ନୂଆଦିଲ୍ଲୀ,୨୦।୮: ଦେଶରେ ଆଇଏସ୍ଆଇ ଏଜେଣ୍ଟ ସହିତ ୪ ଆତଙ୍କବାଦୀ ନକଲି ପାସପୋର୍ଟରେ ପ୍ରବେଶ କରିଥିବା ଗୋଇନ୍ଦା ବିଭାଗ ପକ୍ଷରୁ ସତର୍କ ସୂଚନା ଜାରି ହୋଇଛି। ଏହାକୁ ଦୃଷ୍ଟିରେ ରଖି ଦେଶବ୍ୟାପି ହାଇ ଆର୍ଲଟ ଜାରି କରାଯାଇଛି। ରାଜସ୍ଥାନ ଏବଂ ଗୁଜରାଟ ସୀମାବର୍ତ୍ତୀ ଅଞ୍ଚଳରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି। ରାଜସ୍ଥାନର ସିରୋହିର ପୋଲିସ ଅଧିକାରୀଙ୍କ ଅନୁସାରେ ସେମାନେ ନକଲି ଆଫଗାନିସ୍ତାନ ପାସପୋର୍ଟ ମାଧ୍ୟମରେ ଦେଶରେ ପ୍ରବେଶ କରିଛନ୍ତି। ସେମାନେ ଭାରତରେ ଆକ୍ରମଣ କରିବା ଲକ୍ଷ୍ୟ ନେଇ ପ୍ରବେଶ କରିଥିବା କୁହାଯାଉଛି। ଏହାକୁ ଦୃଷ୍ଟିରେ ରଖି ସୁରକ୍ଷାକର୍ମୀଙ୍କୁ ସଜାଗ ରହିବାକୁ ନିର୍ଦ୍ଦେଶ ଦିଆଯାଇଛି। ସନ୍ଦିଗ୍ଧ ଯାନବାହନ ତଥା ବ୍ୟକ୍ତି ବିଶେଷଙ୍କ ଯାଞ୍ଚ୍ କରାଯିବାକୁ ମଧ୍ୟ ସତର୍କ ସୂଚନା ଜାରି କରାଯାଇଛି।
