ନାଗପୁର, ୨୨।୭: ମହାରାଷ୍ଟ୍ରର ନାଗପୁରରେ ଏକ ଅଜବ ଘଟଣା ଘଟିଛି। ବିନା ଅନୁମତିରେ ନିଶ କାଟିଦେବାରୁ ତାଙ୍କ ନାଁରେ ଥାନାରେ ମାମଲା ରୁଜୁ କରିଛନ୍ତି ଜଣେ ଯୁବକ। ଏଭଳି ଘଟଣା ପରେ ସ୍ଥାନୀୟ ଅଞ୍ଚଳର ବାରିକ ସଂଗଠନ ପକ୍ଷରୁ ଏହାକୁ ବିରୋଧ କରାଯାଇଛି। ସୂଚନାଯୋଗ୍ୟ, ଲକ୍ଷ୍ମଣ ଠାକୁର(୩୫) ନାମକ ଜଣେ ବ୍ୟକ୍ତି ଦାଢି କାଟିବାକୁ ସ୍ଥାନୀୟ ସେଲୁନକୁ ଯାଇଥିଲେ। ସେଠାରେ ବାରିକ ସୁନୀଲ ଲକ୍ଷ୍ଣେ ତାଙ୍କ ବିନା ଅନୁମତିରେ ନିଶ ସମ୍ପୁର୍ଣ୍ଣ କାଟି ଦେଇଥିଲେ। ଘରେ ପହଞ୍ଚି ଲକ୍ଷ୍ମଣ ନିଜ ମୁହଁ ଦେଖି ସୁନୀଲଙ୍କୁ ଫୋନ୍ କରିଥିଲେ। ସୁନୀଲ ତାଙ୍କୁ ଫୋନ୍ରେ ଧମକ ଦେଇଥିଲେ ବୋଲି ଏତଲାରେ ଲକ୍ଷ୍ମଣ ଲେଖିଛନ୍ତି। ପୋଲିସ ଧାରା ୫୦୭ରେ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ଏପଟେ ଘଟଣାକୁ ବିରୋଧ କରି ସ୍ଥାନୀୟ ବାରିକ ସଂଗଠନ ପକ୍ଷରୁ ସେବା ସମ୍ପୂର୍ଣ୍ଣ ବନ୍ଦ କରିବା ପାଇଁ ଧମକ ଦେଇଛନ୍ତି।
