ଅନେକ ସାଧାରଣ ବ୍ୟକ୍ତି ମନୋନୀତ ହୋଇଛନ୍ତି। ସେମାନଙ୍କ ମଧ୍ୟରେ ଜଣେ ଫଳ ବିକ୍ରେତା ସାମିଲ ଅଛନ୍ତି। କର୍ନାଟକର ଦକ୍ଷିଣ କନ୍ନଡ ଜିଲାର ୬୮ବର୍ଷୀୟ ଫଳ ବିକ୍ରେତା ହରେକାଲା ହଜାବା ଏକ ଛୋଟ ଦୋକାନରେ ଫଳ ବିକି ଗାଁରେ ଏକ ପ୍ରାଥମିକ ଏବଂ ମାଧ୍ୟମିକ ସ୍କୁଲ ତିଆରି କରିଛନ୍ତି। ଏବେ ସେ ଏକ ବିଶ୍ୱବିଦ୍ୟାଳୟ କରିବାକୁ ପ୍ରସ୍ତୁତି ଆରମ୍ଭ କରିଦେଇଛନ୍ତି।
ସବୁଠୁ ରୋଚକ କଥା ହେଉଛି ହଜାବା ଆଦୌ ପାଠ ପଢିନାହାନ୍ତି। ଥରେ ଜଣେ ବିଦେଶୀ ଦମ୍ପତି ତାଙ୍କ ଦୋକାନକୁ କମଳା କିଣିବା ପାଇଁ ଆସିଥିଲେ। ସେମାନେ କମଳାର ମୂଲ୍ୟ ପଚାରିଥିଲେ। କିନ୍ତୁ ହଜାବା ତାହା ବୁଝିପାରି ନ ଥିଲେ। ସେମାନେ କମଳା ନ କିଣି ସେଠାରୁ ପଳାଇ ଥିଲେ। ସ୍ଥାନୀୟ ଭାଷା ବ୍ୟତୀତ ଅନ୍ୟ କୌଣସି ଭାଷା ଶିଖି ନ ଥିବାରୁ ସେଦିନ ତାଙ୍କୁ ବହୁତ ଖରାପ ଲାଗିଥିଲା। ତାଙ୍କ ଭଳି ଅନ୍ୟ କେହି ଯେମିତି ଏଭଳି ପରିସ୍ଥିତି ଦେଇ ଗତି ନ କରୁ, ସେବେଠୁ ଗାଁରେ ଏକ ପ୍ରାଥମିକ ସ୍କୁଲ ଖୋଲିବା କଥା ଚିନ୍ତା କରିଥିଲେ ବୋଲି ହଜାବା କହିଛନ୍ତି। ତେବେ ତାଙ୍କୁ ପଦ୍ମଶ୍ରୀ ମିଳିବା ନେଇ ଘୋଷଣା ହେବାପରେ ସେ କହିଛନ୍ତି, ମୋର ବିଶ୍ୱାସ ହେଉ ନାହିଁ। ସ୍ବପ୍ନରେ ସୁଦ୍ଧା ଭାବି ନ ଥିଲି ମୋତେ ପଦ୍ମଶ୍ରୀ ପୁରସ୍କାର ଦିଆଯିବ। ଶୁଣିକି ଖୁସି ହେଲି ବୋଲି ସେ କହିଛନ୍ତି।
