ନୂଆଦିଲ୍ଲୀ,୧୪।୧୧- ଭାରତୀୟ ଟେଷ୍ଟ ଦଳର ଉପ ଅଧିନାୟକ ଅଜିଙ୍କ୍ୟ ରାହାନେ ଆଇପିଏଲର ଆଗାମୀ ସଂସ୍କରଣରେ ଦିଲ୍ଲୀ କ୍ୟାପିଟାଲ୍ସ ଖେଳିବେ। ଅଦଳବଦଳ ପ୍ରକ୍ରିୟାର ଅନ୍ତିମ ଦିନ ରାହାନେଙ୍କ ସମ୍ପର୍କରେ ଦିଲ୍ଲୀ ଫ୍ରାଞ୍ଚାଇଜ ପକ୍ଷରୁ ଗୁରୁବାର ଘୋଷଣା କରାଯାଇଛି। ଦିଲ୍ଲୀ ଦଳରେ ସାମିଲ ହେବାରେ ସେ ଦ୍ୱିତୀୟ ହାଇ ପ୍ରୋଫାଇଲ ଭାରତୀୟ କ୍ରିକେଟର। ତାଙ୍କ ପୂର୍ବରୁ ଦଳ ଅଫ୍ ସ୍ପିନର ରବିଚନ୍ଦ୍ରନ ଅଶ୍ୱିନଙ୍କୁ ଦଳରେ ସାମିଲ କରିଛି। କ୍ୟାପିଟାଲ୍ସ ଦଳରେ ପୂର୍ବରୁ ଟପ୍ ଅର୍ଡରରେ କେବଳ ଭାରତୀୟ ବ୍ୟାଟ୍ସମ୍ୟାନ ଥିଲେ। ଶିଖର ଧାଓ୍ବନ, ପଥ୍ବୀ ଶ, ଶ୍ରେୟାସ ଆୟାର ଓ ରିଷଭ ପନ୍ତ ଟପ୍ ୪ ସ୍ଥାନରେ ବ୍ୟାଟିଂ ଆସୁଥିଲେ। ଏବେ ରାହାନେ ସାମିଲ ହେବାରୁ ବ୍ୟାଟିଂ ଅର୍ଡରରେ ନିଶ୍ଚିତ ପରିବର୍ତ୍ତନ ଆଶା କରାଯାଉଛି। ରାଜସ୍ଥାନ ଫ୍ରାଞ୍ଚାଇଜ ପାଇଁ ରାହାନେ ୨୦୧୧ରୁ ୨୦୧୫ ଓ ୨୦୧୮-୧୯ ସଂସ୍କରଣରେ ପ୍ରାୟ ୧୦୦ ମ୍ୟାଚ୍ ଖେଳିଛନ୍ତି। ଗତବର୍ଷ ରାହାନେଙ୍କୁ ସିଜନ ମଧ୍ୟାନ୍ତରରେ ଅଧିନାୟକ ପଦରୁ ବିଦା କରାଯାଇ ଅଷ୍ଟ୍ରେଲିଆର ଷ୍ଟିଭ ସ୍ମିଥଙ୍କୁ ଦାୟିତ୍ୱ ଦିଆଯାଇଥିଲା। ନେତୃତ୍ୱ ଚାପରୁ ମୁକ୍ତି ପାଇବା ପରେ ରାହାନେଙ୍କ ପ୍ରଦର୍ଶନରେ ଉନ୍ନତି ଆସିଥିଲା। ଏକ ଶତକ ସହ ୧୪ ମ୍ୟାଚ୍ରେ ସେ ୩୯୩ ରନ୍ କରିଥିଲେ। ମୋଟରେ ସେ ୧୪୦ ଆଇପିଏଲ ମ୍ୟାଚ୍ ଖେଳି ୩୮୨୦ ରନ୍ କରିଛନ୍ତି। ରୟାଲ୍ସ ବ୍ୟତୀତ ମୁମ୍ବାଇ ଇଣ୍ଡିଆନ୍ସ ଓ ରାଇଜିଂ ପୁଣେ ସୁପରଜିଆଣ୍ଟ ପାଇଁ ଖେଳିଥିଲେ। ଅନ୍ୟପକ୍ଷରେ ରାଜସ୍ଥାନ ରୟାଲ୍ସ ସ୍ପିନର ମୟଙ୍କ ମାର୍କଣ୍ଡେ ଓ ରାହୁଲ ତଓ୍ବୋତିଆଙ୍କୁ ଦଳରେ ସାମିଲ କରିଛି। ଉଭୟେଙ୍କୁ ପ୍ରଥମେ ମୁମ୍ବାଇ ଇଣ୍ଡିଆନ୍ସ ଦିଲ୍ଲୀକୁ ଦେଇଥିଲା। ମୁମ୍ବାଇ ପାଇଁ ଗତ ଦୁଇ ସିଜନରେ ଖେଳିଥିବା ମାର୍କଣ୍ଡେ ୧୭ ମ୍ୟାଚ୍ରେ ୧୬ ଉଇକେଟ ନେଇଥିବାବେଳେ ୨୦୧୪ରେ ଆଇପିଏଲ ପଦାର୍ପଣ କରିଥିବା ତଓ୍ବେତିଆ ଏପର୍ଯ୍ୟନ୍ତ ୨୦ ମ୍ୟାଚ୍ ଖେଳି ୧୪ ଉଇକେଟ ହାତେଇଛନ୍ତି।
