ଚଣ୍ଡିଗଡ଼,୨୪।୮: ଭାରତ ବିରୋଧରେ ପାକିସ୍ତାନ ନୂଆ ନୂଆ ଷଡ଼ଯନ୍ତ୍ର ରଚିବାରେ ଲାଗିଛି। ପାକିସ୍ତାନର ଚମଡା କାରଖାନାରୁ ନିର୍ଗତ ହେଉଥିବା ଗନ୍ଧଯୁକ୍ତ ରାସାୟନିକ ପଦାର୍ଥ ଓ ଆବର୍ଜନା ସବୁ ସତ୍ଲେଜ ନଦୀରେ ମିଶି ଜଳ ପ୍ରଦୂଷିତ କରୁଛି। ଫଳରେ ପଞ୍ଜାବ ସୀମାନ୍ତରେ ଥିବା ଗାଁଗୁଡିକ ଏହି ନଦୀ ପାଣି ବ୍ୟବହାର କରି ରୋଗରେ ଆକ୍ରାନ୍ତ ହେବା ସହ ଗୃହପାଳିତ ପ୍ରାଣୀଙ୍କ ମୃତ୍ୟୁ ହେଉଥିବା ଅଭିଯୋଗ ହୋଇଛି। ଏଥିସହ ଉକ୍ତ ପାଣିକୁ ଚାଷ ଜମିରେ ଫସଲ ପାଇଁ ବ୍ୟବହାର କରାଯିବାରୁ ସବୁ ଫସଲ ନଷ୍ଟ ହୋଇଯାଉଛି ବୋଲି ଗ୍ରାମବାସୀ କହିଛନ୍ତି। ସୂଚନାଯୋଗ୍ୟ, ଭାରତରୁ ପାକିସ୍ତାନର କିଛି ଦୂର ପର୍ଯ୍ୟନ୍ତ ଏହି ନଦୀର ପାଣି ପ୍ରବାହିତ ହେଉଛି। ଫଳରେ ଏହି ନଦୀର ପାଣି ଭାରତର ପଞ୍ଜାବ ରାଜ୍ୟର କିଛି ସ୍ଥାନରୁ ପ୍ରବାହିତ ହୋଇ ପାକିସ୍ତାନକୁ ଯାଇଥାଏ। ପୁଣି ସେହି ପାଣି ପାକିସ୍ତାନରୁ ଫେରି ପଞ୍ଜାବକୁ ଆସିଥାଏ। ଯେଉଁଥିରେ ପାକିସ୍ତାନର ଚମଡା କାରଖାନାର ପାଣି ସତ୍ଲେଜ ନଦୀରେ ଆସି ମିଶିଥାଏ। ଏହାପରେ ପଞ୍ଜାବର ସୀମାବର୍ତ୍ତୀ ଗ୍ରାମବାସୀ ଏହି ପାଣିକୁ ବ୍ୟବହାର କରୁଥିବାରୁ ବିଭିନ୍ନ ରୋଗରେ ଆକ୍ରାନ୍ତ ହୋଇ ମୃତ୍ୟୁବରଣ କରୁଥିବା କୁହାଯାଉଛି।
