ଇମ୍ପାଲରେ ଜନ୍ମିତ ଆଶାଲତା ଦେବୀ ଏଏଫ୍ସି ପ୍ଲେୟାର ଅଫ୍ ଦି ଇୟର ପୁରସ୍କାର ପାଇଁ ମନୋନୀତ ହୋଇଛନ୍ତି। ଜଣେ ଗୋଲକିପର ହେବାକୁ ଚାହୁଁଥିଲେ ମଧ୍ୟ ସେ ସମୟକ୍ରମେ ଡିଫେଣ୍ଡର ବନିଯାଇଥିଲେ। ତାଙ୍କ ନେତୃତ୍ୱରେ ଭାରତ ସାଫ୍ ଚାମ୍ପିୟନଶିପ୍ ଟାଇଟଲ ଜିତିଥିଲା। ତାଙ୍କ ସଂଘର୍ଷ ଓ ସଫଳତାର କାହାଣୀ ଅନ୍ୟମାନଙ୍କ ପାଇଁ ଉଦାହରଣ ସୃଷ୍ଟି କରିଛି।
ଉତ୍ତର ପୂର୍ବାଞ୍ଚଳ ରାଜ୍ୟ ମଣିପୁର ରାଜଧାନୀ ଇମ୍ପାଲରେ ଜନ୍ମିତ ମହିଳା ଫୁଟବଲର ଲୋଇଟୋଙ୍ଗ୍ବାମ୍ ଆଶାଲତା ଦେବୀ ଏବେ ଏକ ପରିଚିତ ନାମ। ମାତ୍ର ୭ ବର୍ଷ ବୟସରେ ସେ ପିତାଙ୍କ ସହିତ ଫୁଟବଲ ସମ୍ପର୍କରେ ଆଲୋଚନ କରିଥିଲେ। ପ୍ରଥମେ ଜଣେ ସଫଳ ଗୋଲ କିପର ହେବାକୁ ଚାହୁଁଥିବା ଆଶାଲତା ଶେଷରେ ଜଣେ ସଫଳ ଡିଫେଣ୍ଡର ଭାବେ ପରିଚୟ ପାଇଛନ୍ତି। ସେ ଫୁଟବଲ ନ ଖେଳି ପାଠ ପଢନ୍ତୁ ବୋଲି ତାଙ୍କ ମା’ ଚାହୁଁଥିଲେ। ବଲ୍ କିକ୍ ମାରିବାରେ ସେ ନିଜରକୁ ରୋକିପାରି ନ ଥିଲେ। ଫଳରେ ସେ ଗୋଲକିପର ହୋଇପାରି ନ ଥିଲେ। ୧୭ ବର୍ଷରୁ କମ୍ ଜାତୀୟ ଦଳରେ ସ୍ଥାନ ନ ପାଇବା ପର୍ଯ୍ୟନ୍ତ ତାଙ୍କୁ ଅବଶ୍ୟ ଗାଳିଗୁଲଜ ଶୁଣିବାକୁ ମିଳୁଥିଲା। ଭାରତୀୟ ସିନିୟର ଫୁଟବଲ ଦଳର ଅଧିନାୟିକା ଆଶାଲତା ଏବେ ଏକ ବଡ଼ ସମ୍ମାନର ଅଧିକାରୀ ହୋଇଛନ୍ତି। ଏସିଆନ ଫୁଟବଲ କନ୍ଫେଡେରେଶନ (ଏଏଫ୍ସି) ପ୍ଲେୟାର ଅଫ୍ ଇୟର ପୁରସ୍କାର ପାଇଁ ସେ ନୋମିନେଟ ହୋଇଛନ୍ତି। ସେ ପ୍ରଥମ ଭାରତୀୟ ପୁରୁଷ କିମ୍ବା ମହିଳା ଖେଳାଳି ଭାବେ ଏହି ପୁରସ୍କାର ପାଇଁ ମନୋନୀତ ହୋଇଛନ୍ତି। ଏହା ଭାରତୀୟ ଫୁଟବଲ ପାଇଁ ଏକ ଗୌରବର ବିଷୟ । ଏହି ପୁରସ୍କାର ଦୌଡ଼ରେ ଆଶାଲତାଙ୍କୁ ବାଦ୍ ଦେଲେ ଚାଇନାର ଲି ୟିଙ୍ଗ୍, ଜାପାନର ମିଡ୍ଫିଲ୍ଡର ସାକି କୁମାଗାଇ ସାମିଲ ରହିଛନ୍ତି।
