ପାଟଣା, ୨୭।୫(ସ୍ବ.ପ୍ର.)-କେନ୍ଦୁଝର ଜିଲା ପାଟଣା ବ୍ଲକରେ ବିହନ ଧାନର ଘୋର ଅଭାବ ପରିଲକ୍ଷିତ ହୋଇଛି। ଚାଷୀ ସମବାୟ ସମିତିକୁ ପ୍ରତିଦିନ ଦୌଡ଼ିଲେ ବି ଧାନ ବିହନ ନ ପାଇ ହତାଶ ହୋଇ ଫେରୁଛି। ଫଳରେ ଚାଷୀ କୁଳ ଅସନ୍ତାଷ ପ୍ରକାଶ କରିଛନ୍ତି। ପାଟଣା ସମବାୟ ସମିତି ତରଫରୁ ପୁଟୁଳିଆଠାରେ ମଙ୍ଗଳବାର ଧାନ ବିହନ ବିକ୍ରି ସମୟରେ ଚାଷୀଙ୍କ ଦରକାରୀ ବିହନ ନ ମିଳିବାରୁ ଉତ୍ତେଜନା ପ୍ରକାଶ ପାଇଥିଲା। ଲ୍ୟାମ୍ପ ଏମଡି ହରମୋହନ ମହାନ୍ତ ବାଧ୍ୟ ହୋଇ ପୋଲିସର ଆଶ୍ରୟ ନେଇଥିଲେ। ପାଟଣା ଥାନା ଅଧିକାରୀ ସୋମନାଥ ଜେନା ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାଶୁଝା କରିବା ପରେ ସ୍ଥିତି ସ୍ବାଭାବିକ ହୋଇଥିଲା।
୫ଶହରୁ ଊର୍ଦ୍ଧ୍ୱ ଚାଷୀ ମାନେ ସାମଜିକ ଦୂରତାକୁ ମଧ୍ୟ ଊଲ୍ଲଂଘନ କରି ବିହନ ନେବା ପାଇଁ ଠେଲା ପେଲା କରିବା ସହ ଧାଡି ଭାଙ୍ଗିବା ଦେଖିବାକୁ ମିଳିଥିଲା। ଚାଷୀଙ୍କର ଲଲାଟ, ସହଭାଗୀ, ପୂଜା, ପ୍ରତୀକ୍ଷା ଓ କଳା ଚମ୍ପା ଧାନ ବିହନ ଆବଶ୍ୟକ ଥିବା ବେଳେ ଏସବୁ ଧାନ ବିହନ ପାଟଣାରେ ମିଳୁନାହିଁ। ଫଳରେ ଚାଷୀଙ୍କୁ ସରକାରୀ ରିହାତି ଦରରେ ବିହନ ନ ମିଳିବାରୁ ଘରୋଇ ବିକ୍ରେତାଙ୍କଠାରୁ ଉଚ୍ଚା ଦରରେ ଧାନ ବିହନ କିଣିବାକୁ ପଡୁଛି। ବ୍ଲକର କେବଳ ପାଟଣା ସମବାୟ ସମିତି ୫ ଶହ କୁଇଣ୍ଟାଲ ଧାନ ବିହନ ଦେଇଥିବା ବେଳେ ବାଲେଶ୍ୱର ସିଡ୍ସ କର୍ପୋରେଶନ କେବଳ ଶହେ କୁଇଣ୍ଟାଲ ବିହନ ଯୋଗାଇଥିବାରୁ ଏଭଳି ପରିସ୍ଥିତି ଉପୁଜିଛି ବୋଲି ପାଟଣା ଲ୍ୟାମ୍ପ ଏମଡି ହରମୋହନ ମହାନ୍ତ ସୂଚନା ଦେଇଛନ୍ତି। ଏସମ୍ପର୍କରେ ପାଟଣା କୃଷି ଅଧିକାରୀ ପରେଶ କୁମାର ଦାଶଙ୍କୁ ପଚାରିବାରୁ ବ୍ଲକରେ ୧୭ କୁଇଣ୍ଟାଲ ଧାନ ବିହନର ଆଶ୍ୟକତା ଥିବା ବେଳେ ଓଡିଶା ରାଜ୍ୟ ବିହନ ନିଗମ ମାତ୍ର ୪୭୫ କୁଇଣ୍ଟାଲ ବିହନ ଯୋଗାଇ ଦେଇଥିବାରୁ ଏଭଳି ପରିସ୍ଥିତି ଉପୁଜିଛି ବୋଲି ସେ ତାଙ୍କ ପ୍ରତିକ୍ରିୟାରେ କହିଛନ୍ତି।
