ଜୟପୁର,୨୧।୬: ଅନ୍ତର୍ଜାତୀୟ ଯୋଗ ଦିବସରେ ଅବସରରେ ସାରା ଦେଶରେ ଯୋଗର ଆସର ଜମିଛି। ରାଜନେତାଙ୍କଠାରୁ ଆରମ୍ଭ କରି ଅଭିନେତାଅଭିନେତ୍ରୀଙ୍କ ପର୍ଯ୍ୟନ୍ତ ଯୋଗ କରୁ୍ଥିବା ଭିଡିଓ ସୋସିଆଲ ମିଡିଆରେ ପୋଷ୍ଟ କରୁଛନ୍ତି। ଭାରତୀୟ ଜନତା ପାର୍ଟି ଏମ୍ପି ସୁଖବୀର ସିଂ ଜୌନପୁରିଆ ଅନ୍ତର୍ଜାତୀୟ ଯୋଗ ଦିବସରେ ଯୋଗ କରି ସମସ୍ତଙ୍କ ଦୃଷ୍ଟି ଆକର୍ଷଣ କରିଛନ୍ତି। ସେ ନିଆଁରେ ଯୋଗ କରୁଥିବା ଫଟୋ ଭାଇରାଲ ହୋଇଛି। କେବଳ ନିଆଁରେ ନୁହେଁ ଶରୀରରେ ମାଟି ବୋଳି ହୋଇ ମଧ୍ୟ ସେ ଖରାରେ ଯୋଗ କରୁଥିବା ଦେଖାଯାଇଛି। ଏହାପରେ ଜିମ୍ରେ ପହଞ୍ଚି ସେ ବିଭିନ୍ନ ପ୍ରକାର ଯୋଗ କରିଥିଲେ। ରାଜସ୍ଥାନର ଟୋଙ୍କ୍ ସଓ୍ବାଇ ମାଧୋପୁରରୁ ଏମ୍ପି ଥିବା ସୁଖବୀର ପ୍ରଚଣ୍ଡ ଖରାରେ ନିଜ ଚାରିପଟେ ନିଆଁ ଲଗାଇ ତା’ ମଝିରେ ଯୋଗ କରିଥିଲେ। ଏହାପରେ ଶରୀରରେ ମାଟି ବୋଳି ହୋଇ ଯୋଗ କରିଥିଲେ। ଏନେଇ ସେ କହିଛନ୍ତି ମାଟି ବୋଳି ହେବା ଦ୍ୱାରା ଶରୀରୁ ସବୁ ବର୍ଯ୍ୟ ବସ୍ତୁ ସଫା ହୋଇଯାଏ। ପ୍ରତିଦିନ ସେ ୩ରୁ ୪ ଘଣ୍ଟା ଯୋଗ କରିଥାନ୍ତି। ଗତ ୪ ମାସ ମଧ୍ୟରେ ଯୋଗ ଦ୍ୱାରା ସେ ୨୫ କିଲୋ ଓଜନ କମାଇସାରିଲେଣି। ଯୋଗ ଦିବସରେ ସେ ସମସ୍ତଙ୍କୁ ପ୍ରତିଦିନ ଅତିକମରେ ଏକ ଘଣ୍ଟା ଯୋଗ କରିବା ପାଇଁ ଉପଦେଶ ଦେଇଛନ୍ତି।