ଆଶାଲତା ସେଥୁ ଏଫ୍ସିର ନେତୃତ୍ୱ ନେଇଥିଲେ ଓ ଦଳକୁ ଆଇ- ଲିଗ୍ ଚାମ୍ପିୟନ କରାଇଥିଲେ। କେବଳ ସେତିକି ନୁହଁ ତାଙ୍କ ନେତୃତ୍ୱରେ ଭାରତ ସାଫ୍ ଚାମ୍ପିୟନଶିପ୍ ଟାଇଟଲ ମଧ୍ୟ ହାସଲ କରିଥିଲା। ପୁଣି ଏଏଫ୍ସି ଅଲିମ୍ପିକ୍ କ୍ୱାଲିଫାୟର୍ସରେ ତାଙ୍କ ନେତୃତ୍ୱରେ ଭାରତ ଦ୍ୱିତୀୟ ରାଉଣ୍ଡରେ ପ୍ରବେଶ କରିଥିଲା। ୨୬ ବର୍ଷୀୟା ଆଶାଲତା ବିଦ୍ୟାଳୟସ୍ତରରେ ପ୍ରଥମେ ଫୁଟବଲ ଖେଳିଥିଲେ। ୧୩- ୧୪ ବର୍ଷରେ ସେ ଶୁଟ୍ଆଉଟ୍ରେ ପେନାଲ୍ଟି ଗୋଲ ସ୍କୋର କରିଥିଲେ ଓ ଏହାକୁ ବେଶ୍ ଉପଭୋଗ କରିଥିଲେ। ୨୦୦୮ରେ ଗ୍ବାଲିୟରରେ ଅନୁଷ୍ଠିତ ୧୭ ବର୍ଷରୁ କମ୍ କ୍ୟାମ୍ପରେ ଯୋଗ ଦେବା ପରେ ସେ ପଛକୁ ଫେରିଚାହିଁନାହାନ୍ତି। ଏହି ବର୍ଷ ସେ ଜାତୀୟ ଦଳରେ ସ୍ଥାନ ପାଇଥିଲେ। ୨୦୧୩ରେ ବାପାଙ୍କ ଦେହାନ୍ତ ପରେ ସେ ବହୁ ସମସ୍ୟାର ସମ୍ମୁଖୀନ ହୋଇଥିଲେ। ସେତେବେଳେ ମା, ୪ ଭଉଣୀ ଓ ଜଣେ ଭାଇଙ୍କୁ ନେଇ ଘର ଚଳାଇବା ଭାରି କଷ୍ଟଥିଲା। ସେ ଦିଲ୍ଲୀ ଆସି ଏକ ମର୍ଡନ ସ୍କୁଲ୍ରେ ଛୋଟ ପିଲାଙ୍କୁ ପ୍ରଶିକ୍ଷଣ ଦେଉଥିଲେ। ଏହାପରେ ସେ ରେଲଓ୍ବେରେ ଚାକିରି କରିଥିଲେ। ତାଙ୍କ ସ୍ବାସ୍ଥ୍ୟ ଖରାପ ହୋଇଥିଲା। ସୁସ୍ଥ ହୋଇ ୨୦୧୫ରେ ଭାରତୀୟ ସିନିୟର ଦଳରେ ସ୍ଥାନ ପାଇଥିଲେ। ଡିସେମ୍ବର ୨ ତାରିଖରେ ହଂକଂରେ ଏଏଫ୍ସି ବାର୍ଷିକ ପୁରସ୍କାର ଘୋଷଣା କରାଯିବ। ଅବଶ୍ୟ ଆଶାଲତା ସେତେବେଳେ କାଠମାଣ୍ଡୁରେ ସାଫ୍ ଗେମ୍ସ ଖେଳୁଥିବେ। ଆଶାଲତାଙ୍କ ସଂଘର୍ଷ ଓ ସଫଳତାର କାହାଣୀ ଅନ୍ୟମାନଙ୍କ ପାଇଁ ପ୍ରେରଣା ସୃଷ୍ଟି କରିଛି।
